ចិនត្រៀមខ្លួនរួចជាស្រេច ដើម្បីបង្កើនទំនាក់ទំនងយោធាជាមួយអាមេរិក
រដ្ឋាភិបាលទីក្រុងប៉េកាំង ទំនងដូចជាត្រៀមខ្លួនជាស្រេចហើយនៅថ្ងៃទី១៧ តុលា ដើម្បីធ្វើឲ្យទំនាក់ទំនងយោធារវាងចិន និងអាមេរិក វិលមកកាន់ភាពប្រក្រតីឡើងវិញ ក្រោយពីទំនាក់ទំនងប្រទេសមហាអំណាចទាំងពីរជួបភាពរង្គោះរង្គើ ដោយសារតែសង្គ្រាមពាណិជ្ជកម្ម និងទណ្ឌកម្ម ដែលអាមេរិកបានដាក់លើចិន។ ជាក់ស្តែង ថ្មីៗនេះប្រទេសចិន បានផ្តល់ភ្លើងខៀវ ដល់អាមេរិក ដើម្បីបើកលទ្ឋភាពឲ្យ តំណាងភាគីនៃប្រទេសទាំងពីរ អាចជួបពិភាក្សាគ្នានាពេលឆាប់ៗខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
ជំនួយការរដ្ឋមន្ត្រីការពារជាតិអាមេរិក ទទួលបន្ទុកកិច្ចការសន្តិសុខអាស៊ីនិងប៉ាស៊ីហ្វិកបានឲ្យដឹងថា រដ្ឋមន្ត្រីការពារជាតិអាមេរិកលោក Jim Mattis នឹងជួបពិភាក្សាជាមួយលោក Wei Fenghe រដ្ឋមន្ត្រីការពារជាតិចិន នៅថ្ងៃព្រហស្បតិ៍ ទី១៨ តុលា នៅឯកិច្ចប្រជុំកំពូលសន្តិសុខថ្នាក់តំបន់មួយ ដែលរៀបចំឡើងនៅក្នុងប្រទេសសិង្ហបុរី។
តាមពិតទៅ ជំនួបចរចារវាងអាមេរិកនិងចិន ត្រូវបានរៀបចំម្តងរួចទៅហើយ កាលពីសប្តាហ៍មុន ប៉ុន្តែត្រូវបរាជ័យទៅវិញ ដោយហេតុថា ភាគីចិនបានធ្វើការបដិសេធ។ ដូចនេះហើយ ការយល់ព្រមចូលតុពិភាក្សារបស់ចិនលើកនេះ ធ្វើឲ្យអាមេរិកគិតថា វាជាសក្ខីកម្មមួយ ចង្អុលបង្ហាញថា ចិនពិតជាចង់រក្សាទំនាក់ទំនងជាមួយអាមេរិកឲ្យដូចដើម និងមានស្ថេរភាព។
គួរជម្រាបជូនថា រដ្ឋាភិបាលចិន បានបញ្ចេញប្រតិកម្មខឹងសម្បាយ៉ាងខ្លាំង បន្ទាប់ពីរដ្ឋាភិបាលក្រុងវ៉ាស៊ីនតោន កាលពីខែមុន បានដាក់ទណ្ឌកម្មប្រឆាំងទៅនឹងប្រទេសចិន ដែលបានទិញយន្តហោះចម្បាំង និងមីស៊ីលពីប្រទេសរុស្សី។ ក្រៅពីនេះ ទំនាក់ទំនងរវាងចិន និងអាមេរិក បានកើនឡើងភាពតានតឹងបន្ថែមទៀត នៅពេលដែលក្រុងប៉េកាំង មិនអនុញ្ញាតឲ្យនាវាចម្បាំងអាមេរិកបើកចូលទៅក្នុងទីក្រុងហុងកុង និងបានលុបចោលកិច្ចប្រជុំរវាងប្រមុខកងទ័ពជើងទឹកចិន និងសមភាគីអាមេរិក។
ទាក់ទិននឹងជំនួបរវាងអាមេរិក និងចិននេះដែរ ជំនួយការរដ្ឋមន្ត្រីការពារជាតិ បាននិយាយថា ភាគីទាំងពីរ នឹងលើកយកបញ្ហាសន្តិសុខក្នុងតំបន់សមុទ្រចិនខាងត្បូងមកពិភាក្សាផងដែរ។ បញ្ហាសន្តិសុខត្រូវមានលើតុចរចា ដោយភាគីអាមេរិកបានអះអាងថា កាលពីខែមុន នាវាចម្បាំងចិន បានបើកមកកៀកនឹងនាវាចម្បាំងរបស់អាមេរិក នៅរយៈចម្ងាយប្រមាណតែ៤១ម៉ែត្រតែប៉ុណ្ណោះ នៅក្នុងតំបន់សមុទ្រចិនខាងត្បូង ជាទីតាំង ដែលរដ្ឋាភិបាលក្រុងប៉េកាំង តែងអះអាងថាជាកម្មសិទ្ធិរបស់ខ្លួន។ អាមេរិកថា ទង្វើរបស់ចិននេះ គឺវាគ្មានវិជ្ជាជីវៈ និងប្រកបដោយគ្រោះថ្នាក់ថែមទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ