ជនភៀសខ្លួនខុសច្បាប់អាចនឹងត្រូវហាមមិនឲ្យជាន់ដីអូស្រ្តាលីអស់មួយជីវិត
អូស្រ្តាលីដែលស្ថិតក្នុងចំណោមប្រទេសមាននយោបាយអន្តោប្រវេសន៍ដ៏តឹងរ៉ឹងបំផុតនៅលើពិភពលោក កំពុងតែត្រៀមរឹតបន្តឹងនយោបាយរបស់ខ្លួនបន្ថែមទៀត តាមរយៈគម្រោងធ្វើច្បាប់ ហាមឃាត់ជនភៀសខ្លួនខុសច្បាប់មិនឲ្យចូលជាន់ដីអូស្រ្តាលីអស់មួយជីវិត។ អង្គការក្រៅរដ្ឋាភិបាលមួយចំនួនបានបង្ហាញនូវការព្រួយបារម្ភរបស់ពួកគេ ចំពោះសេចក្តីព្រាងច្បាប់ថ្មីនេះ។
ចុះផ្សាយនៅថ្ងៃ៖
ស្តាប់ - ០២:១៥
អស់រយៈពេលជាច្រើនឆ្នាំមកហើយ ដែលរដ្ឋាភិបាលអូស្រ្តាលីប្រកាសសង្រ្គាមប្រឆាំងនឹងលំហូរជនភៀសខ្លួនខុសច្បាប់ ដោយបានដាក់ចេញនូវវិធានការដ៏តឹងរ៉ឹងបំផុត។
វិធានការទាំងនេះ រួមមានដូចជា ការដាក់ពង្រាយឆ្មាំសមុទ្រឲ្យរារាំងទូកដឹកជនភៀសខ្លួនមិនឲ្យចូលក្នុងដែនទឹករបស់អូស្រ្តាលី ហើយរុញច្រានទូកអស់ទាំងនេះឲ្យត្រឡប់ទៅកាន់ដែនទឹកអន្តរជាតិវិញ។ ចំពោះជនភៀសខ្លួនណាដែលអាចចូលទៅដល់ក្នុងទឹកដីអូស្រ្តាលីហើយនឹងត្រូវបញ្ជូនឲ្យទៅរស់នៅក្នុងជំរំជនភៀសខ្លួន ដែលអូស្រ្តាលីបង្កើតឡើង នៅតាមបណ្តាប្រទេសជាកូនកោះក្បែរៗនោះ ដើម្បីរង់ចាំការពិនិត្យសម្រេចថាតើពួកគេជាជនភៀសខ្លួនពិតប្រាកដមែនឬមិនមែន។ ជនណាដែលមិនត្រូវបានផ្តល់សិទ្ធិជាជនភៀសខ្លួនទេនឹងត្រូវបណ្តេញឲ្យទៅប្រទេសកំណើតវិញ ចំណែកឯអ្នកដែលត្រូវទទួលបានសិទ្ធិជាជនភៀសខ្លួនស្របតាមអនុសញ្ញាអន្តរជាតិនោះទៀតសោត ក៏មិនត្រូវអនុញ្ញាតឲ្យតាំងទីលំនៅ នៅក្នុងប្រទេសអូស្រ្តាលីដែរ ដោយត្រូវបញ្ជូនឲ្យទៅកាន់ប្រទេសទី៣ ដែលបានចុះកិច្ចព្រមព្រៀងជាមួយអូស្រ្តាលី ដូចជា ករណីប្រទេសកម្ពុជា ជាដើម។
វិធានការដ៏តឹងរ៉ឹងនេះបានធ្វើឲ្យអ.ស.ប ក៏ដូចជា អង្គការសិទ្ធិមនុស្សជាច្រើនបានធ្វើការរិះគន់ជាប់ជាប្រចាំរួចមកហើយ។ ក៏ប៉ុន្តែ រដ្ឋាភិបាលក្រុងកង់បេរ៉ាមិនត្រឹមតែបន្ធូរ តែថែមទាំងរឹតបន្តឹងបន្ថែមទៀត ដោយនៅថ្ងៃអាទិត្យនេះ នាយករដ្ឋមន្រ្តីអូស្រ្តាលីបានប្រកាសប្រាប់អ្នកកាសែតថា រដ្ឋាភិបាលរបស់លោកបានធ្វើសេចក្តីព្រាងច្បាប់មួយ ដែលនឹងត្រូវដាក់ជូនទៅសភាអនុម័តនៅក្នុងពេលឆាប់ៗខាងមុខនេះ ដោយនៅក្នុងច្បាប់នេះនឹងចែងកំណត់ថា ជនភៀសខ្លួនទាំងឡាយណាដែលប៉ុនប៉ងចូលក្នុងប្រទេសអូស្រ្តាលីដោយខុសច្បាប់ នឹងត្រូវជាប់ឈ្មោះក្នុងបញ្ជីខ្មៅ លែងអាចទទួលទិដ្ឋាការចូលក្នុងទឹកដីអូស្រ្តាលីអស់មួយជីវិត។
ប្រមុខរដ្ឋាភិបាលអូស្រ្តាលីក៏បានបញ្ជាក់បន្ថែមផងដែរថា ច្បាប់នេះ នៅពេលណាដែលអនុម័តចេញហើយ នឹងត្រូវមានសុពលភាពធាក់ថយក្រោយ ពោលគឺ មានសុពលភាពចំពោះជនភៀសខ្លួនដែលប៉ុនប៉ងចូលប្រទេសអូស្រ្តាលីដោយខុសច្បាប់ តាំងពីថ្ងៃទី១៩ ខែកក្កដា ឆ្នាំ២០១៣ មុនពេលច្បាប់ថ្មីនេះចូលជាធរមានទៅទៀត។
សម្រាប់រដ្ឋាភិបាលក្រុងកង់បេរ៉ា ច្បាប់ថ្មីនេះមានគោលដៅប្រយុទ្ធប្រឆាំងនឹងបណ្តាញជួញដូរមនុស្សខុសច្បាប់ ដែលរកស៊ីនាំជនភៀសខុសច្បាប់ចូលទៅអូស្រ្តាលី។ ក៏ប៉ុន្តែ អង្គការក្រៅរដ្ឋាភិបាលមួយចំនួនបានបង្ហាញនូវក្តីបារម្ភថា ច្បាប់នេះអាចនឹងបង្កផលប៉ះពាល់ទៅដល់ជនភៀសខ្លួនពិតប្រាកដស្របទៅតាមអនុសញ្ញាអន្តរជាតិ ស្តីពីជនភៀសខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ