ជប៉ុនចេញផ្សាយសៀវភៅ ស ដែលរិះគន់ឥរិយាបថចិននៅសមុទ្រចិនខាងត្បូង
សៀវភៅ ស ដែលជាឯកសារកំណត់អំពីនយោបាយការពារជាតិប្រចាំឆ្នាំ ត្រូវបានរដ្ឋាភិបាលជប៉ុនអនុម័ត និងចេញផ្សាយ នៅថ្ងៃអង្គារនេះ ដោយក្នុងនោះ ជប៉ុនបានរិះគន់ធ្ងន់ៗ ចំពោះសកម្មភាពរបស់ចិន នៅក្នុងតំបន់ដែនសមុទ្រជាប់ជម្លោះ ជាពិសេស នៅក្នុងតំបន់សមុទ្រចិនខាងត្បូង។
ចុះផ្សាយនៅថ្ងៃ៖
ស្តាប់ - ០២:១០
សំណុំរឿងនុយក្លេអ៊ែរកូរ៉េខាងជើង និងសកម្មភាពរបស់រុស្ស៊ី នៅក្នុងប្រទេសអ៊ុយក្រែន គឺសុទ្ធសឹងជាបញ្ហាសន្តិសុខសំខាន់ៗ ដែលជប៉ុនបានលើកឡើង នៅក្នុងសៀវភៅ ស ដែលមានចំណងជើងថា “វិស័យការពារជាតិជប៉ុនឆ្នាំ២០១៥” ចេញផ្សាយនៅថ្ងៃអង្គារនេះ។ ក៏ប៉ុន្តែ អ្វីដែលជប៉ុនចាត់ទុកថាជាបញ្ហាប្រឈមធំបំផុត នៅក្នុងវិស័យការពារជាតិរបស់ខ្លួននោះ គឺចិន។
ទាក់ទងនឹងបញ្ហាជម្លោះដែនសមុទ្រ ជាពិសេស នៅក្នុងសមុទ្រចិនខាងត្បូង ជប៉ុនបានធ្វើការរិះគន់យ៉ាងធ្ងន់ៗថា ចិនកំពុងតែធ្វើសកម្មភាពជាឯកតោភាគី វាតទីស្រេចតែនឹងចិត្ត ដោយគ្មានកិច្ចសម្រុះសម្រួលជាមួយភាគីជម្លោះណាទាំងអស់។ ទាក់ទងនឹងជម្លោះដែនសមុទ្រទ្វេភាគី រវាងចិន និងជប៉ុនវិញ (ជម្លោះនៅប្រជុំកោះដែលជប៉ុនហៅថា សេនកាគូ ហើយដែលចិនហៅថា ទៀវយូ) ជប៉ុនក៏បានចោទប្រកាន់ចិនផងដែរថា បានបើកធ្វើសកម្មភាពជាឯកតោភាគី ក្នុងការជីករកធនធានឧស្ម័នធម្មជាតិក្រោមបាតសមុទ្រក្នុងតំបន់ជម្លោះ។
ក្រសួងការពារជាតិជប៉ុនបានអះអាងថា ហេដ្ឋារចនាសម្ព័ន្ធដើម្បីរុករកឧស្ម័នក្រោមបាតសមុទ្រនៅក្នុងតំបន់ជាប់ជម្លោះនេះ ត្រូវបានចិនចាប់ផ្តើមសាងសង់ឡើង កាលពី២ឆ្នាំមុន ហើយបានទាមទារឲ្យចិនបញ្ឈប់រាល់សកម្មភាពទាំងអស់នេះ។
គួរបញ្ជាក់ថា សៀវភៅ ស នៃនយោបាយការពារជាតិប្រចាំឆ្នាំ២០១៥ ត្រូវបានគណៈរដ្ឋមន្រ្តីជប៉ុនអនុម័ត និងចេញផ្សាយជាសាធារណៈ នៅក្នុងពេលដែលលោកស្ហ៊ីនហ្សូ អាបេ កំពុងតែព្យាយាមជំរុញឲ្យមានការអនុម័តច្បាប់ថ្មី ដើម្បីបើកទូលាយឲ្យកងទ័ពជប៉ុនអាចធ្វើសកម្មភាពយោធានៅក្រៅប្រទេស ដោយរួចផុតពីការរឹតត្បឹតនៃរដ្ឋធម្មនុញ្ញក្រោយសង្រ្គាមលោកលើកទី២។ សេចក្តីព្រាងច្បាប់នេះត្រូវបានរដ្ឋសភាជប៉ុនអនុម័តរួចទៅហើយៗ កំពុងតែរង់ចាំការអនុម័តពីព្រឹទ្ធសភា។
ការធ្វើកំណែទម្រង់វិស័យការពារជាតិ ដែលលោកស្ហ៊ីនហ្សូ អាបេ កំពុងតែដុតដៃដុតជើងធ្វើនៅពេលនេះ ត្រូវទទួលរងនូវការរិះគន់យ៉ាងខ្លាំងពីសំណាក់ប្រទេសចិន ក៏ប៉ុន្តែ អ្វីដែលគួរឲ្យលោកស្ហ៊ីនហ្សូ អាបេ ព្រួយបារម្ភនោះ គឺចលនាប្រឆាំងនៅក្នុងស្រុក។ ការស្ទាបស្ទង់មតិកាលពីចុងសប្តាហ៍កន្លងទៅនេះបានបង្ហាញឲ្យឃើញថា សេចក្តីព្រាងច្បាប់ស្តីពីកំណែទម្រង់កងទ័ព បានធ្វើឲ្យប្រជាប្រិយភាពរបស់លោកស្ហ៊ីនហ្សូ អាបេ ត្រូវធ្លាក់ចុះដល់កម្រិតទាបបំផុតមិនធ្លាប់មាន ចាប់តាំងពីលោកឡើងកាន់តំណែងជានាយករដ្ឋមន្រ្តី កាលពីចុងឆ្នាំ២០១២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ