ការជួញដូរមនុស្ស៖ ប៉ូលិសថៃរកឃើញរណ្តៅសាកសព៥ទៀតនៅក្នុងព្រៃ
ប៉ូលិសថៃ ដែលកំពុងស៊ើបអង្កេតលើរណ្តៅសាកសពជនអន្តោប្រវេសន៍ខុសច្បាប់រងគ្រោះដោយការជួញដូរមនុស្ស ទើបនឹងបានរកឃើញរណ្តៅសាកសពចំនួន ៥ផ្សេងទៀត នៅប៉ែកខាងត្បូងប្រទេស មិនឆ្ងាយប៉ុន្មានពីរណ្តៅចាស់។ ក្នុងពេលជាមួយគ្នា ប៉ូលិសថៃក៏បានប្រកាសឲ្យដឹងផងដែរថា គេបានចាប់ខ្លួនជនសង្ស័យចំនួន ៤នាក់ ដែលជាប់ពាក់ព័ន្ធនឹងបណ្តាញជួញដូរមនុស្ស។
ចុះផ្សាយនៅថ្ងៃ៖
យោងតាមប៉ូលិសថៃ រណ្តៅសាកសពថ្មីៗចំនួន ៥ ត្រូវបានគេរកឃើញ កាលពីល្ងាចថ្ងៃចន្ទ ហើយរណ្តៅថ្មីៗនេះ ស្ថិតនៅចម្ងាយប្រមាណជា ១គីឡូម៉ែត្រពីរណ្តៅទីមួយ ដែលគេរកឃើញសាកសព២៦នាក់ កាលពីចុងសប្តាហ៍មុន។ ក៏ប៉ុន្តែ ប៉ូលិសបានបញ្ជាក់បន្ថែមថា រហូតមកទល់នឹងពេលនេះ គេនៅមិនទាន់ដឹងច្បាស់នៅឡើយទេថា តើរណ្តៅទាំង ៥ ដែលគេទើបនឹងរកឃើញក្រោយនេះ មានសាកសពនៅក្នុងនោះដែរឬអត់?
ទីតាំងដែលគេរកឃើញរណ្តៅសាកសពទាំងនេះ ស្ថិតនៅក្នុងព្រៃ ក្បែរព្រំដែន រវាងថៃ និងម៉ាឡេស៊ី ដែលជាច្រកចេញចូលដ៏សំខាន់នៃការជួញដូរមនុស្ស។ អាជ្ញាធរថៃធ្លាប់បានឲ្យដឹងថា សាកសពទាំង ២៦ ដែលគេរកឃើញ កាលពីចុងសប្តាហ៍កន្លងទៅនេះ ប្រហែលជាសាកសពជនអន្តោប្រវេសន៍ខុសច្បាប់មកពីភូមា និងបង់ក្លាដែស ហើយដែលត្រូវធ្លាក់ខ្លួនជាជនរងគ្រោះរបស់បណ្តាញជួញដូរមនុស្ស។
កាលពីថ្ងៃចន្ទម្សិលមិញ ប៉ូលិសថៃបានប្រកាសឲ្យដឹងថា ក្រោយពីគេរកឃើញរណ្តៅសាកសពជនអន្តោប្រវេសន៍ អាជ្ញាធរបានបើកការស៊ើបអង្កេត ហើយឈានទៅចាប់ខ្លួនមនុស្ស ៤នាក់ ដែលជាប់សង្ស័យថាពាក់ព័ន្ធនឹងបណ្តាញជួញដូរមនុស្ស។ ជនសង្ស័យទាំង ៤នាក់នេះ មានម្នាក់ គឺជាជនជាតិភូមា ចំណែកឯ ៣នាក់ទៀត គឺជាមន្រ្តីរដ្ឋបាលមូលដ្ឋានក្នុងខេត្តសុងខ្លាប្រទេសថៃ គឺម្នាក់ជាសមាជិកក្រុមប្រឹក្សាឃុំ និងពីរនាក់ទៀតជាអនុប្រធានភូមិ។
គួរបញ្ជាក់ថា កាលពីពេលកន្លងមក មានអង្គការការពារសិទ្ធិមនុស្សជាច្រើនតែងតែបានរិះគន់អាជ្ញាធរថៃថាបានបិទភ្នែកធ្វើគធ្វើថ្លង់ បណ្តោយឲ្យក្រុមឧក្រិដ្ឋជនជួញដូរមនុស្សធ្វើសកម្មភាពស្រេចតែអំពើចិត្ត ដោយពេលខ្លះថែមទាំងមានការឃុបឃិតពីសំណាក់អាជ្ញាធរថែមទៀតផង។ សហរដ្ឋអាមេរិក ដែលជាសម្ព័ន្ធមិត្តរបស់ថៃ ក៏ធ្លាប់បានចេញរបាយការណ៍បរិហារិះគន់ក្រុងបាងកកយ៉ាងចាស់ដៃផងដែរ កាលពីឆ្នាំទៅមិញ ទាក់ទងនឹងបញ្ហាជួញដូរមនុស្សនេះ។
ប្រឈមមុខនឹងកេរ្តិ៍ឈ្មោះអាក្រក់បែបនេះ និងជាពិសេស ដោយបារម្ភខ្លាចត្រូវទទួលទណ្ឌកម្មសេដ្ឋកិច្ចពីអាមេរិក របបសឹកថៃបានបើកប្រតិបត្តិការបង្រ្កាបបណ្តាញជួញដូរមនុស្ស រហូតឈានទៅចាប់ខ្លួនមន្រ្តីថៃជាច្រើនរូប កាលពីប៉ុន្មានខែមុន។ ក៏ប៉ុន្តែ ការរកឃើញរណ្តៅសាកសពជនអន្តោប្រវេសន៍នៅពេលនេះ កំពុងតែធ្វើឲ្យថៃត្រូវទទួលរងនូវការរិះគន់កាន់តែខ្លាំងឡើងថែមទៀត ដោយអង្គការសិទ្ធិមនុស្ស Human Rights Watch បានលើកឡើងថា បញ្ហាជួញដូរមនុស្សនៅថៃបានធ្លាក់ដល់ដំណាក់កាលមួយ ដែល “គ្រប់គ្រងលែងបាន” ហើយបានទាមទារឲ្យមានការស៊ើបអង្កេតអន្តរជាតិ ទៅលើករណីរកឃើញរណ្តៅសាកសពជនអន្តោប្រវេសន៍នៅថៃពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ