រញ្ជួយដីនេប៉ាល់ ៖ សហគមន៍អន្តរជាតិសស្រាក់សស្រាំផ្តល់ជំនួយមនុស្សធម៌និងស្បៀងអាហារ
ចំនួនជនរងគ្រោះ បានកើនឡើងឥតឈប់ នៅនេប៉ាល់ ! បីក្រោយការរញ្ជួយដី សហគមន៍អន្តរជាតិទាំងមូល បានបង្ហាញសាមគ្គីភាព យ៉ាងសស្រាក់សស្រាំចូលជួយនេប៉ាល់។ ប្រទេសជិតឆ្ងាយ ជាប់របង ឬរំលងសមុទ្ទ ប្រទេសតូចប្រទេសធំ អង្គការក្រៅរដ្ឋាភិបាល អង្គការសហប្រជាជាតិ ខ្លះបញ្ជូនអ្នកបច្ចេកទេស ខ្លះជាសម្ភារៈ ទៅជួយដល់កន្លែងរងគ្រោះ។ ខ្លះបានបញ្ចេញជំនួយហិរញ្ញវត្ថុ និងខ្លះទៀតកំពុងបើកប្រតិបត្តិការប្រមូលស្បៀងអាហារ និងគិតគូរជាស្រេចអំពីការស្ថាបនានេប៉ាល់ឡើងវិញ ក្រោយគ្រោះមហន្តរាយ។
ចុះផ្សាយនៅថ្ងៃ៖
ស្តាប់ - ០១:៥៨
ក្នុងចំណោមក្រុមអ្នកសង្គ្រោះបរទេសដែលមកដល់ក្រុងកដ្ឋមណ្ឌូមុនគេ គឺក្រុមសង្គ្រោះនិងពេទ្យ របស់ចិន ជាអ្នកជិតខាង ដែលត្រូវជ្រែងជើងជួយពីរទិស ព្រោះថាការរញ្ជួយដីនៅនេប៉ាល់នេះ បានអង្រួញ និងបង្កគ្រោះថ្នាក់ដល់តំបន់ទីបេ (មានស្លាប់ជាង២០នាក់ ខូចខាតផ្ទះសម្បែងជាង១ម៉ឺនខ្នង ដាច់ភ្លើង បាក់ដី)។ ក្រុមអ្នកសង្គ្រោះបារាំង កូរ៉េខាងត្បូង អាមេរិក ម៉ាឡេស៊ី ក៏បានមកដល់ជាបន្ទាប់នៅថ្ងៃចន្ទនេះ។ ក្រុមជំនាញនេះមានជំនួយពីសត្វឆ្កែ កំពុងស្វែងរកជនរងគ្រោះក្នុងបំបែកថ្ម បំបែកដី។
ប្រសាសន៍របស់លោកឡូរ៉ង់ ហ្វប៊្យូស រដ្ឋមន្ត្រីការបរទេសបារាំង
ក្រៅអំពីជំនួយសង្គ្រោះបន្ទាន់ នេប៉ាល់ការជម្រក ថ្នាំ និងស្បៀងអាហារសម្រាប់អ្នករួចពីស្លាប់។ ហេតុដូច្នេះហើយបានជាបណ្តាប្រទេសផ្សេងៗទៀត ដូចជា ឥណ្ឌា ឥណ្ឌូណេស៊ី ស្រីលង្កា រុស្ស៊ី បានប្រកាសផ្តល់ជំនួយសម្ភារៈ ភួយ តង់ ទឹក ជាក្រុមគ្រូពេទ្យ។ ចំណែក នូវែលសេឡង់ (១លាន) អូស្ត្រាលីនិងកាណាដា (៥ម្នាក់ៗលានដុល្លារ) សហភាពអឺរ៉ុប (បីលានអឺរ៉ូ) អង់គ្លេស(៥លានលីវ) ។ល។ និង។ល។ បានផ្តល់ជំនួយហរិញ្ញវត្ថុ ដោយផ្ទាល់ ឬតាមរយៈអង្គការមនុស្សធម៌ សម្រាប់ឆ្លើយតបទៅនឹងតម្រូវការបន្ទាន់របស់ពលរដ្ឋនេប៉ាល់។ អ៊ីស្រាអែលបានបញ្ជូនជំនួយការយោធាដើម្បីវាយតម្លៃសេចក្តីត្រូវការជាក់ស្តែង។
ក្រុមអង្គការក្រៅរដ្ឋាភិបាល អង្គការយូនីសេហ្វព្រមទាំងអង្គការមនុស្សធម៌ផ្សេងទៀត បាននាំគ្នាប្រមូលជំនួយ និងបញ្ជូនទាំងយន្តហោះៗសំដៅឆ្ពោះទៅកាន់ក្រុងកដ្ឋមណ្ឌូ ដែលអង្គការស្បៀងអាហារពិភពលោករបស់អង្គការសហប្រជាជាតិ សន្យាថាប្រតិបត្តិការដ៏ធំ។ យន្តហោះដឹកជំនួយមនុស្សធម៌ដំបូងអាចនឹងទៅដល់នេប៉ាល់នៅអង្គារនេះតែម្តង។
អង្គការសហប្រជាជាតិ ក៏បានបើកមូលនិធិមួយដើម្បីប្រមូលជំនួយ សម្រាប់ជួយពលរដ្ឋនេប៉ាល់។ តាមរូបភាពផ្កាយរណប រញ្ជួយដីកម្រិត ៧,៨រីស្ទែរ ប៉ះចំតំបន់កសិកម្មដែលមានប្រជាជនរស់នៅប្រមាណពី២ទៅបីលាននាក់។ អង្គការសុខភាពពិភពលោកវិញបានចាប់ផ្តើមផ្តល់ចែកចាយជំនួយជាថ្នាំសង្កូវ ដែលអាចធានាតម្រូវការដល់ជនរងគ្រោះប្រមាណម៉ឺននាក់សម្រាប់រយៈពេលបីខែ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ