នៅរុស្ស៊ី ប្រធានាធិបតីចិននឹងលើកនិយាយពីការគំរាមកំហែងរបស់ក្រុមជីហាតរដ្ឋអ៊ីស្លាម
ប្រធានាធិបតីចិន លោកស៊ី ជីនពីងនឹងធ្វើដំណើរទៅចូលរួមជំនួបកំពូលនៃអង្គការដើម្បីសហប្រតិបត្តិការសៀងហៃ (OCS) ដែលនឹងបើកធ្វើ នៅថ្ងៃ ព្រហស្បតិ៍ និងថ្ងៃសុក្រ ទី ១០កក្កដា នៅ ទីក្រុងអ៊ូហ្វា Oufa ប្រទេសរុស្ស៊ី។ នៅក្នុងជំនួបជាមួយប្រធានាធិបតីរុស្ស៊ី និងមេដឹកនាំរបស់ប្រទេស ៤ផ្សេងទៀត លោកប្រធានាធិបតីចិន នឹងលើកនិយាយពីគ្រោះថ្នាក់ គំរាមកំហែងរបស់ក្រុមជីហាត នៃអង្គការរដ្ឋអ៊ីស្លាម នៅក្នុងប្រទេសអាហ្វហ្កានីស្ថាន ដែលមានព្រំដែនជាប់ជាមួយ ប្រទេសសមាជិក៣ របស់អង្គការ(OCS) ដែលក្នុងនោះមានផងដែរ ប្រទេសចិន។
ចុះផ្សាយនៅថ្ងៃ៖ កែប្រែថ្ងៃទី៖
ក្នុងចំណោមប្រទេស សមាជិកទាំង ៦របស់អង្គការដើម្បីសហប្រតិបត្តិការសៀងហៃ ដែលមាន ចិន រុស្ស៊ី អ៊ូសបេគីស្ថាន កៀហ្ស៊ីស៊ីស្ថាន តាហ្ស៊ីគីស្ថាន និងកាហ្សាក់ស្ថាន មានប្រទេសបី ដែលមានព្រំដែនជាប់ជាមួយអាហ្វហ្កានីស្ថាន។
ចិន ដែលមានជាប់ព្រំដែនមួយចំណិតតូច ជាមួយអាហ្វហ្កានីស្ថាន បានចាប់ផ្តើមលើកនិយាយពីគ្រោះថ្នាក់របស់ក្រុមជីហាតរដ្ឋអ៊ីស្លាម បន្ទាប់ពីឃើញ ក្រុមនេះ ចាប់លេចមុខ នៅអាហ្វហ្កានីស្ថាន ប្រទេសជិតខាងរបស់ចិន។ ទីក្រុងបារម្ភខ្លាចក្រែងថា ក្រុមជីហាតនឹងអាចឆ្លងចេញពីអាហ្វហ្កានីស្ថាន ទៅបង្កអសន្តិសុខ នៅខេត្តស៊ីនជាំង ដែលមានព្រំដែនជាប់នឹងអាហ្វហ្កានីស្ថាន។
នៅក្នុងសន្និសីទកាសែតកាលពីថ្ងៃចន្ទ អនុរដ្ឋមន្រ្តីការបរទេសចិន លោកឆេង ហ្គួរភីង បាននិយាយថា ការគំរាមកំហែង របស់ក្រុមជីហាតរដ្ឋអ៊ីស្លាម នៅក្នុងប្រទេសអាហ្វហ្កានីស្ថាន គឺជាប្រធានរឿងសំខាន់ ដែលលោកប្រធានាធិបតីចិន ស៊ី ជីនពីង នឹងលើកយកទៅនិយាយនៅក្នុងជំនួបកំពូលនៃអង្គការដើម្បីសហប្រតិបត្តិការសៀងហៃ ដែលត្រូវរៀបចំធ្វើនៅក្នុងប្រទេសរុស្ស៊ី នៅថ្ងៃព្រហស្បតិ៍ និងថ្ងៃសុក្រខាងមុខ។
សូមបញ្ជាក់ថា កាលពីខែមិថុនាកន្លងទៅ ក្រុមតាលីបង់បានព្រមានរួចហើយ កុំឲ្យក្រុមជីហាត នៃអង្គការរដ្ឋអ៊ីស្លាម ចូលអុកឡុក ក្នុងដែនអំណាចរបស់ខ្លួន នៅអាហ្វហ្កានីស្ថាន។ ប៉ុន្តែ ថ្មីៗនេះ ជនប្រដាប់អាវុធមួយចំនួនរបស់ក្រុមតាលីបង់ បានប្រកាសចុះចូល ភ្ជាប់ខ្លួនជាមួយក្រុមជីហាតរដ្ឋអ៊ីស្លាម ដែលកំពុងពង្រីកឥទ្ធិពលអំណាចនៅស៊ីរី និងអ៊ីរ៉ាក់។ តាមអ្នកវិភាគ ពួកចលនាអ៊ីស្លាម តៀរកេស្ថាន ដែលប៉េកាំងចោទថា អ្នកចូលទៅ ធ្វើភេរវកម្មក្នុងខេត្តស៊ីនជាំង ក្នុងប្រទេសចិន ទំនងជាបានចុះចូលជាមួយ ក្រុមជីហាតនៃអង្គការរដ្ឋអ៊ីស្លាម។ ទីក្រុងប៉េកាំងខ្លាចថា ក្រុមនេះនឹងមានកម្លាំងទៅ បង្កអំពើហិង្សា ក្នុងទឹកដីចិន។ តាមអនុរដ្ឋមន្រ្តីការបរទេសចិន ទីក្រុងបារម្ភពីរឿងនេះ និងចង់ពង្រឹងឲ្យកាន់ខ្លាំង ការសហការផ្នែកសន្តិសុខ តាមព្រំដែន ជាមួយប្រទេសជិតខាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ