ប្រាក់បំណុលក្នុងពិភពលោកកើនឡើងលឿន ចាប់តាំងពីមានវិបត្តិឆ្នាំ ២០០៨
ពិភពលោកកំពុងជាប់ប្រាក់បំណុលកាន់តែច្រើន មិនព្រមថយចុះទាល់តែសោះ តាំងពីមានវិបត្តិសេដ្ឋកិច្ចឆ្នាំ ២០០៨មក។ យោងតាមការសិក្សាមួយរបស់អ្នកសេដ្ឋវិទូ នៃវិទ្យាស្ថានMcKinsey Global ដែលចេញផ្សាយ កាលពីថ្ងៃព្រហស្បតិ៍ ទី ៥ កុម្ភៈ ប្រាក់បំណុលកើនឡើងមួយជាបួន របស់ប្រទេសចិន ដែលជាមហាសេដ្ឋកិច្ចពិភពលោកទីពីរ នឹងអាចគំរាមកំហែងដល់កំណើនសេដ្ឋកិច្ចពិភពលោកទាំងមូល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
តាំងពីវិបត្តិសេដ្ឋកិច្ចឆ្នាំ ២០០៨ ប្រទេសសេដ្ឋកិច្ចសំខាន់ៗ នៅក្នុងពិភពលោកនាំគ្នារត់ទៅរកខ្ចីបំណុលបន្ថែម កាន់តែច្រើន។ ការសិក្សារបស់វិទ្យាស្ថាន McKinsey Global បានបង្ហាញថា ប្រាក់បំណុលបានកើនឡើង នៅគ្រប់កន្លែង មិនថា នៅតាមស្ថាប័នរដ្ឋ ក្រុមហ៊ុនឯកជន ឬមេផ្ទះ។ តាម ការគន់គូរជាក់ស្តែងរបស់អ្នកសេដ្ឋវិទូ ក្នុងរយៈពេល ៧ឆ្នាំ ប្រាក់បំណុលក្នុងពិភពលោកបានកើនឡើង ១៧%នៃផលិតផលក្នុងស្រុកសរុប ប្រមាណ ៥៧ ០០០ ពាន់លានដុល្លារ។ ជារួម ប្រាក់បំណុលពិភពលោកឆ្នាំ ២០១៤ ស្មើនឹង២៨៦% នៃផលិតផលក្នុងស្រុកសរុប គឺកើនឡើង ប្រមាណ២៣% បើប្រៀបធៀបនឹងឆ្នាំ ២០០៧។
តាមការសិក្សារបស់វិទ្យាស្ថាន ខាងលើ ប្រទេសដែលមានតួលេខជាប់បំណុលកាន់តែច្រើន ភាគច្រើនជាប្រទេសអ្នកមាន។ ប្រទេសដែលនាំមុខគេ ខាងរត់ទៅរកខ្ចីបំណុលបន្ថែម មានប្រទេសអៀរឡង់ សិង្ហបុរី ក្រិក និងព័រទ័រហ្កាល់ ជាដើម។ វាជារឿងធម្មតា ដែលប្រទេសនីមួយៗត្រូវជាប់បំណុលគេ ដើម្បី យកប្រាក់បង្វិល ទៅជំរុញកំណើនសេដ្ឋកិច្ច ក្នុងស្រុក។ នៅក្នុងពិភពលោក ជប៉ុនជាប្រទេសដែលជាប់ប្រាក់បំណុលច្រើនជាងគេ គឺប្រមាណ២៣៤%នៃផលិតផលក្នុងស្រុក។ ប្រាក់បំណុលច្រើនអណេករបស់រដ្ឋាភិបាលជប៉ុន មិនសូវជាក្តីព្រួយបារម្ភប៉ុន្មានសម្រាប់អ្នកសេដ្ឋកិច្ច ព្រោះ ថា ម្ចាស់បំណុលរបស់រដ្ឋាភិបាលជប៉ុន គឺប្រជាជនជប៉ុនខ្លួនឯង ដែលផ្តល់ប្រាក់កំចីក្នុងអត្រាការប្រាក់ទាប។
អ្វីដែលធ្វើឲ្យអ្នកសេដ្ឋកិច្ចបារម្ភខ្លាំងនោះ គឺប្រាក់កំចី បានកើនឡើង ដល់ទៅ ៤ដង នៅក្នុងប្រទេសចិន ដែលកំពុងមានសេដ្ឋកិច្ចរីកលូតលាស់ថ្មី។ ការកើនឡើង យ៉ាងលឿន នៃប្រាក់បំណុលក្នុងវិស័យឯកជន ចិន ជាពិសេស នៅថ្នាក់តំបន់របស់ចិន ត្រូវអ្នកសេដ្ឋវិទូចាត់ទុកជាការគំរាមកំហែងដល់ស្ថិរភាពហិរញ្ញវត្ថុរបស់ចិន ដែលជាកម្លាំងចលករជំរុញកំណើនសេដ្ឋកិច្ចសកល។
ជារួម ការកើនឡើងនៃប្រាក់បំណុល ឬការមានប្រាក់បំណុលតិចតួច គឺសុទ្ធតែជាសញ្ញាមិនល្អសម្រាប់សេដ្ឋកិច្ចពិភពលោក។ អ្នកសេដ្ឋវិទូរបស់វិទ្យាស្ថាន McKinsey Globalបានលើកឧទាហរណ៍ករណីរបស់ប្រទេសបារំាង ដែលមានបង្កើនប្រាក់បំណុល ដល់ទៅ៦០% នៅក្នុងពេលដែលអាល្លឺម៉ង់ មានត្រឹមតែ៨%។ សញ្ញាមិនល្អព្រោះថា បំណុលដែលបារាំងមានភាគច្រើន ជាបំណុលសាធារណៈ គឺរដ្ឋជាប់បំណុលកាន់តែច្រើន ចំណែកនៅអាល្លឺម៉ង់វិញ ការរត់រកទៅរកប្រាក់កំចីមានតិចតួច អាចបង្ហាញថា អាល្លឺម៉ង់កំពុងខ្វះការវិនិយោគថ្មីៗ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ