ផ្តាសាយបក្សី កើតច្រើននៅដើមឆ្នាំ តែស្លាប់តិច
ករណីផ្តាសាយបក្សីចំនួន២បន្ថែមទៀត ត្រូវបានរកឃើញ ដែលធ្វើឲ្យកម្ពុជានៅដើមឆ្នាំ ២០១៤នេះមានជម្ងឺផ្តាសាយបក្សី ចំនួន ៥ករណី ក្នុងនោះមានកុមារម្នាក់ស្លាប់។ មន្ត្រីនាយកដ្ឋានប្រយុទ្ធនឹងជម្ងឺឆ្លងក្រសួងសុខាភិបាលបានថ្លែងថា ជម្ងឺផ្តាសាយបក្សីបានកើតឡើងច្រើនជាងដើមឆ្នាំកន្លងទៅសម្រាប់រយៈពេលដូចគ្នា ក៏ប៉ុន្តែការស្លាប់ត្រូវបានកាត់បន្ថយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
មន្ត្រីក្រសួងសុខាភិបាលនៃប្រទេសកម្ពុជាបានសម្តែងនូវការព្រួយបារម្មពីការផ្ទុះឡើងវិញនៃជំងឺផ្តាសាយបក្សី បន្ទាប់ពីបានរកឃើញថា មានមនុស្ស៥នាក់បានកើតជម្ងឺនេះ ត្រឹមតែរយៈពេលពីរខែប៉ុណ្ណោះនៅដើមឆ្នាំ ២០១៤នេះ។
លោក វេជ្ជបណ្ឌិត លី សូវ៉ាន់ អនុប្រធាននាយកដ្ឋានប្រយុទ្ធនឹងជម្ងឺឆ្លងក្រសួងសុខាភិបាល បានប្រាប់វិទ្យុបារាំងអន្តរជាតិ RFI នៅថ្ងៃសុក្រទី២៨ កុម្ភៈថាក្រសួងសុខាភិបាលកម្ពុជា មានការចាប់អារម្មណ៍ខ្លាំងចំពោះជម្ងឺផ្តាសាយបក្សី (H5N1) ដែលបានកើតឡើងផ្ទួនៗនៅដើមឆ្នាំនេះ។ លោក វេជ្ជបណ្ឌិត លី បានបញ្ជាក់ថា ថ្វីត្បិតតែករណីផ្តាសាយបក្សីបានកើតឡើង ច្រើននៅដើមឆ្នាំនេះ ធៀបទៅនឹងឆ្នាំ ២០១៣ ក៏ប៉ុន្តែមានមនុស្សតែម្នាក់ប៉ុណ្ណោះបានស្លាប់ ក្នុងចំណោម ៥នាក់ ដែលបានកើតជម្ងឺនេះគិតមកទល់ដំណាច់ខែកុម្ភៈនេះ។
នៅក្នុងសេចក្តីប្រកាសរួមរបស់ក្រសួងសុខាភិបាលកម្ពុជា និងអង្គការសុខភាពពិភពលោក កាលពីថ្ងៃទី២៧កុម្ភៈកន្លងទៅនេះ បង្ហាញថា ករណីផ្តាសាយបក្សី ចំនួនពីរផ្សេងទៀតគឺករណីទី៤និងទី៥ត្រូវបានរកឃើញ ដែលករណីនេះបានកើតទៅលើកុមារីអាយុ ១០ឆ្នាំម្នាក់នៅស្រុកជើងព្រៃខេត្តកំពង់ចាម។ ចំណែកឯករណីទី៥ បានកើតទៅលើកុមារីម្នាក់ទៀត អាយុ១១ឆ្នាំ
ស្ថិតនៅក្នុងស្រុកពញាក្រែកខេត្តកំពង់ចាមដូចគ្នា។ ជាភ័ព្វសំណាងកុមារីទាំងពីរត្រូវបានសង្គ្រោះឲ្យរួចជីវិតកាលពីពេលថ្មីៗនេះ។
ទាក់ទងទៅនឹងបញ្ហានេះ លោក វេជ្ជបណ្ឌិត លី សូវ៉ាន់ បានពន្យល់ថា បច្ចុប្បន្នប្រជាពលរដ្ឋខ្មែរមានការយល់ដឹងច្រើនជាងមុន មន្ត្រីសុខាភិបាលត្រូវបានពង្រឹងសមត្ថភាព និងប្រព័ន្ធតាមដានសុខភាពប្រជាពលរដ្ឋមានភាពប្រសើជាងមុន។
ទោះយ៉ាងនេះក្តីក្រសួងសុខាភិបាលនៅតែបន្តផ្សព្វផ្សាយនិងអំពាវនាវដល់ប្រជាពលរដ្ឋ ឲ្យរហ័សរហួនក្នុងការនាំកូនទៅកាន់មន្ទីពេទ្យ ប្រសិនបើកើតមានករណីសង្ស័យដូចជាមានគ្រុនក្តៅ ហូរសំបោរ ឈឈបំពង់ករ ក្អក ក្អួត ឬពិបាកដកដង្ហើមជាដើម។ លើសពីនេះក្រសួងសុខាភិបាល ក៏បានណែនាំផងដែរ ដល់ប្រជាជន ដាច់ខាតកុំបរិភោគបក្សី ឈឺ ឬងាប់។ សូមបញ្ជាក់ថា ប្រទេសកម្ពុជាមានជម្ងឺផ្តាសាយបក្សីសរុបចំនួន ៥២ករណីហើយ ចាប់តាំងពីប្រទេសនេះឆ្លងជម្ងឺដ៏កាចសាហាវនេះតាំងពីឆ្នាំ ២០០៥មក ក្នុងនោះបានធ្វើមនុស្ស ៣៤នាក់បាត់បង់ជីវិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ