វៀតណាម៖កំណើនសេដ្ឋកិច្ចឆ្នាំ ២០១៥ គឺប្រសើរជាង ៥ឆ្នាំកន្លងទៅ
ប្រទេសវៀតណាមបានបិទបញ្ចប់ឆ្នាំ ២០១៥ ដោយទទួលបានកំណើនសេដ្ឋកិច្ចចំនួន ៦,៦៨%។ កំណើនសេដ្ឋកិច្ច ៦,៦៨% គឺជាអត្រាមួយដ៏ខ្ពស់ដែលវៀតណាមមិនធ្លាប់ទទួលបានទេ បើគិតក្នុងរយៈពេល ៥ឆ្នាំកន្លងទៅ។ ប្រភពនៃកំណើនសេដ្ឋកិច្ចខ្ពស់ត្រូវបានរដ្ឋាភិបាលអះអាងថា បានមកពីការកើនឡើងនៅក្នុងវិស័យនាំចេញ និងកំណើននៃការចាយវាយរបស់ពលរដ្ឋវៀតណាមក្នុងស្រុក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
ចំពេលដែលបរិបទសេដ្ឋកិច្ចពិភពលោកទូទៅកំពុងបន្តទ្រឹងមួយកន្លែងពេញមួយឆ្នាំ ២០១៥ វៀតណាមទទួលបានកំណើនសេដ្ឋកិច្ចលើសពីកម្មវត្ថុដែលខ្លួនបានកំណត់។ ៦,៦៨% គឺជាអត្រាមួយដ៏ខ្ពស់បើគិតក្នុងរយៈពេល ៥ឆ្នាំកន្លងទៅ។ តែអ្វីដែលគួរឲ្យកត់សម្គាល់នោះ គឺកំណើនសេដ្ឋកិច្ចដែលវៀតណាមទទួលបានតិច ឬច្រើនជាបន្តបន្ទាប់ ពោល ៥,៤២% ក្នុងឆ្នាំ ២០១៣ និង ៥,៩៨% ក្នុងឆ្នាំ ២០១៤។ លោកង្វៀន ប៊ិចឡាម នាយកសិក្សាស្ថិតិបានថ្លែងសាទរនៅក្នុងសន្និសីទកាសែតនាថ្ងៃសៅរ៍នេះថា អត្រាកំណើនសេដ្ឋកិច្ចដែលវៀតណាមទទួលបានក្នុងឆ្នាំ ២០១៥ នេះ គឺជាសញ្ញាវិជ្ជមានមួយយ៉ាងសំខាន់សម្រាប់សេដ្ឋកិច្ចវៀតណាមនាឆ្នាំខាងមុខ ពិសេសនៅក្នុងបរិបទនៃការធ្លាក់ថ្លៃតម្លៃប្រេងឆៅ និងអស្ថិរភាពនៃស្ថានភាពទីផ្សារហិរញ្ញវត្ថុអន្តរជាតិ។
យោងតាមលោកង្វៀន ប៊ិចឡាម តម្លៃប្រេងធ្លាក់ថ្លៃនៅលើទីផ្សារអន្តរជាតិបានផ្តល់អំណោយផលឲ្យវៀតណាមយ៉ាងខ្លាំងក្នុងនាមជាប្រទេសដែលបាននំាប្រេងចូលច្រើនជាងគេ។ ចំណែកកត្តាសំខាន់ផ្សេងទៀតដែលបានជម្រុញឲ្យវៀតណាមទទួលបានកំណើនសេដ្ឋកិច្ចខ្ពស់ គឺការកើនឡើងនៅក្នុងវិស័យនាំចេញ និងការកើនឡើងនៃតម្រូវការក្នុងស្រុក។ ថ្មីៗនេះ លោកស្រីនាយិការធនាគារពិភពលោកប្រចំាវៀតណាមវ៉ិចតូរីយ៉ា ក្វាក្វាបានយល់ឃើញថា កំណើនវិស័យនាំចេញ កំណើនតម្រូវការក្នុងស្រុក អត្រាអតិផរណាទាប និងការបង្កើនសេចក្តីទុកចិត្តបានអនុញ្ញាតឲ្យវៀតណាមបង្កើតចេញនូវមូលដ្ឋានរឹងមាំសម្រាប់កំណើនសេដ្ឋកិច្ចក្នុងរយៈពេលខ្លី។
កំណើនសេដ្ឋកិច្ចប្រសើររបស់វៀតណាមពេលនេះបានកើតមានឡើង ចំពេលដែលគណបក្សកុម្មុយនិស្តត្រៀមរៀបចំសមាជរបស់ខ្លួននៅក្នុងខែមករា ឆ្នាំ ២០១៦ ដើម្បីផ្លាស់ប្តូរថ្នាក់ដឹកនាំថ្មី។ ទន្ទឹមគ្នានេះ រដ្ឋាភិបាលក៏កំពុងព្យាយាមធ្វើមហាកំណែទម្រង់វិស័យសាធារណៈរបស់ខ្លួនដែលកំពុងស្គាល់វិបត្តិបំណុល និងរឿងអាស្រូវពុករលួយ។ ក្រុមអ្នកជំនាញបានយល់ឃើញថា គឺវិស័យសាធារណៈបច្ចុប្បន្ននេះហើយដែលជាឧបសគ្គក្នុងការអភិវឌ្ឍន៍ប្រទេសសម្រាប់រយៈពេលវែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ