រដ្ឋមន្រ្តីក្រសួងហិរញ្ញវត្ថុ Apec សន្យាមិនប្រើនយោបាយរូបិយប័ណ្ណជាតិដើម្បីប្រកួតប្រជែង
វេទិកានៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិកហៅកាត់ថា Apec ដែលចូលរួមដោយរដ្ឋមន្រ្តីក្រសួងហិរញ្ញវត្ថុបានបិទបញ្ចប់កិច្ចប្រជុំរយៈពេល ២ថ្ងៃនៅក្នុងទីក្រុងសេប៊ូ ប្រទេសហ្វីលីពីននាថ្ងៃសុក្រ ទី១១ កញ្ញា។ នៅក្នុងសេចក្តីជូនដំណឹងរួមមួយចេញផ្សាយនៅក្នុងថ្ងៃបញ្ចប់កិច្ចប្រជុំ សមាជិកទំាង ២១ប្រទេសរបស់ Apec ដែលមានចិន និងអាមេរិកបានសន្យាមិនអនុវត្តន៍នយោបាយរូបិយប័ណ្ណជាតិដើម្បីប្រកួតប្រជែងទេ។ ការប្តេជ្ញានេះបានធ្វើឡើង ចំពេលដែលកំណើនសេដ្ឋកិច្ចក្នុងលោកកំពុងទ្រឹងមួយកន្លែង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
អ្វីជាការកត់សម្គាល់ដំបូងនៅក្នុងកិច្ចប្រជុំថ្នាក់រដ្ឋមន្រ្តីក្រសួងហិរញ្ញវត្ថុរបស់ Apec រយៈពេល ២ថ្ងៃក្នុងប្រទេសហ្វីលីពីននោះ គឺអវត្តមានលោករដ្ឋមន្រ្តីក្រសួងហិរញ្ញវត្ថុចិន លូ យីវ៉េ សមភាគីអាមេរិកំាងលោកជែក លូ ព្រមទំាងសមភាគីជប៉ុនលោកតារ៉ូ អាសូ។ ប្រទេសសំខាន់ទំាង ៣ នេះបានបញ្ជូនត្រឹមអ្នកតំណាងរបស់ខ្លួនឲ្យចូលរួមប៉ុណ្ណោះ។ ចំណែកប្រធានបទអាទិភាពដែលបានគ្របដណ្តប់នៅក្នុងកិច្ចប្រជុំ និងដែលគ្រប់ភាគីមិនអាចលាក់កំបំាងពីក្តីបារម្ភរបស់ខ្លួននោះ គឺស្ថានភាពសុខភាពសេដ្ឋកិច្ចចិនមិនសូវល្អដែលកំពុងជះឥទ្ធិពលដល់កំណើនសេដ្ឋកិច្ចក្នុងលោក។
គួររម្លឹកជូនថានៅក្នុងខែសីហាកន្លងទៅថ្មីៗនេះ រដ្ឋាភិបាលចិនបានបញ្ចុះតម្លៃប្រាក់យ័នរបស់ខ្លួនយ៉ាងគំហុកដើម្បីជួយផ្តល់សន្ទុះកំណើនសេដ្ឋកិច្ចដែលកំពុងរអិលថយក្រោយ។ ទង្វើរបស់ក្រុងប៉េកំាងកាលណោះបានធ្វើឲ្យតម្លៃភាគហ៊ុននៅទីផ្សារភាគហ៊ុនក្នុងលោកធ្លាក់ថ្លៃយ៉ាងខ្លំាង មុននឹងត្រឡប់មករកភាពប្រក្រតីឡើងវិញនៅពេលនេះ។ តែចិនបានចេញមុខអះអាងថា គោលដៅនៃការបញ្ចុះតម្លៃប្រាក់យ័នរបស់ខ្លួនគឺដើម្បីសម្របទៅតាមអត្រាប្តូរប្រាក់នៅលើទីផ្សារ។ តែដើម្បីបញ្ជៀសការនិយាយដៀមដាមដាក់ចិន កិច្ចប្រជុំមិនលើកឡើងចំៗពីការដែលចិនបានលូកដៃអន្តរាគមន៍លើប្រាក់យ័នរបស់ខ្លួនទេ។
នៅទីបំផុត កិច្ចប្រជុំបានចេញផ្សាយនូវសេចក្តីជូនដំណឹងរួមមួយដោយសន្យាចៀសវាងមិនធ្វើអន្តរាគមន៍លើតម្លៃរូបិយប័ណ្ណជាតិដើម្បីប្រជែងគ្នា ព្រមទំាងមិនចាត់វិធានការទំាងឡាយណាដែលមានលក្ខណៈអាត្មានិយម។ ទន្ទឹមគ្នានេះ កិច្ចប្រជុំក៏បានសន្យាបន្តពង្រឹងកំណើនសេដ្ឋកិច្ច និងរក្សាស្ថិរភាពហិរញ្ញវត្ថុនៅក្នុងតំបន់អាស៊ីប៉ាស៊ីហ្វិកដែរ។ គួររម្លឹកជូនថា សមាជិកទំាង ២១ប្រទេសរបស់ Apec តំណាងឲ្យ ៥៧% នៃផលិកម្មពិភពលោក និងជិត ៥០% នៃពាណិជ្ជកម្មក្នុងលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ