ចិន៖រដ្ឋអំណាចបានប្រកាសអាសន្នជាថ្មីពីកម្រិតផ្សែងពុលខ្ពស់ក្នុងក្រុងប៉េកាំង
នៅក្នុងប្រទេសចិន ទីក្រុងប៉េកាំងត្រូវបានប្រកាសដាក់ក្នុងភាពអាសន្នជាថ្មីពីកម្រិតអត្រាផ្សែងពុលខ្ពស់នៅក្នុងបរិយាកាស។ ការប្រកាសដាក់ក្រុងប៉េកាំងក្នុងភាពអាសន្នផ្សែងពុលមានរយៈពេល ៤ថ្ងៃដោយរាប់ចាប់ពីថ្ងៃសៅរ៍ ទី១៩ ធ្នូនេះរហូតដល់ថ្ងៃអង្គារ ទី២២ ធ្នូសប្តាហ៍ក្រោយ។ ពលរដ្ឋចិនរស់ក្នុងទីក្រុងប៉េកាំងបានទទួលភាពអាសន្ននេះតាំងពីថ្ងៃសុក្រ ទី១៨ ធ្នូម្ល៉េះ ពោលចំពេលដែលមេឃនៅស្រឡះគ្មានពពកបាំងនៅឡើយ។ នេះស បញ្ជាក់ឲ្យឃើញថា ជាលើកទី១ ដែលចិនបានចាត់វិធានការបង្ការទុកជាមុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៤
ភាពអាសន្នបង្ការទុកជាមុនបានអនុញ្ញាតឲ្យពលរដ្ឋចិនរស់ក្នុងទីក្រុងប៉េកាំងលប់ចោលនូវកម្មវីធីគ្រោងទុកមួយចំនួន ក៏ដូចជាការត្រៀមពាក់ប្រដាប់ការពារស្រូបផ្សែងពុលនៅពេលចាកចេញពីផ្ទះ។ ទន្ទឹមគ្នានេះ វិធានការបង្ការទុកជាមុនក៏បានអនុញ្ញាតឲ្យរដ្ឋអំណាចចាត់វិធានការទប់ស្កាត់មួយចំនួនជាមុនដែរ។ នៅវេលាម៉ោង ២រសៀលម៉ោងក្នុងទីក្រុងប៉េកាំងនាថ្ងៃសៅរ៍នេះ អត្រាផ្សែងពុលមានកម្រិតរហូតដល់ទៅ ១៨១ ពោលមានកម្រិត ៤ដងខ្ពស់ជាងកម្រិតដែលអនុញ្ញាតដោយអង្គការសុខភាពពិភពលោក។ តែសម្រាប់ពលរដ្ឋរស់ក្នុងក្រុងប៉េកាំងទូទៅ អត្រាផ្សែងពុលកម្រិតនេះមិនមែនជារឿងគួរឲ្យចម្លែកអ្វីទេ ព្រោះជាកម្រិតមួយដែលគេធ្លាប់បានដកដង្ហើមស្រូបជាប្រចាំថ្ងៃទៅហើយ។
ក៏ដូចជានៅក្នុងការប្រកាសភាពអាសន្នលើកមុនដែរ មានវិធានការមួយចំនួនត្រូវបានរដ្ឋអំណាចផ្តើមអនុវត្តន៍ចាប់ពីថ្ងៃនេះទៅ រួមមាន ការបិទទ្វាររោងចក្រដែលបញ្ចេញឧស្ម័នកាបូនិចច្រើន ចរាចរណ៍រថយន្តក្នុងទីក្រុងប៉េកាំងនឹងត្រូវឆ្លាស់គ្នារវាងលេខគូ និងលេខសេស និងការបិទទ្វារសាលារៀន។ អ្វីជាការកត់សម្គាល់ និងខុសប្លែកពីពេលមុន រលកផ្សែងពុលពេលនេះត្រូវបានខ្យល់បក់នាំមកពីតំបន់រោងចក្រ សហគ្រាសស្ថិតប៉ែកខាងត្បូងក្រុងប៉េកាំង។
គឺការព្យាករណ៍របស់ឧតុនិយមដែលបានអនុញ្ញាតឲ្យរដ្ឋអំណាចចាត់វិធានការបង្ការទុកមុនជាលើកទី១។ គួរជម្រាបជូនថា ប្រព័ន្ធប្រកាសអាសន្នស្តីពីកម្រិតផ្សែងពុលក្នុងបរិយាកាសត្រូវបានបង្កើតឲ្យមានឡើងក្នុងឆ្នាំ ២០១៣ និងដែលធ្លាប់បានប្រើប្រាស់លើកទី១កាលពីថ្ងៃទី៧ ធ្នូកន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ