ការប្រកួតបាល់ទាត់ពិភពលោក World Cup 2014 បើកធ្វើនៅប្រេស៊ីល
ការប្រកួតបាល់ទាត់ដណ្តើមពានរង្វាន់ពិភពលោក (World Cup 2014) ត្រូវចាប់ផ្តើមបើកធ្វើ នៅថ្ងៃព្រហស្បតិ៍នេះ នៅក្នុងប្រទេសប្រេស៊ីល។ ប្រេស៊ីល ដែលត្រូវបានគេស្គាល់ថាជាប្រទេសនៃកីឡាបាល់ទាត់។ ក៏ប៉ុន្តែ ប្រជាជនប្រេស៊ីលជាច្រើនបានបង្ហាញនូវការមិនសប្បាយចិត្តនឹងការទទួលធ្វើជាម្ចាស់ផ្ទះការប្រកួតបាលទាត់នេះ។ មិនសប្បាយចិត្ត ដោយសារតែគេយល់ថា ការរៀបចំការប្រកួតនេះត្រូវចំណាយលុយយ៉ាងច្រើនហួសហេតុពេក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
ពិធីបើកការប្រកួតនឹងត្រូវប្រារព្ធធ្វើ នៅក្នុងពហុកីឡាដ្ឋាន នៅ Sao Paulo ដោយមានការចូលរួមពីសំណាក់ប្រមុខរដ្ឋ ឬប្រមុខរដ្ឋាភិបាលមកពីបណ្តាប្រទេសចំនួន ១២ ហើយការប្រកួតបើកឆាក រវាងក្រុមជម្រើសជាតិប្រេស៊ីល និងក្រូអាស៊ី នឹងត្រូវធ្វើ នៅម៉ោង ៥ល្ងាចថ្ងៃព្រហស្បតិ៍ ម៉ោងក្នុងស្រុក ត្រូវនឹងម៉ោង ៣ព្រឹកថ្ងៃសុក្រ នៅក្នុងប្រទេសកម្ពុជា។
នៅក្នុងការប្រកួតរយៈពេល ១ខែ ពោលគឺ ពីថ្ងៃទី១២មិថុនា ដល់ថ្ងៃទី១៣កក្កដា ក្រុមបាល់ទាត់ជម្រើសជាតិមកពីប្រទេសចំនួន ៣២ នឹងត្រូវប្រជែងគ្នាដណ្តើមពានរង្វាន់ពិភពលោក ដែលជាពានរង្វាន់ដ៏មានតម្លៃបំផុត នៅក្នុងកីឡាបាល់ទាត់។
គួរបញ្ជាក់ថា ការប្រកួតកីឡាបាល់ទាត់ពិភពលោក គឺជាព្រឹត្តិការណ៍កីឡាដ៏អស្ចារ្យមួយ ដែលគេតែងតែរៀបចំធ្វើ នៅរៀងរាល់ ៤ឆ្នាំម្តង ហើយការប្រកួតនៅឆ្នាំនេះ រឹតតែជាព្រឹត្តិការណ៍ដ៏គួរឲ្យចាប់អារម្មណ៍កាន់តែខ្លាំងថែមទៀត ដោយសារប្រេស៊ីល ដែលត្រូវគេចាត់ទុកថាជាស្តេចបាល់ទាត់ គឺជាម្ចាស់ផ្ទះ។
ក្រុមជម្រើសជាតិប្រេស៊ីល ដែលមានកីឡាករដ៏ល្បី ដូចជា Neymar ជាដើម កំពុងតែទទួលនូវសម្ពាធខ្លាំងជាងគេ នៅក្នុងការប្រកួតនេះ ដោយសារតែប្រេស៊ីល គឺជាម្ចាស់ផ្ទះផង និងជាពិសេស ក្រុមជម្រើសជាតិប្រេស៊ីលចាំបាច់ត្រូវតែលេងឲ្យបានល្អ ដើម្បីបំភ្លេចកំហឹងរបស់ប្រជាជន ដែលនាំគ្នាតវ៉ានឹងការចំណាយលុយយ៉ាងច្រើនសន្ធឹកសន្ធាប់ ក្នុងការរៀបចំការប្រកួតបាល់ទាត់ពិភពលោកនេះ។
កាលពីឆ្នាំទៅមិញ ប្រជាជនប្រេស៊ីលប្រមាណជាង ១លាននាក់ បាននាំគ្នាចេញធ្វើបាតុកម្ម នៅតាមទីក្រុងធំៗ ដើម្បីតវ៉ានឹងការចំណាយលុយក្នុងការរៀបចំការប្រកួតបាល់ទាត់ពិភពលោក នៅក្នុងពេលដែលប្រជាជនប្រេស៊ីលជាច្រើនកំពុងប្រឈមមុខនឹងបញ្ហាជីវភាព។
នៅថ្ងៃព្រហស្បតិ៍នេះ ដែលជាថ្ងៃបើកការប្រកួត បរិយាកាសសង្គមនៅប្រេស៊ីលក៏ហាក់ដូចជាមិនទាន់មានស្ថិរភាពនៅឡើយដែរ។ អាជ្ញាធរប្រេស៊ីលអាចមានការធូរចិត្តច្រើន ដោយសារតែបុគ្គលិកបម្រើការនៅសេវាកម្មរថភ្លើងក្រុមដី នៅទីក្រុង Sao Paulo បានសម្រេចបញ្ឈប់ការធ្វើកូដកម្ម។ ក៏ប៉ុន្តែ នៅទីក្រុង Rio de Janeiro ឯណោះវិញ ដែលជាទីក្រុងដ៏ធំលំដាប់ទីពីររបស់ប្រេស៊ីល បុគ្គលិកបម្រើការនៅព្រលានយន្តហោះធំៗទាំងពីរទើបនឹងបានប្រកាសធ្វើកូដកម្ម ដើម្បីទាមទារលក្ខខណ្ឌការងារសមស្រប។ គេរំពឹងថា បាតុកម្មតូចធំផ្សេងទៀតក៏អាចកើតមានដែរ នៅក្នុងអំឡុងពេលប្រកួត រយៈពេល ១ខែនេះ។
ក៏ប៉ុន្តែ ប្រធានាធិបតីប្រេស៊ីល គឺលោកស្រី Dilma Rousseff បានធ្វើការព្រមានរួចហើយថា អាជ្ញាធរនឹងមិនបណ្តោយឲ្យមានបាតុកម្មហិង្សា ដូចកាលពីឆ្នាំទៅមិញទៀតទេ នៅក្នុងពេលប្រកួតបាល់ទាត់នេះ ហើយកម្លាំងទាហាន និងប៉ូលិស ចំនួន ១៥ម៉ឺននាក់ រួមជាមួយនឹងកងសន្តិសុខឯកជនចំនួន ២ម៉ឺននាក់ ត្រូវបានរដ្ឋាភិបាលប្រេស៊ីលដាក់ពង្រាយ ដើម្បីរក្សាសន្តិសុខក្នុងពេលប្រកួត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ