អូស្ត្រាលី ៖ អ្មក“ឡានបើកកិនមនុស្ស” គ្មានពាក់ព័ន្ធនឹងភេរវនិយម
នៅថ្ងៃព្រហស្បតិ៍ទី ២១ធ្នូនេះ មានរថយន្តមួយគ្រឿងបានបើកសម្រុកទៅកិនហ្វូងមនុស្ស នៅកណ្តាលក្រុងមែលប៊ន ប្រទេសអូស្ត្រាលី។ បើតាមអាជ្ញាធរ មានអ្នកដំណើរយ៉ាងហោចណាស់ ១៩នាក់បានរងរបួស ក្នុងនោះជាច្រើននាក់ជារបួសធ្ងន់។ ប៉ុន្តែបើតាមប៉ូលិល អ្នកបើកបររថយន្តនោះគ្មានទំនាក់ទំនងអ្វីនឹងអំពើភេរវនិយមទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
បើតាមមេបញ្ជាការប៉ូលិសនៃរដ្ឋ Victoria ការបើកឡានកិនមនុស្សនេះជាទង្វើព្រៀងទុកដោយចេតនា ប៉ុន្តែគេនៅមិនទាន់ដឹងអំពីមូលហេតុទេ។ ជនល្មើសជាអ្នកបើកបរ ព្រមទាំងមនុស្សទីពីរម្នាក់ទៀត ត្រូវប៉ូលិសចាប់ខ្លួនបានភ្លាម។
មានអាយុ៣២ឆ្នាំ ដើមកំណើតអាហ្វហ្កានីស្ថាន អ្នកបើកបរជាជនល្មើសធ្លាប់មានឈ្មោះក្នុងបញ្ជីប្រព្រឹត្តកំហុសក្នុងពេលបើកបរ និងប្រព្រឹត្តអំពើបំពារបំពានលើកុមារ ព្រមទាំងមានសតិមិនសូវល្អ ដោយហេតុតែជក់គ្រឿងញៀន។ ប៉ុន្តែគ្មានសញ្ញា ឬចំណងអ្វីមួយ ដែលបង្ហាញថាជនទាំងពីរជាមនុស្សជ្រុលនិយម នាំឱ្យគេអាចភ្ជាប់ដល់សកម្មភាពភេវកម្មទេ សម្រាប់ពេលនេះ។ នេះបើតាមប្រសាសន៍របស់ប៉ូលិសអូស្ត្រាលីដដែល ដែលក៏បានសំណូមពរ ឱ្យសាក្សីដែលមានរូបភាពសង្ស័យមកប៉ូលិស ដើម្បីពន្លឿនការអង្កេត។
ទូរទស្សន៍ Sky New Australia ដោយមានសំឡេងសាក្សីជាសំអាងផង បានរៀបរាប់ថា នៅវេលាម៉ោង ប្រហែល ៤និង៣០នាទីរសៀល នៅផ្លូវបំបែកដែលមានមនុស្សម្នាធ្វើដំណើរអ៊ូអរខ្លាំង រថយន្តប្រភេទ SUV ពណ៌ស បានបើកសំដៅកិនហ្វូងមនុស្ស ដោយគ្មានបង្អង់ល្បឿនទេ រហូតទាល់បុកបង្គោលគាំងខ្ទេចឡានទៅលែងរួច។ មានក្មេងតូចម្នាក់ត្រូវរបួសចំក្បាលជាទម្ងន់ និងកំពុងទទួលការព្យាបាលសង្គ្រោះបន្ទាន់នៅមន្ទីរពេទ្យ។ នេះប្រភពព័ត៌មានដដែល។
ហេតុការណ៍នេះបានធ្វើឱ្យនឹកឃើញសោកនាដកម្ម កាលពីខែមករាដើមឆ្នាំ ២០១៧ ដែលកាលណោះ មានឡានមួយគ្រឿងបើកសំដៅកិនមនុស្សនៅមុខមជ្ឈមណ្ឌលពាណិជ្ជកម្ម ដ៏ធំបំផុតមួយរបស់ក្រុងមែលប៊ន។ អ្នកបើកបរជាជនល្មើសនោះ ធ្លាប់បើកឡានគេចប៉ូលិសទៅបុកមនុស្សស្លាប់អស់៦នាក់ មិនទាន់កាត់ទោសផង ហើយជាជនជាប់សង្ស័យថាបានវាយសម្លាប់បងប្រុសខ្លួនម្នាក់ទៀត។
តាំងពីពេលនោះមក រដ្ឋាភិបាលអូស្ត្រាលីបានបង្ហាញយុទ្ធសាស្ត្រថ្មី ដើម្បីបញ្ចៀសការវាយប្រហារដោយប្រើឡានកិនមនុស្ស ដូចដែលធ្លាប់កើតមាននៅក្រុងបាសឺឡោន នីស ឬឡុងដ៍។ តាមផែនការ អូស្រ្តាលីគ្រោងនឹងចាត់វិធានការដាក់របង កាមេរ៉ាសុវត្ថិភាព ដាំដើមឈើ និងតម្កល់រូបចម្លាក់ នៅតាមទីលានសាធារណៈ ព្រមទាំងពង្រឹងកម្លាំងត្រៀមបញ្ចេញសកម្មភាពរហ័ស។ អាជ្ញាធរមូលដ្ឋាន កំពុងរៀបចំដាក់ប្រព័ន្ធប្រកាសអាសន្នសាធារណៈ និងម៉ាស៊ីនថតសុវត្ថិភាពបន្ថែម ប៉ុន្តែបើកាសែត The Age មធ្យោបាយការពារសុវត្ថិភាពនេះអត់មានរោទ៍ទេពេលកើតហេតុព្រឹកមិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ