ថៃ៖ឧត្តមសេនីយ៍ម្នាក់ជាប់ចោទពីបទប្រមាថព្រះចេស្តា
នៅក្នុងប្រទេសថៃ ប៉ូលិសបានប្រកាសឲ្យដឹងនៅថ្ងៃព្រហស្បតិ៍ ទី២៦ វិច្ឆិកាថា ខ្លួនកំពុងតាមរកចាប់ខ្លួនឧត្តមសេនីយ៍យោធាម្នាក់ដែលជាប់ចោទពីបទប្រមាថព្រះចេស្តា។ នេះជាបទចោទប្រកាន់មួយដែលគេកម្រឃើញកើតមានលើមន្រ្តីស្ថាប័នកងទ័ពដែលជាស្ថាប័នស្មោះស្ម័គ្រនឹងរាជានិយម។ យ៉ាងណាក៏ដោយ អ្នកនាំពាក្យប៉ូលិសលោកចាយ៉ាពុង ឆាតឆាយដេមិនបានបញ្ជាក់លំអិតពីទង្វើប្រមាជព្រះចេស្តារបស់រូបឧត្តមសេនីយយោធានោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
គឺនៅក្នុងសន្និសីទកាសែតមួយក្នុងទីក្រុងបាងកកដែលអ្នកនាំពាក្យប៉ូលិសលោកចាយ៉ាពុង ឆាតឆាយដេបានប្រាប់ឲ្យដឹងថា មានឧត្តមសេនីយ៍យោធាម្នាក់ និងមន្រ្តីប៉ូលិសជាន់ខ្ពស់ពីរនាក់បានជាប់ចោទពីបទប្រមាថព្រះចេស្តា តែមិនបានលំអិតអ្វីឲ្យបានច្រើនជាងនេះទេ។ គួរជម្រាបជូនថាជាទូទៅ រឿងអាស្រូវប្រមាថរាជានិយមច្រើនតែកើតមានលើមនុស្សដែលជាក្រុមសកម្មជនរបស់បក្សប្រឆាំង ពិសេសក្រុមអ្នកស្មោះស្ម័គ្រនឹងលោកអតីតនាយករដ្ឋមន្រ្តីធ្លាក់ពីអំណាចថាក់ស៊ីន ស៊ីណាវ៉ាត់។ តែនារយៈពេលប៉ុន្មានខែចុងក្រោយ គេបានសង្កេតឃើញរឿងអាស្រូវដ៏រសើបមួយនេះបានប៉ះពាល់ដល់មនុស្សជំនិតនឹងព្រះបរមរាជវាំង និងឥឡូវបានឈានចូលដល់ស្ថាប័នកងទ័ពដែលគេស្គាល់ថា ជាស្ថាប័នស្មោះស័្មគ្រនឹងរាជានិយមជាងគេ។
មនុស្សជំនិតនឹងព្រះបរមរាជវាំងដែលបានជាប់ចោទក្នុងបទប្រមាថព្រះចេស្តានាប៉ុន្មានខែកន្លងទៅ គឺសមាជិកគ្រួសារសាច់ថ្លៃរបស់ព្រះអង្គម្ចាស់ម៉ាហា វ៉ាយីរ៉ាឡុងកនដែលទើបលែងលះគ្នា។ មានសមាជិកគ្រួសារសាច់ថ្លៃរបស់ព្រះអង្គម៉ាហាជាច្រើននាក់បានទទួលទោសជាប់ពន្ធនាគារពីបទបានឆ្លៀតប្រើខ្នងរាជានិយមដើម្បីប្រយោជន៍ហិរញ្ញវត្ថុផ្ទាល់ខ្លួន។ ក្នុងសំណុំរឿងប្រមាថព្រះចេស្តាដដែលនេះ មានបុរសពីរនាក់ ក្នុងនោះម្នាក់ជាមន្រ្តីប៉ូលិសជាន់ខ្ពស់ទើបបានចាប់ខ្លួន និងបញ្ជូនទៅកាន់តុលាការនាថ្ងៃព្រហស្បតិ៍ ទី២៦ វិច្ឆិកា។ បុរសទំាងពីររូបបានជាប់ចោទពីបទបញ្ជូនសារបរិហារកេរ្តិ៍នៅលើបណ្តាញសង្គម Facebook។
នៅប្រទេសណាមិនដឹងទេ តែបើនៅថៃ ទង្វើនិយាយប៉ះពាល់ដល់ក្រុមគ្រួសាររាជវង្សនឹងអាចដេកក្នុងគុកចំនួន ១៥ឆ្នំា។ នៅថ្ងៃពុធ ទី២៥ វិច្ឆិកា អាមេរិកតាមរយៈឯកអគ្គរដ្ឋទូតប្រចំាក្រុងបាងកកលោក Davies បានសម្តែងក្តីបារម្ភចំពោះទម្ងន់ទោសជាប់គុកក្នុងបទប្រមាថព្រះចេស្តា។ សម្រាប់លោក Davies គេមិនគួរចាប់មនុស្សញាត់គុកដោយសារតែពួកគេបានបញ្ចេញមតិយោបល់ដោយសន្តិវិធីនោះទេ។ អង្គការសហប្រជាជាតិក៏បានសម្តែងក្តីបារម្ភដូចគ្នាកាលពីខែសីហាកន្លងទៅ ពិសេសក្រោយពីមានការកាត់ទោសមនុស្សពីរឲ្យជាប់គុក ២៨ឆ្នាំ និង ៣០ឆ្នាំពីបទបានបោះផ្សាយសារនៅលើបណ្តាញសង្គម Facebook៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ