ភូមា៖ភាពតានតឹងបានកើតជាថ្មីរវាងសហគមន៍អ្នកកាន់សាសនាអ៊ីស្លាម និងព្រះពុទ្ធ
នៅក្នុងប្រទេសភូមា សារព័ត៌មានផ្លូវការបានទម្លាយឲ្យដឹងនាថ្ងៃសៅរ៍ ទី២ កក្កដាថា វិហារសាសនាអ៊ីស្លាមមួយនៅតំបន់ប៉ែកខាងជើងបានទទួលរងការវាយកម្ទេចដុតបំផ្លាញពីមនុស្សមួយក្រុមប្រដាប់ដោយសម្ភារៈគ្រប់ដៃ និងគ្រប់ប្រភេទ។ ជាលើកទី២ ក្នុងរយៈពេល ៨ថ្ងៃចុងក្រោយនេះដែលសហគមន៍អ្នកកាន់សាសនាអ៊ីស្លាមបានទទួលរងគ្រោះតាមធ្វើបាបឈ្នានីសពីសហគមន៍ព្រះពុទ្ធសាសនា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
ព្រឹត្តិការណ៍ធ្វើទុក្ខបុកម្នេញលើសហគមន៍អ្នកកាន់សាសនាអ៊ីស្លាមក្នុងប្រទេសភូមាបានកើតមានឡើងនៅក្នុងរដ្ឋកាឈីនស្ថិតប៉ែកខាងជើងប្រទេស។ តាមព័ត៌មានផ្សព្វផ្សាយដោយកាសែតផ្លូវការមួយចេញផ្សាយនាថ្ងៃសៅរ៍ ទី២ កក្កដាឲ្យដឹងថា មានមនុស្សមួយក្រុមប្រដាប់ដោយដំបង កាំបិត និងសម្ភារៈផ្សេងៗគ្រប់ដៃបានចូលទៅវាយប្រហារកម្ទេចនៅក្នុងវិហារមួយ រួមចាក់សាំងដុតកម្ទេចចោលតែម្តង។កាសែតផ្លូវការដដែលបានបញ្ជាក់ថា អំពើហិង្សាដុតបំផ្លាញវិហារសាសនាអ៊ីស្លាមបានកើតមានឡើង បន្ទាប់ពីមានការឈ្លោះប្រកែកគ្នាយ៉ាងតឹងសរសែ ក រវាងសហគមន៍អ្នកកាន់សាសនាអ៊ីស្លាម និងអ្នកកាន់សាសនាព្រះពុទ្ធទាក់ទងនឹងសំណង់វិហារមួយសម្រាប់សហគមន៍អ្នកកាន់សាសនាអ៊ីស្លាម។
ដើម្បីប្រឈមទប់នឹងកំណើនអំពើហិង្សា និងការប្រឈមមុខគ្នាជាថ្មីនៅក្រោយព្រឹត្តិការណ៍នោះ រដ្ឋអំណាចបានដាក់ពង្រាយកម្លាំងសន្តិសុខនៅកន្លែងពេញមួយថ្ងៃសៅរ៍ ទី២ កក្កដា។ តែមិនមានការចាប់ខ្លួនមនុស្សណាម្នាក់ទេនៅក្នុងព្រឹត្តិការណ៍នោះ។ កាលពី ៨ថ្ងៃមុន ក៏មានព្រឹត្តិការណ៍ដូចគ្នានេះបានកើតមានឡើងនៅក្នុងស្រុកមួយស្ថិតប៉ែកកណ្តាលប្រទេស ដោយមានអ្នកស្រុក អ្នកភូមិកាន់ព្រះពុទ្ធសាសនាប្រមាណជា ១០នាក់បានទៅវាយកម្ទេចវិហារមួយ និងសាលារៀនមួយរបស់សហគមន៍អ្នកកាន់សាសនាអ៊ីស្លាម។
សូមជម្រាបជូនថា ភូមាដែលជាប្រទេសក្រីក្រនៅអាស៊ីអាគ្នេយ៍មួយនេះបានស្គាល់ភាពតានតឹងរវាងសហគមន៍អ្នកកាន់សាសនាអ៊ីស្លាម និងព្រះពុទ្ធតាំងពីឆ្នាំ ២០១២ នៅប៉ែកខាងលិចប្រទេសដែលសំបូរដោយអ្នកកាន់សាសនាអ៊ីស្លាមរស់នៅ ពិសេសពួករ៉ូហ៊ីងយ៉ា។ ក្នុងឆ្នាំ ២០១២ អំពើហិង្សារវាងសហគមន៍សាសនាទាំងពីរតែក្នុងរយៈពេលប៉ុន្មានសប្តាហ៍បានបណ្តាលឲ្យមានមនុស្សស្លាប់ជាង ២០០នាក់។ គឺស្ថានការណ៍របស់ពួករ៉ូហ៊ីងយ៉ានេះហើយដែលជាបញ្ហាប្រឈមដ៏រសើបជាងគេមួយរបស់រដ្ឋាភិបាលដឹកនាំដោយគណបក្សសម្ព័ន្ធជាតិដើម្បីប្រជាធិបតេយ្យរបស់លោកស្រីអ៊ុង សានស៊ូជី។ លោកស្រីអ៊ុង សានស៊ូជីដែលធ្លាប់ទទួលរងការរិះគន់ ទិតៀនពីការធ្វើ គ ធ្វើថ្លង់ចំពោះបញ្ហារបស់ពួករ៉ូហ៊ីងយ៉ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ