គ្រោះរញ្ជួយដីនេប៉ាល់៖ប្រជាជនកំពុងព្រួយបារម្ភពីការកកើតជម្ងឺឆ្លងនានា
នៅប្រទេសនេប៉ាល់ ជិតមួយសប្តាហ៍ ក្រោយគ្រោះរញ្ជួយដីកាលពីថ្ងៃសៅរ៍ ទី២៥ មេសាកន្លងមក ក្តីសង្ឃឹមនៃការស្វែងអ្នករស់រានមានជីវិតកាន់តែស្តួចស្តើងទៅៗ។ រដ្ឋាភិបាលបារំាងបានប្រាប់ឲ្យដឹងពីការបាត់ដំណឹងពលរដ្ឋរបស់ខ្លួនចំនួន ១៥៩នាក់នៅក្នុងប្រទេសនេប៉ាល់ និងមានប្រជាជនអឺរ៉ុបប្រមាណជា ១ ០០០នាក់ផ្សេងទៀតកំពុងបាត់ខ្លួន។ តុល្យការបណ្តោះអាសន្នចុងក្រោយនៃចំនួនមនុស្សស្លាប់មានជាង ៦ ២០០នាក់។ នៅក្នុងទីក្រុងកដ្ឋមណ្ឌូ រដ្ឋាភិបាលនេប៉ាល់ និងអង្គការក្រៅរដ្ឋាភិបាលនានាកំពុងបារម្ភខ្លំាងពីហានិភ័យនៃការឆ្លងរាតត្បាតនៃជម្ងឺអាសន្នរោគ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
វិធានការរបស់រដ្ឋាភិបាលនេប៉ាល់ក្នុងការប្រឈមទប់នឹងបញ្ហាកង្វះអនាម័យ និងជម្ងឺឆ្លងរាតត្បាតនៅមានកម្រិតស្តួងស្តើង។ នៅចំពោះមុខ និងដោយខ្វះលទ្ធភាព រដ្ឋាភិបាលបានត្រឹមតែផ្សព្វផ្សាយសារ និងដំបូលន្មានខ្លះៗដល់ប្រជាជន មានដូចជា ត្រូវលាងដៃឲ្យបានញឹកញាប់ ពិសេសមុននឹងទទួលទានអាហារ ឬមួយក៏ឧស្សាហ៍សំអាតបង្គន់ជាដើម។ ក៏ប៉ុន្តែ ដំបូលន្មានទំាងនេះហាក់ដូចជាមិនសូវគ្មានប្រសិទ្ធិភាពប៉ុន្មានទេ ព្រោះប្រជាជនភាគច្រើនគ្មានទឹកស្អាតប្រើប្រាស់។ ម្យ៉ាងទៀត ការចែកចាយទឹកស្អាតរៀបចំដោយរដ្ឋអំណាចក៏នៅមិនទាន់គ្រប់គ្រាន់អាចឆ្លើយតបតាមតម្រូវការរបស់ប្រជាជនបានដែរ ពិសេសប្រជាជនរស់នៅក្នុងទីក្រុងកដ្ឋមណ្ឌូដែលប្រព័ន្ធទឹកបានទទួលរងការខូតខាតយ៉ាងដំណំពីគ្រោះរញ្ជួយដី។
វិធានការមួយទៀតរបស់រដ្ឋាភិបាល គឺការដាក់ថ្នំាសម្លាប់មេរោគនៅតាមថ្លុកទឹកដែលពេលខ្លះមានសាកសពមនុស្ស និងសត្វជាប់គំាងដោយគំនរបាក់បែកនៅក្នុងថ្លុកទឹកទំាងនោះ។ វិធានការបោសសំអាតសាកសពមនុស្ស ឬក៏សត្វនេះក៏នៅមិនគ្រប់គ្រាន់ដែរ ព្រោះជាទូទៅ គឺប្រជាជនទេដែលបាននំាគ្នាធ្វើខ្លួនឯងដោយយកសាកសពទំាងនោះទៅកប់ដោយពួកគេមិនអាចទ្រំាទ្រនឹងក្លិនដ៏អាសោចបាន។ អ៊ីចឹងហើយបានជាប្រជាជនមិនញញើតនឹងបរិហារពីកង្វះឆន្ទៈ ឬពីការធ្វើព្រងើយកន្តើយរបស់រដ្ឋអំណាចប្រឈមនឹងហានិភ័យដែលនឹងអាចបង្កចេញជាជម្ងឺឆ្លងផ្សេងៗដោយកង្វះអានាម័យ ពិសេសកង្វះទឹកស្អាតប្រើប្រាស់។ ជម្ងឺឆ្លងរាតត្បាតដែលគ្រប់គ្នាកំពុងបារម្ភខ្លំាងជាងគេនោះ គឺរាករូស និងអាសន្នរោគ។
ជិតមួយសប្តាហ៍ ក្រោយគ្រោះរញ្ជួយដីមក ក្តីសង្ឃឹមនៃការស្វែងអ្នករស់រានមានជីវិតកាន់តែស្តួចស្តើង ហើយតុល្យការបណ្តោះអាសន្នចុងក្រោយនៃចំនួនមនុស្សស្លាប់មានជាង ៦ ០០០នាក់។ អឺរ៉ុបកំពុងស្វែងរកពលរដ្ឋរបស់ខ្លួនប្រមាណជា ១ ០០០នាក់ដែលកំពុងបាត់ខ្លួននៅនេប៉ាល់ ចំណែកបារំាងបានប្រាប់ឲ្យដឹងថា ខ្លួនកំពុងបាត់ដំណឹងសូន្យឈឹងពីពលរដ្ឋរបស់ខ្លួនចំនួន ១៥៩នាក់នៅក្នុងប្រទេសនេប៉ាល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ