ប៉ូលិសភូមាចាប់ខ្លួនមនុស្ស៥នាក់ ពីបទចូលរួមដុតវិហារអ៊ីស្លាម កាលពីថ្ងៃសុក្រ
ក្រោយមានការដុតកំទេចវិហារអ៊ីស្លាម នៅភាគខាងជើងភូមា កាលពីថ្ងៃសុក្រមក ប៉ូលិសភូមាបានប្រាប់អោយដឹងនៅថ្ងៃអង្គារ៥កក្កដានេះថា បានចាប់ខ្លួនមនុស្ស៥នាក់ ក្នុងនោះមានស្ត្រីម្នាក់ ដែលបានចូលរួមកំទេចវិហារមួយនោះ។ ឧត្តមស្នងការសិទ្ធិមនុស្សនៃអង្គការសហប្រជាជាតិបានសុំអោយភូមា ចាត់វិធានការកុំអោយមានហេតុការណ៍ធ្វើបាបអ្នកកាន់សាសនា អ៊ីស្លាមកើតឡើងជាថ្មីទៀតបាន។
ចុះផ្សាយនៅថ្ងៃ៖
ស្តាប់ - ០១:២១
គួររំលឹកថា កាលពីថ្ងៃសុក្រ សប្តាហ៍មុន នៅភូមិ ឡុង ឃិន ភាគខាងជើងប្រទេសភូមា មនុស្សមួយក្រុមប្រដាប់ដោយសម្ភារៈគ្រប់ដៃ បាននាំគ្នាចូលទៅកំទេចវិហារសាសនាអ៊ីស្លាមមួយកន្លែង នៅភូមិនោះ។ ថ្ងៃអង្គារនេះ ប៉ូលិសភូមិ ឡូន ឃិន Lone Khin បានប្រកាសថា បានចាប់ខ្លួនមនុស្ស៥នាក់ ដែលស្ថិតក្នុងក្រុមដែលបានបង្កហេតុការណ៍។ ភូមាទើបតែរងហិង្សាប្រឆាំងអ្នកកាន់សាសនាអ៊ីស្លាម នៅចុងខែមិថុនាប៉ុណ្ណោះ។
នៅចុងខែមិថុនាកន្លងទៅ វិហារអ៊ីស្លាមមួយកន្លែងផ្សេងទៀត និងសាលារៀនមួយកន្លែង ក៏រងការបំផ្លិចបំផ្លាញដូចគ្នាដែរ។ ឧត្តមស្នងការសិទ្ធិមនុស្សនៃអង្គការសហប្រជាជាតិ លោក រុយពែរ កុលវីល បានសុំអោយរដ្ឋាភិបាលភូមា ស៊ើបអង្កេតហេតុការណ៍ទាំង២នេះ ហើយចាត់វិធានការចៀសវាងកុំអោយមានហិង្សាសាសនាកើតឡើងជាថ្មីទៀត។
ភាពតានតឹងរវាងសហគមន៍អ្នកកាន់ពុទ្ធសាសនានិងសាសនាអ៊ីស្លាមតែងកើតឡើងជាប្រចាំ តាំងពីឆ្នាំ២០១២មក ពិសេសនៅភាគខាងលិចប្រទេស ដែលសំបុរអ្នកកាន់សាសនាអ៊ីស្លាម រ៉ូហ៊ីងយ៉ារស់នៅ។ កាលពីឆ្នាំ២០១២ ហិង្សារវាងសហគមន៍សាសនាទាំង២បានសម្លាប់២០០នាក់។ សង្ឃជ្រុលនិយមវីរ៉ាធុ ត្រូវបានគេកត់សម្គាល់ថា ជាសកម្មជនលេចធ្លោក្នុងការដឹកនាំចលនាតវ៉ាប្រឆាំងអ្នកកាន់សាសនាអ៊ីស្លាមក្នុងស្រុក។
ដោយសារហិង្សា កន្លងមក ប្រជាជនរ៉ូហ៊ីងយ៉ារាប់ពាន់នាក់បាននាំគ្នាភៀសខ្លួនចេញពីភូមា។ លោកស្រីអ៊ុងសាន ស៊ូជី ប្រធានបក្សកាន់អំណាចនៅភូមាសព្វថ្ងៃ ត្រូវបានគេរីះគន់ថា ធ្វើមិនដឹង មិនលឺចំពោះស្ថានភាពលំបាករបស់ប្រជាជនកាន់សាសនាអ៊ីស្លាមរ៉ូហ៊ីងយ៉ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ