ជនដៃដល់ភេវកម្មលីបង់៖ ក្រុមនិកាយស៊ុននីតដែលពាក់ព័ន្ធអាល់កៃដា ក្រុមអេស្បូឡា រឺក៏លោកអាសាដ?
យោងតាមទាហានលីបង់ អំពើភេរវកម្មពីរផ្ទួនគ្នា កាលពីល្ងាចថ្ងៃសុក្រម្សិលមិញ នៅក្រុងទ្រីប៉ូលី ប្រទេសលីបង់ គឺជាស្នាដៃរបស់ក្រុមភេរវជននិកាយស៊ុននីតដែលជាប់ពាក់ព័ន្ធនឹងក្រុមអាល់កៃដា។ ផ្ទុយទៅវិញ ក្រុមឧទ្ទាមអាល់កៃដា នៅតំបន់ម៉ាហ្ក្រេប បានចោទទៅក្រុមអេស្បូឡាថា ជាអ្នកបង្កអំពើភេរវកម្មទាំងពីរនេះ។ រីឯបក្សប្រឆាំងស៊ីរីវិញ បានចោទប្រធានាធិបតីស៊ីរីអាសាដតែម្តង ថានៅពីក្រោយខ្នងអំពើភេរវកម្មទាំងពីរ។ មានមនុស្សយ៉ាងហោច៤២នាក់បានស្លាប់ និងរាប់រយនាក់ទៀតរងរបួស ដោយការបំផ្ទុះរថយន្តពីរផ្ទួនគ្នា កាលពីម្សិលមិញ នៅលីបង់។ អង្គការសហប្រជាជាតិ និងបណ្តាប្រទេសជាច្រើន ថ្កោលទោសអំពើភេរវកម្មនេះ យ៉ាងខ្លាំងក្លា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
ទាហានលីបង់គិតថា ក្រុមអ៊ីស្លាមជ្រុលនិយមនិកាយស៊ុននីត ដែលជាប់ពាន់ព័ន្ធក្រុមឧទ្ទាមអាល់កៃដា គឺជាដើមហេតុនៃភេរវកម្មបំផ្ទុះរថយន្តពីរផ្ទួនគ្នា ដែលបានកើតឡើង កាលពីម្សិលមិញ នៅក្រុងទ្រីប៉ូលី។
ផ្ទុយទៅវិញ ក្រុមអាល់កៃដា នៅតំបន់ម៉ាហ្កេ្រប បានចោទក្រុមអេស្បូឡានៅលីបង់ ថាជាក្រុមដៃដល់នៃអំពើភេរវកម្ម ហើយបានគំរាមថា ខ្លួននឹងសងសឹកក្រុមនេះវិញ។ ដោយឡែក បក្សប្រឆាំងស៊ីរីបានទំលាក់ការចោទប្រកាន់នេះទៅលើប្រធានាធិបតីស៊ីរី បាសារ អាល់អាសាដ វិញ។ យោងតាមបក្សប្រឆាំងស៊ីរី លោកអាសាដជាអ្នកនៅពីក្រោយខ្នងអំពើភេរវកម្មទាំងពីរ រួមទាំងអំពើភេរវកម្មដែលបានកើតឡើងនាពេលថ្មីៗនេះ នៅទីក្រុងបីរូដ ប្រទេសលីបង់ ផងដែរ។
នៅថ្ងៃសៅរ៍នេះ ទាហានលីបង់បាននាំគ្នាដើរល្បាត នៅតាមក្រុងទ្រីប៉ូលី។ នៅទីនោះ សំបូរអ្នកកាន់សាសនាអ៊ីស្លាមនិកាយស៊ុននីតរស់នៅ។ ទាហានលីបង់បានប្រាប់ថា ក្រុមខ្លួននឹងធ្វើសង្គ្រាមយ៉ាងពេញទំហឹង ដើម្បីប្រយុទ្ធអំពើភេរវកម្មក្នុងប្រទេស។
អំពើភេរវកម្មទាំងពីរ នៅលីបង់ ត្រូវបានប្រទេសទាំង១៥នៃក្រុមប្រឹក្សាសន្តិសុខអង្គការសហប្រជាជាតិ និងប្រទេសជាច្រើនទៀតថ្កោលទោសយ៉ាងខ្លាំងក្លា។ អង្គការសហប្រជាជាតិបានគូសបញ្ជាក់ពីភាពចាំបាច់ ក្នុងការនាំខ្លួនជនដៃដល់ទៅកាន់តុលាការ។ ក្រុមប្រឹក្សាសន្តិសុខអ.ស.ប បានអំពាវនាវអោយប្រជាជនលីបង់អត់ធ្មត់ និងចាប់ដៃរួបរួមគ្នា ដើម្បីទប់ស្កាត់រាល់ការប៉ុនប៉ងបង្កចលាចលនៅលីបង់។
ដោយឡែក អង្គការសហប្រជាជាតិបានរំលឹកឡើងវិញដល់គ្រប់បក្សនយោបាយលីបង់ អោយចៀសវាងលូកដៃចូលក្នុងវិបត្តិប្រទេសស៊ីរី។ ប្រធានាធិបតីបារាំង ហ្វ្រង់ស៊័រ ហូឡង់ បានលើកឡើងសារជាថ្មី ពីការគាំទ្ររបស់បារាំងដល់រដ្ឋាភិបាលលីបង់ដើម្បីជួយលីបង់អោយចៀសផុតពីផលវិបាកបង្កឡើងដោយវិបត្តិសង្គ្រាមស៊ីរី។
អាមេរិកបានជំរុញអោយគ្រប់ភាគីនៅលីបង់អត់ធ្មត់ និងធ្វើយ៉ាងណាចៀសពីសកម្មភាពដែលអាចបង្កជាអំពើហិង្សា និងការសងសឹកដដែលជាដដែល។
ប្រទេសអ៊ីរ៉ង់ដែលគាំទ្ររដ្ឋាភិបាលស៊ីរី និងក្រុមនិកាយស៊ីអ៊ីតអេស្បូឡានោះ ក៏បានចេញមុខថ្កោលទោសអំពើភេរវកម្មនៅលីបង់ផងដែរ។ អ៊ីរ៉ង់បានបរិហារបណ្តាក្រុមនិកាយជ្រុលនិយមស៊ុននីត ដែលមានឈ្មោះថា តាក់ហ្វ៊ីរី ថាជាអ្នកបង្កការបែកបាក់ជាតិលីបង់ និងបំផ្លាញសុខសន្តិភាពដែលកសាងឡើងរួមគ្នាដោយសហគមន៍ស៊ុននីត និងស៊ីអ៊ីត នៅលីបង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ