ចិនដីគោកចេញមុខព្រមានជាថ្មីដោយសម្លឹងឃើញសញ្ញាភេរវកម្មនិយមនៅក្នុងក្បួនបាតុកម្មនៅហុងកុង
នៅហុងកុង ចលនាបាតុកម្មរបស់ក្រុមបាតុករអ្នកប្រជាធិបតេយ្យហាក់មិនបានថយចុះទេ។ បន្ទាប់ពីមានការប៉ះទង្គិចគា្នយ៉ាងហិង្សារវាងក្រុមបាតុករ និងកម្លាំងប៉ូលិសនាចុងសប្តាហ៍កន្លងមក មានបាតុករជាង ៥ ០០០នាក់បានបន្តប្រមូលផ្តុំគ្នានៅអាកាសយានដ្ឋានអន្តរជាតិ។ រដ្ឋអំណាចអាកាសយានដ្ឋានបានប្រកាសឲ្យដឹងនៅថ្ងៃចន្ទ ទី១២ សីហាពីការលុបចោលជើងហោះហើរជាច្រើន។ ទន្ទឹមគ្នានេះ ក្រុមហ៊ុនអាកាសចរណ៍ហុងកុង Cathay Pacific បានគំរាមបណ្តេញបុគ្គលិកណាដែលបានគាំទ្រ ឬចូលរួមនៅក្នុងក្បួនបាតុកម្ម។ បុព្វហេតុរបស់ពួកបាតុករ។ ចំណែកនៅចិនដីគោក ក្រុងប៉េកាំងហាក់បន្តដាក់គំនាបលើក្រុមបាតុករដោយបញ្ជាក់ក្នុងថ្ងៃចន្ទ ទី១២ សីហានេះថា ទង្វើហិង្សារបស់ពួកបាតុករលើកម្លាំងប៉ូលិសជាបទឧក្រិដ្ឋធ្ងន់ធ្ងរ និងជាទង្វើដែលបង្ហាញចេញនូវសញ្ញាភេរវនិយម។ ដោយឡែក លោកហ្វ៊ែរណង់ដូ ជឿង សមាជិកសភាហុងកុងម្នាក់នៃគណបក្សប្រជាធិបតេយ្យបានបញ្ចេញប្រតិកម្មដោយពន្យល់ពីតាក់ទិចរបស់ក្រុមបាតុករប្រឈមនឹងកម្លាំងប៉ូលិស។
ចុះផ្សាយនៅថ្ងៃ៖
ស្តាប់ - ០១:៣៥
« ពីដំបូង ក្រុមបាតុករ និងកម្លាំងប៉ូលិសបានស្ថិតនៅម្ខាងម្នាក់ដោយពួកគេបានគូសខ្សែមួយ។ តែនៅទីបំផុត កម្លាំងប៉ូលិសបានប្រើគ្រាប់បែកផ្សែងបង្ហូរទឹកភ្នែកបាញ់ទៅលើហ្វូងបាតុករ។ ហ្វូងបាតុករក៏បានបំបែកជាក្រុម ហើយកម្លាំងប៉ូលិសក៏បានដេញតាមពួកគេ រួចក្រោយមកក៏បានឃាត់ខ្លួនមួយចំនួន។ ឥឡូវនេះ ក្រុមបាតុករបានប្តូរតាក់ទិចដោយបង្កើតរបាំង បិទផ្លូវ និងរត់គេចពីការវាយប្រហារ ឬការចាប់ខ្លួនពីកម្លាំងប៉ូលិស។
ពិតណាស់តាំងពីថ្ងៃទី៩ មិថុនាមក មានមនុស្សជិត ៥០០នាក់ត្រូវបានចាប់ខ្លួន។ តែក្រុមបាតុករហាក់បានយល់ភ្លាមថា គេត្រូវធ្វើយ៉ាងណាគេចឲ្យផុតពីការចាប់ខ្លួនដោយបន្តក្បួនបាតុកម្ម។ សម្រាប់ខ្ញុំ ខ្ញុំមិនចង់ឃើញមានការចាប់ខ្លួន និងមានអំពើហិង្សាអ្វីឡើយ។ តែគឺរបបកម្មុយនិស្តក្រុងប៉េកាំងទេតើដែលបានបង្រៀនយើងឲ្យយល់ថា បាតុកម្មអហិង្សាគ្មានន័យ និងគ្មានប្រយោជន៍អ្វីទាំងអស់។
និយាយយ៉ាងដូចនេះមិនមែនមានន័យថា ខ្ញុំចង់ជំរុញឲ្យអំពើហិង្សានោះទេ។ តែរហូតមកដល់ពេលនេះ ខ្ញុំមិនដែលបានឃើញពួកបាតុករព្យាយាមធ្វើបាបលើអ្នកណាម្នាក់ឡើយ។ ពួកគេបំផ្លាញរចនាសម្ព័ន្ធ ប្រព្រឹត្តអំពើបំផ្លិចបំផ្លាញ។ និយាយការពិតទៅ ខ្ញុំជាប្រភេទសមាជិកសភាសន្តិភាពនិយម ប្រកបដោយវិចារណញ្ញាណ និងអហិង្សា »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ