អាហ្វហ្គានីស្ថាន៖ ភេរវកម្មអត្តឃាត ផ្ទុះពីរកន្លែង ប្រឆាំងនឹងការរៀបចំការបោះឆ្នោតប្រធានាធិបតី ស្លាប់ជិត៥០នាក់
នៅប្រទេសអាហ្វហ្គានីស្ថាន ពីថ្ងៃអង្គារ ទី១៧កញ្ញា ការវាយប្រហារភេរវកម្មបំផ្ទុះគ្រាប់បែកអត្តឃាត ចំនួន២គ្រាប់ បានសម្លាប់មនុស្ស អស់ជិត៥០នាក់។ ក្រោយកើតហេតុសោកនាដកម្មនេះ ក្រុមឧទ្ទាមតាលីបង់ បានចេញសេចក្តីប្រកាសអះអាងថាជាស្នាដៃរបស់ខ្លួន និងពន្យល់ទៀតថា ពួកគេធ្វើបែបនេះ គឺដើម្បីប្រឆាំងនឹងការរៀបចំការបោះឆ្នោតប្រធានាធិបតី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
ការបំផ្ទុះគ្រាប់បែកអត្តឃាត មានពីរកន្លែងផ្សេងគ្នា។ លើកទី១ គឺផ្ទុះនៅជិតកន្លែងត្រួតពិនិត្យមនុស្សចេញចូល ដើម្បីស្តាប់យុទ្ធនាការឃោសនាបោះឆ្នោតរបស់ប្រធានាធិបតី នៅខេត្តភាគខាងកើតប្រទេស។ យ៉ាងហោច មនុស្សនាក់ស្លាប់បាត់បង់ជីវិត (២៦នាក់) និងរងរបួសជាច្រើននាក់ តែលោកប្រធានាធិបតី Ashraf Ghani គ្មានរបកស្បែកបន្តិចឡើយ។
ប្រហែលជាមួយម៉ោងក្រោយការផ្ទុះគ្រាប់បែកទីមួយ គ្រាប់បែកអត្តឃាតទី២ បានបំផ្ទុះឡើងនៅកណ្តាលទីក្រុងកាប៊ូលតែម្តង។ មានស្លាប់មនុស្សជាង២០នាក់ ក្នុងនោះមានកងកម្លាំងរក្សាសន្តិសុខចំនួន៦នាក់ផង ត្រូវដាច់ជីវិត ក្រៅពីនោះ មានក្មេងៗនិងស្ត្រី ដែលរងរបួស ជិត៤០នាក់ផ្សេងទៀត។ នេះបើតាមការរបាយការណ៍បឋមរបស់ ក្រសួងមហាផ្ទៃអាហ្វហ្គានីស្ថាន។
ការបំផ្ទុះគ្រាប់បែកអត្តឃាត និងអំពើភេរវកម្ម នៅអាហ្វហ្គានីស្ថាន កើតមានជាបន្តបន្ទាប់នៅក្នុងខែកញ្ញានេះ បើតាមអ្នកសង្កេតការណ៍នៅទីនោះ គឺមានមូលហេតុ ចំនួនពីរជាចម្បង។
ទីមួយ ច្បាស់ណាស់ គឺដោយសារតែពួកក្រុមឧទ្ទាមតាលីបង់ មិនព្រមឯកភាពចូលរួមការបោះឆ្នោតជាតិ ជ្រើសរើសប្រធានាធិបតី។ ការបោះឆ្នោតនេះនឹងត្រូវរៀបចំធ្វើនៅចុងខែកញ្ញានេះ។
ហើយទីពីរ គឺដោយសាតែការចរចារកសន្តិភាពត្រូវបរាជ័យ បន្ទាប់ពីលោកប្រធានាធិបតីអាមេរិក ដូណាល់ត្រាំ បដិសេធទាត់ចោលការជួបចរចាជាមួយក្រុមថ្នាក់ដឹកនាំតាលីបង់ កាលពីពេលថ្មីៗនេះ។ ជាការកត់សម្គាល់ នៅដើមសប្តាហ៍នេះ ទាហានអាមេរិកកាំងម្នាក់ ក៏ត្រូវស្លាប់នៅក្នុងការវាយប្រហារភេរវកម្មដែរ ខណៈពេលដែលគាត់កំពុងបំពេញបេសកម្ម ក៏ប៉ុន្តែហេតុភេទលម្អិត មិនត្រូវបានគេទម្លាយឱ្យដឹងសោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ