អំពើភេរវកម្មអត្តឃាតប្រឆំាងតុលាការក្នុងទីក្រុងអ៊ីស្លាម៉ាបាតបានសម្លាប់មនុស្សយ៉ាងតិច ១១នាក់
នៅក្នុងប្រទេសប៉ាគីស្ថាន អំពើភេរវកម្មអត្តឃាតប្រឆំាងតុលាការក្នុងទីក្រុងអ៊ីស្លាម៉ាបាតនាព្រឹកព្រលឹមថ្ងៃចន្ទ ទី៣ មីនានេះបានបណ្តាលឲ្យមានមនុស្សស្លាប់យ៉ាងតិច ១១នាក់ និងរងរបួសប្រមាណជា ២០នាក់ផ្សេងទៀត។ នេះជាលើកទី១ គិតជិត ៣ឆ្នំាកន្លងទៅដែលទីក្រុងអ៊ីស្លាម៉ាបាតបានទទួលរងអំពើភេរវកម្មក្រោមទ្រង់ទ្រាយធំរបៀបនេះ។
ចុះផ្សាយនៅថ្ងៃ៖
ស្តាប់ - ០២:០០
ប្រភពព័ត៌មានពីប៉ូលិសឲ្យដឹងថា ក្រុមជនប្រដាប់អាវុធបានបើកការបាញ់រះ បន្ទាប់មក មានពីរនាក់បានទាញបំផ្ទុះខ្សែក្រវ៉ាត់ជាប់នឹងខ្លួនគេដែលដាក់ពេញដោយជាតិផ្ទុះ។ គោលបំណងរបស់ពួកគេ គឺដើម្បីជួយរំដោះគ្នីគ្នាគេម្នាក់ដែលកំពុងបង្ហាញខ្លួននៅមុខចៅក្រមក្នុងបន្ទប់កាត់ក្តី។ តុល្យការចុងក្រោយឲ្យដឹងថា មានមនុស្សស្លាប់យ៉ាងតិច ១១នាក់ និងរងរបួសចំនួន ២៤នាក់ផ្សេងទៀត ក្នុងនោះ មានជាច្រើននាក់កំពុងមានស្ថានភាពដុនដាបខ្លំាង និងដែលក្រុមគ្រូពេទ្យកំពុងព្យាយាមស្រោចស្រង់ជីវិត។
យោងតាមសាក្សីម្នាក់ដែលជាមេធាវីឲ្យដឹងថា មានបុរសចំនួន ១៥នាក់ប្រដាប់ដោយអាវុធគ្រប់ដៃបានចូលក្នុងទីធ្លាតុលាការ រួចហើយក៏បន្លំខ្លួនចូលទៅអង្គុយនៅក្នុងបន្ទប់កាត់ក្តីតែម្តង។ គឺនៅពេលនោះឯងដែលពួកគេបានធ្វើការបាញ់រះទៅលើហ្វូងមនុស្សដែលកំពុងអង្គុយស្តាប់ចៅក្រម។ បើតាមមេធាវីរូបនេះដដែល ក្រុមភេរវជនមានបំពាក់ដោយអាវុធធន់ធ្ងន់ និងគ្រាប់បែកដៃជាច្រើនគ្រាប់ ព្រមទំាងធ្វើការបាញ់រះលើមនុស្សដោយមិនរើសមុខ។
យ៉ាងណាក៏ដោយ នៅមិនទាន់មានក្រុម ឬចលនាណាមួយចេញមុខប្រកាសថា ជាស្នាដៃរបស់ខ្លួនទេ។ អ្វីដែលគេដឹង ការវាយប្រហារនេះបានកើតមានឡើង ២ថ្ងៃ ក្រោយពីការប្រកាសបទឈប់បាញ់រយៈពេល ១ខែពីសំណាក់ចលនា Tehreek-e-Taliban ដែលជាចលនាប្រដាប់អាវុធអ៊ីស្លាមបង្កើតឡើងក្នុងឆ្នំា ២០០៧។ កម្មវត្ថុនៃការប្រកាសបទឈប់បាញ់របស់ចលនាមួយនេះ គឺដើម្បីផ្តល់សន្ទុះឲ្យមានកិច្ចចរចាសន្តិភាពជាមួយរដ្ឋាភិបាលទីក្រុងអ៊ីស្លាម៉ាបាតឡើងវិញ។
អ្នកនំាពាក្យរបស់ចលនា Tehreek-e-Taliban បានថ្លែងថា ចលនារបស់ខ្លួនមិនមានជាប់ពាក់ព័ន្ធនឹងព្រឹត្តិការណ៍វាយប្រហារនោះទេ និងថា ពួកគេបានគោរពត្រឹមត្រូវនូវបទឈប់បាញ់នោះ។ សូមជម្រាបជូនថា កិច្ចសន្ទនាសន្តិភាពរវាងចលនា Tehreek-e-Taliban និងរដ្ឋាភិបាលដែលបានចាប់ផ្តើមកាលពីដើមខែកុម្ភៈត្រូវបានទីក្រុងអ៊ីស្លាម៉ាបាតសម្រេចផ្អាកវិញ ក្រោយពីចលនាមួយនេះបានសម្លាប់ទាហានប៉ាគីស្ថានចំនួន ២៣នាក់។ បន្ទាប់មក កម្លំាងរដ្ឋាភិបាលក៏ថែមទំាងបានបើកការវាយប្រហារផ្លូវអាកាសលើទីតំាងរបស់ចលនាឧទ្ទាមនៅតំបន់ប៉ែកពាយ័ព្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ