តុលាការជប៉ុនទាត់ចោលសំណើបើកឲ្យដំណើរការរោងចក្រនុយក្លេអ៊ែរ
តុលាការខេត្តជប៉ុននៅថ្ងៃអង្គារទី ១៤ មេសា បានបដិសេធមិនឲ្យគេដាក់ឲ្យដំណើរការឡើងវិញ រោងចក្រនុយក្លេអ៊ែរ ពីរកន្លែង នៅប៉ែកខាងលិចប្រទេសជប៉ុន នោះ បើទោះជា អាជ្ញាធរផ្នែកសុវត្ថិភាពនុយក្លេអ៊ែរជប៉ុន បានបញ្ជាក់ ធានាពីសន្តិសុខរបស់រោងចក្រទាំងពីរកន្លែងក្តី។
ចុះផ្សាយនៅថ្ងៃ៖
តាមសេចក្តីសម្រេចរបស់តុលាការខេត្ត Fukui ដែលស្ថិតនៅភាគខាងលិចប្រទេសជប៉ុន នៅមានលក្ខខណ្ឌខ្វះខាត ដែលមិនអាចឲ្យគេបើកប្រើរោងចក្រនុយក្លេអ៊ែរ តាកាហាម៉ា ទី ៣ និងទី ៤។ រោងចក្រនុយក្លេអ៊ែរទាំងពីរនេះធ្លាប់បានទទួលអាជ្ញាបណ្ណ ពីអាជ្ញាធរខាងសុវត្ថិភាពជប៉ុន ឲ្យបើកដំណើរការឡើងវិញ។ ប៉ុន្តែ ប្រជាជននៅក្នុងខេត្ត Fukui បានដាក់ពាក្យបណ្តឹង សុំអន្តរាគមន៍ពីតុលាការ។
អង្គការបរិស្ថាន Green Peaceបានស្វាគមការសម្រេចរបស់ចៅក្រម ដែលបានគិតគូរ ដល់អាយុជីវិត ប្រជាជន ជប៉ុនរាប់លាននាក់ នៅរស់នៅក្បែររោងចក្រនុយក្លេអ៊ែរទាំងពីរ។ ចៅក្រម របស់តុលាការខេត្ត Fukui បានបដិសេធមិនឲ្យគេបើកដំណើរការរោងចក្រដើរដោយនុយក្លេអ៊ែរ ឈ្មោះ តាកាហាម៉ា ទី ៣ និងទី ៤ នោះបើទោះជា រោងចក្រទាំងពីរត្រូវបានអាជ្ញាធរខាងសុវត្ថិភាព បានបញ្ជាក់ថា រោងចក្រនុយក្លេអ៊ែរ តាកាហាម៉ា មានហេដ្ឋារចនាសម្ព័ន្ធ រឹងមាំ អាចទប់ទល់នឹងការគំរាមកំហែងនៃគ្រោះធម្មជាតិ ដូចជាគ្រោះរញ្ជួយដី គឺមិនដូច នៅហ្វូគូស្ហ៊ីម៉ានោះទេ។ ក្រុមហ៊ុនអគ្គិសនី កង់សៃ ដែលជាម្ចាស់រោងចក្រនុយក្លេអ៊ែរ តាកាហាម៉ា ទី ៣ និងទី ៤ បានប្រកាសរួចហើយថា នឹងធ្វើបណ្តឹងឧទ្ធរណ៍ នៅក្រោយការសម្រេចរបស់តុលាការខេត្ត។
ការឆេះរោងចក្រនុយក្លេអ៊ែរ ដោយសារគ្រោះរញ្ជួយដីនៅខេត្តហ្វូគូស៊្ហីម៉ា នៅឆ្នាំ ២០១១ បានតម្រូវឲ្យរដ្ឋាភិបាលប្រកាសបិទ ផ្អាក មិនដំណើរការរោងចក្រនុយក្លេអ៊ែរទាំង៤៨នៅក្នុងប្រទេស។ រដ្ឋាភិបាលរបស់ស៊ីនហ្សូ អាបេ ដែលលែងចង់ចំណាយថវិកាច្រើនដើម្បីទិញប្រេងពីបរទេស មកផ្គត់ផ្គង់តម្រូវការសេដ្ឋកិច្ចក្នុងស្រុក បានបង្ហាញចេតនាចង់ ដាក់ឲ្យដំណើរការរោងចក្រនុយក្លេអ៊ែរឡើងវិញ។ ប៉ុន្តែ បើទោះជារដ្ឋាភិបាលគាំទ្រចង់ឲ្យប្រើរោងចក្រនុយក្លេអ៊ែរ និងការបញ្ជាក់សុវត្ថិភាពពីខាងអាជ្ញាធរមានសមត្ថកិច្ច ការដាក់ឲ្យដំណើរការរោងចក្រនុយក្លេអ៊ែរ នៅតែបញ្ហាចម្រូងចម្រាស និងតវ៉ាប្រឆាំង ពីអាជ្ញាធរថ្នាក់មូលដ្ឋាន ក៏ដូចជា ក្រុមអ្នកបរិស្ថាន និងប្រជាជនជប៉ុន ដែលមិនចង់ជួបរងគ្រោះដោយសារការឆេះរោងចក្រនុយក្លេអ៊ែរ ដូចប្រជាជននៅខេត្តហ្វូគូស៊្ហីម៉ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ