អ្នកជាប់ចោទជេរប្រមាថព្រះចេស្តាស្តេចស្លាប់ក្នុងពន្ធនាគារ អាជ្ញាធរយល់ថាធម្មតា
ក្នុងរយៈពេលតែពីរបីសប្តាហ៍សោះ មានករណីជនជាប់ឃុំឃាំងក្នុងពន្ធនាគារយោធា បានស្លាប់ ក្នុងគុកដល់ទៅពីករណី។ គ្រូទាយដ៏ល្បីល្បាញរបស់ថៃ ដែលត្រូវចាប់ខ្លួនពីបទប្រមាថព្រះមហាក្សត្រ កាលពីចុងខែតុលា បានស្លាប់ក្នុងបន្ទប់ឃុំឃាំង នៅថ្ងៃសៅរ៍កន្លងទៅ ប៉ុន្តែអាជ្ញាធរទើបជូនដំណឹងនៅថ្ងៃចន្ទនេះ និងអះអាងថាទោះមានករណីស្លាប់ញយដងក៏ដោយ ក៏មិនត្រូវការប្តូរផ្លាស់ដំណើរការពន្ធនាគារអ្វីទាំងអស់។
ចុះផ្សាយនៅថ្ងៃ៖
ស្តាប់ - ០២:១១
ស៊ូរីយ៉ង់ ស៊ូចារីផុលវ៉ង់ ហៅក្រៅម៉ យ៉ុង ហោរ៉ា ដ៏ល្បីល្បាញក្នុងកញ្ចក់ទូរទស្សន៍ និងជាទីប្រឹក្សារបស់តារាសិល្បៈថៃ បានស្លាប់បាត់បង់ជីវិតក្នុងបន្ទប់ឃុំឃាំងនៃពន្ធនាគារយោធា កាលពីល្ងាចថ្ងៃសៅរ៍ បន្ទាប់ពី គ្រូពេទ្យបានសាកល្បងជួយសង្គ្រោះអស់ជិតមួយម៉ោង តែមិនបានសម្រេច។ ការវិភាគកោសល្យវិច័យបានបង្ហាញថា គ្រូទាយវ័យហាសិបឆ្នាំប្លាយនេះ មានជាតិពុលក្នុងឈាម បង្កឱ្យសន្លប់បាត់ស្មារតី បន្ទាប់មកស្លាប់។
ចំណែកមន្ត្រីប៉ូលិសម្នាក់ ដែលត្រូវបានចាប់ខ្លួនក្នុងសំណុំរឿងប្រមាថព្រះមហាក្សត្រ ក្នុងថ្ងៃតែមួយ ជាមួយនឹងហោរ៉ា ម៉ យ៉ុង និងជំនួយការ ក៏បានធ្វើអត្តឃាតចងកសម្លាប់ខ្លួន ក្នុងពន្ធនាគារយោធានេះដែរ មុនក្រោយគ្នាពីរថ្ងៃ។
មរណភាពរបស់ជនជាប់ឃុំឃាំងទាំងពីរ បានចោទជាសំណួរជាច្រើនជុំវិញ តួនាទីរបស់យោធា ក្នុងចំណាត់ការចាប់ខ្លួន និងដាក់ទោស ពលរដ្ឋជាសកម្មជនបក្សប្រឆាំង ជានិស្សិត ជាបញ្ញាវ័ន្ត ជាប៉ូលិស ជាហោរ៉ា ... បំបិទសេរីភាពសារព័ត៌មាន ក្រោមផ្លាកប្រឆាំងនឹងការប្រមាថព្រះមហាក្សត្រ ស្របតាមច្បាប់ការពាររាជានិយម ដ៏តានតឹងជាងគេបំផុតមួយនៅលើពិភពលោក។ ប៉ុន្តែរដ្ឋមន្ត្រីក្រសួងយុត្តិធម៌ ដែលធា្លប់ជាអតីតយោធាដែរ បានអះអាងប្រាប់អ្នកសារព័ត៌មាន នៅថ្ងៃចន្ទនេះថា តែងតែមានការស្លាប់ក្នុងពន្ធនាគារ ! គ្រាន់តែអ្នកខ្លះមិនសូវបានសារព័ត៌មានចាប់អារម្មណ៍ប៉ុណ្ណោះ។ ដូច្នេះគ្មានអ្វីត្រូវកែប្រែឡើងក្នុងដំណើរការពន្ធនាគារថៃ។
សូមបញ្ជាក់ថា កាលពីពីរបីសប្តាហ៍មុន មានជនជាប់ឃុំឃាំងក្នុងពន្ធនាគារម្នាក់ពីបទប្រមាថព្រះមហាក្សត្រដែរ ត្រូវបានស្លាប់ក្នុងគុក ប៉ុន្តែគ្មានព័ត៌មានអ្វីលេចឮធ្លាយមកក្រៅទេ។ ការស្លាប់របស់ ហោរ៉ា ម៉ យ៉ុង ជាករណីទីពីរ និងបន្ទាប់ពីបានជាប់ឃុំឃាំងមិនបានមួយខែផង។
តាំងពីឡើងកាន់អំណាចមក របបសឹកថៃ បានយកការប្រយុទ្ធប្រឆាំងនឹងការប្រមាថព្រះមហាក្សត្រមកធ្វើជារនាំង បាំងបិទស្ថានការណ៍មិនប្រាកដប្រជាទាក់ទងនឹងការស្នងរាជ ព្រោះព្រះបាទភូមិបុលជរាខ្លាំង ព្រមទាំងមានជំងឺប្រចាំកាយទៀត។ កាលពីខែមុន សមាជិកគ្រួសាររាជវង្សមួយក្រុមត្រូវស្រាវចាប់ដាក់ពន្ធនាគារអស់ ពីបទប្រមាថស្តេចដោយហ៊ានយកចំណេញពីស្ថាប័នដ៏ខ្ពស់បំផុត « រាជបល្ល័ង្ក » ដើម្បីទាញយកប្រយោជន៍ហិរញ្ញវត្ថុ។ ចំណាត់ការនេះ ត្រូវបានគេមើលឃើញថាជាការបោសសម្អាតអ្នកនៅជុំវិញដើម្បីអនាគតរាជបល្ល័ង្ក តែដោយបរិបទហាមឃាត់ខ្លាំង សារព័ត៌មានធ្វើអត្ថាធិប្បាយតិចតួចបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ