គណបក្សកាន់អំណាចតៃវ៉ាន់ បោះឆ្នោតជ្រើសរើសប្រធានថ្មី ដែលមានជំហរកណ្តាលនិយម
នៅតៃវ៉ាន់ នៅថ្ងៃអាទិត្យម្សិលមិញ គណបក្សកាន់អំណាចបានបោះឆ្នោតជ្រើសរើសប្រធានថ្មី ដើម្បី ជំនួសលោកស្រីប្រធានាធិបតី ឆៃ អ៊ីងវេន ដែលបានលាលែងចេញពីតំណែងប្រធានបក្ស កាលពីខែ វិច្ឆិកាកន្លងទៅ។ លោកចូ ជុងតៃ ដែលមានជំហរកណ្តាលនិយម បានទទួលសំឡេងគាំទ្រភាគច្រើនរបស់បក្សកាន់អំណាច បើប្រៀបធៀបនឹងបេក្ខជនឯករាជ្យនិយម។ ការទាមទារឯករាជ្យឲ្យតៃវ៉ាន់ អាចប្រឈមនឹងការវាយប្រហារ ប្រើកម្លាំងយោធា ពីសំណាក់ក្រុងប៉េកាំង ដែលបានចាត់ទុកតៃវ៉ាន់ ជាដែនដីកោះមួយរបស់ប្រទេសចិន។
ចុះផ្សាយនៅថ្ងៃ៖
ក្នុងកាលៈទេសៈដែលភាពតានតឹង ចិន និងតៃវ៉ាន់កើនឡើងដល់កម្រិតកំពូល គណបក្សកាន់អំណាចតៃវ៉ាន់បានបោះឆ្នោតជ្រើសរើសបេក្ខជនដែលមានជំហរកណ្តាលនិយម ជាជាងជ្រើសរើសយកបេក្ខជនឯករាជ្យនិយម សម្រាប់ធ្វើជាប្រធានថ្មី ជំនួសលោកស្រី ឆៃ អ៊ីងវេន។
នៅវិច្ឆិកាឆ្នាំមុន លោកស្រី ប្រធានាធិបតី ឆៃ អ៊ីងវេនបានប្រកាសលាលែងចេញពីតំណែងរបស់ប្រធានបក្ស ចំរើនប្រជាធិបតេយ្យតៃវ៉ាន់ នៅក្រោយបរាជ័យដ៏អាម៉ាស់មុខរបស់បក្សកាន់អំណាច នៅក្នុងការបោះឆ្នោតឃុំសង្កាត់តៃវ៉ាន់។ គណបក្សចំរើនប្រជាធិបតេយ្យរបស់លោកស្រី ឆៃ ធ្លាប់បានឈ្នះឆ្នោតភ្លូកទឹក ភ្លូកដី កាលពីឆ្នាំ ២០១៦ លើគណបក្សគួកមិញតាង ដែលមានជំហរស្និទ្ធទៅរកក្រុងប៉េកាំង។
ត្រូវកាន់តំណែងជាប្រធានបក្ស រហូតដល់ឆ្នាំបោះឆ្នោតប្រធានាធិបតី ឆ្នាំ ២០២០ លោក ចូ ជុងតៃ ដែលត្រូវបានបក្សបោះឆ្នោតគាំទ្រ ក្នុងសំឡេងភាគច្រើន កាលពីថ្ងៃអាទិត្យ មានជំហរកណ្តាលនិយម ដូចលោកស្រី ឆៃ អ៊ីងវេន ដែលរហូតរងការដាក់សម្ពាធពីទាំងពីខាងប៉េកាំង ហើយនិងទាំងពីខាងក្រុមឯករាជ្យនិយម នៅក្នុងគណបក្សរបស់លោកស្រី។ លោកស្រីឆៃ ចង់រក្សាលក្ខន្តិកៈដើម ក្នុងទំនាក់ទំនងជាមួយប្រទេសចិន។
សូមអាន៖ ប្រធានាធិបតីតៃវ៉ាន់៖ គេមិនអាចលុបបំបាត់ចោលតៃវ៉ាន់នោះទេ
ទោះមិនប្រកាសឯករាជ្យឲ្យតៃវ៉ាន់ ប៉ុន្តែ លោកស្រីឆៃ បដិសេធមិនព្រមទទួលស្គាល់ថាតៃវ៉ាន់ជាផ្នែកមួយរបស់ប្រទេសចិន។ ការណ៍នេះ បានធ្វើឲ្យរដ្ឋាភិបាលចិនដីគោក បង្កើនការដាក់សំពាធការទូត ដូចជាអូសទាញប្រទេសសម្ព័ន្ធមិត្តរបស់តៃវ៉ាន់ ដាក់គំនាបសេដ្ឋកិច្ច លើតៃវ៉ាន់ និងបញ្ចេញសាច់ដុំតាមរយៈសមយុទ្ធ ក្បែរកោះតៃវ៉ាន់។ កាលពីថ្ងៃពុធកន្លងទៅ ប្រធានាធិបតីចិន លោកស៊ី ជីនពីង នៅបានព្រមានសាជាថ្មីថា នឹងប្រើកម្លាំងយោធាដើម្បីយកតៃវ៉ាន់មកកាន់កាប់ បើសិនជាតៃវ៉ាន់ ហ៊ានបើកមាត់ទាមទារឯករាជ្យពីចិន។
សម្រាប់អ្នកជំនាញផ្នែកតៃវ៉ាន់ ដោយជ្រើសរើសបេក្ខជនកណ្តាលនិយម គណបក្សកាន់អំណាចតៃវ៉ាន់ ចង់បន្តរក្សាជំហរដូចមុន ពោលគឺមិនចុះញ៉មរណបនឹងប្រទេសចិន ដូចក្នុងអាណត្តិរដ្ឋាភិបាលគួកមិញតាង ប៉ុន្តែ ក៏មិនប្រកាសឯករាជ្យដែលធ្វើឲ្យក្រុងប៉េកាំងផ្ទុះកំហឹងនោះដែរ។ មួយវិញទៀត ការជ្រើសរើសអ្នកកណ្តាលនិយម មកធ្វើជាមេដឹកនាំ គណបក្សកាន់អំណាចតៃវ៉ាន់ ចង់ធានាទៅទីក្រុងវ៉ាស៊ីនតោន។ ទោះជាតៃវ៉ាន់ ជាសម្ព័ន្ធមិត្តដែលអាមេរិកប្រកាសការពារគាំទ្រ ប៉ុន្តែ អាមេរិកនៅតែបារម្ភខ្លាចក្រែងមានការវាយប្រហារឈ្លានពានរបស់យោធាចិន ដើម្បីចូលកាន់កាប់តៃវ៉ាន់ ដោយសារតែការប្រកាសឯករាជ្យរបស់តៃវ៉ាន់នោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ