ប៉េកាំង៖ ជប៉ុនព្យាយាមបង្អាប់បន្ថោកកិត្តិយសរបស់ចិន
ទីក្រុងប៉េកាំងនៅថ្ងៃពុធទី ២២ កក្កដា បានឆ្លើយតបវិញ យ៉ាងគ្រោតគ្រាតទៅនឹងការចេញផ្សាយ សៀវភៅ ស របស់ជប៉ុន ដែលបានចោទចិនថា កំពុងល្មោភ ប្រើនយោបាយលេបត្របាក់សមុទ្រចិនខាងត្បូង។ សម្រាប់ក្រសួងការពារជាតិចិន ជប៉ុនកំពុងព្យាយាមប្រើគ្រប់មធ្យោបាយដើម្បី បង្កើតភាពតានតឹងនៅសមុទ្រចិនខាងត្បូង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
ទីក្រុងប៉េកាំងមិនបានអត់ធ្មត់ បណ្តោយទុកឲ្យជប៉ុនវាយម្រាមដៃ របស់ខ្លួនលេងនោះទេ។ នៅយប់ថ្ងៃអង្គារ គឺប៉ុន្មានម៉ោង ក្រោយជប៉ុនចេញផ្សាយសៀវភៅស ចោទប្រកាន់នយោបាយពង្រីកដែនទឹករបស់ទីក្រុងប៉េកាំង ក្រសួងការពារជាតិ ចិនបានបញ្ចេញប្រតិកម្មតបភ្លាម តាមរយៈ សេចក្តីថ្លែងការណ៍មួយ ដែលនៅក្នុងនោះ ក្រសួងការពារជាតិចិន បានវាយតម្លៃថា សៀវភៅសរបស់ជប៉ុន ដែលនិយាយពីការគំរាមកំហែងរបស់យោធាចិន គឺជារបាយការណ៍ដែលបំប៉ោង បំផ្លើស ការពិតទាំងស្រុង។
ទាក់ទងនឹងការដំឡើងថវិកាយោធាចិន ដែលជប៉ុនចោទថា ត្រូវបានបង្កើនឡើង ជារៀងរាល់ឆ្នាំនោះ អ្នកនាំពាក្យរបស់ក្រសួងការបរទេសចិនបាននិយាយនៅថ្ងៃពុធថា ជប៉ុនគ្មានសិទ្ធិអ្វីមកចោទប្រកាន់ចិន ដែលចង់អភិវឌ្ឍន៍វិស័យការពារជាតិរបស់ខ្លួននោះទេ។ “ចិនត្រូវចាក់គ្រឹះកសាងកងទ័ពជាតិមួយ ឲ្យសមស្រប ស៊ីសង្វាក់ទៅនឹងមុខមាត់របស់ចិន។ នយោបាយការពារជាតិរបស់ចិន នឹងមិនធ្វើឡើង ដើម្បី ប្រឆាំងនឹងប្រទេសណាមួយ ហើយក៏នឹងមិនមែនសម្រាប់គម្រាមប្រទេសដទៃដែរ” នេះជាការលើកឡើងរបស់លោកស្រី ហួរ ជុនយីង អ្នកនាំពាក្យរបស់ក្រសួងការបរទេសចិន។
នៅក្នុងសៀវភៅស ជប៉ុនបានបរិហារ មហិច្ឆតាយោធា និងអំណាចផ្តាច់ការ ដែលចិន កំពុងប្រើដើម្បីដណ្តើមគ្រប់គ្រងដែនសមុទ្រចិន។ នៅសមុទ្រចិនខាងកើត ជប៉ុនបានថ្កោលទោសចិនថា មិនបានគោរពតាមកិច្ចព្រមព្រៀង ដោយបានធ្វើសកម្មភាពឯកតោភាគី ក្នុងការជីករកប្រេង នៅក្នុងតំបន់ ដែលកំពុងជាប់មានជម្លោះនៅឡើយ ជាមួយជប៉ុន។
ដោយបានសម្រុកសង់កោះសិប្បនិម្មិត នៅលើថ្មប៉ប្រះទឹក ក្នុងតំបន់ជម្លោះនៅសមុទ្រចិនខាងត្បូង ទីក្រុងប៉េកាំងទទួលស្គាល់មហិច្ឆតារបស់ខ្លួន ដែលចង់ក្រសោប គ្រប់គ្រងសមុទ្រចិនខាងត្បូង ប៉ុន្តែ នោះមិនមែនជារឿងដែលជប៉ុនត្រូវលូកដៃ ជ្រៀតជ្រែកនោះទេ។ អ្នកនាំពាក្យរបស់ក្រសួងការបរទេសចិនបាននិយាយចោទទៅវិញថា “ជប៉ុនមិនមែនជាប្រទេសពាក់ព័ន្ធ នៅសមុទ្រចិនខាងត្បូង ប៉ុន្តែ ជប៉ុនព្យាយាមគ្រប់មធ្យោបាយដើម្បីបង្អាប់បង្អោនកិត្តិយសរបស់ចិន និងញុះញង់ឲ្យមានភាពតានតឹងក្នុងតំបន់”។ តាមទីក្រុងប៉េកាំង រដ្ឋាភិបាល ជប៉ុនដើរផ្លូវនយោបាយញុះញង់គេឯងឲ្យស្អប់ចិន ដើម្បី បញ្ចុះបញ្ចូលប្រជាជនជប៉ុន ឲ្យទទួលយកនយោបាយការពារជាតិជប៉ុនថ្មី ដែលពេលនេះ កំពុងទទួលរងការរិះគន់ និងប្រឆាំងពីប្រជាជនក្នុងស្រុកជប៉ុន។ ក្នុងករណីនេះ ចិនចង់ផ្តល់យោបល់ដល់ជប៉ុនឲ្យនឹកឃើញមេរៀនប្រវត្តិសាស្រ្ត ត្រូវប្រយ័ត្នប្រយែង និងឈប់ចោទចិន ដោយគ្មានហេតុផលតទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ