ប៉ូលិសប្រេស៊ីលបំបែកបាតុកម្ម ៣ថ្ងៃមុនបើកការប្រកួតបាល់ទាត់ពិភពលោក
ប៉ូលិសប្រេស៊ីល បានប្រើឧស្ម័នបង្ហូរទឹកភ្នែកបំបែកបាតុករមួយក្រុម ដែលនាំគ្នាបិទផ្លូវ ដើម្បីគាំទ្រការធ្វើកូដកម្មរបស់បុគ្គលិករថភ្លើងក្រោមដី នៅទីក្រុង Sao Paulo។ កូដកម្ម ដែលត្រូវបានធ្វើ ៥ថ្ងៃមកហើយនោះ កំពុងតែធ្វើឲ្យប្រព័ន្ធដឹកជញ្ជូនសាធារណៈត្រូវជាប់គាំង ហើយចរាចរណ៍ត្រូវគាំងស្ទះរាប់រយគីឡូម៉ែត្រ នៅក្នុងទីក្រុង ដែលនឹងត្រូវទទួលការប្រកួតបើកឆាកបាល់ទាត់ពិភពលោក នៅថ្ងៃព្រហស្បតិ៍ ១២មិថុនាខាងមុខនេះ។
ចុះផ្សាយនៅថ្ងៃ៖ កែប្រែថ្ងៃទី៖
ប៉ូលិសបានចូលបង្រ្កាបបាតុកម្ម នៅពេលដែល បាតុករប្រមាណជា៣០០នាក់បាននាំគ្នាដុតគំនរសម្រាម ព្រមទាំងបានបិទផ្លូវនៅសង្កាត់ជំនួញដ៏ធំមួយ ក្នុងទីក្រុង Sao Paulo ដើម្បីបង្ហាញនូវការគាំទ្រចំពោះកូដកម្មរបស់បុគ្គលិកបម្រើការនៅរថភ្លើងក្រោមដីរបស់ Sao Paulo។ កូដកម្ម ដែលបានចាប់ផ្តើមធ្វើ តាំងពីថ្ងៃព្រហស្បតិ៍សប្តាហ៍មុន ត្រូវបានតុលាការប្រកាស កាលពីថ្ងៃអាទិត្យថាជាកូដកម្មខុសច្បាប់ ហើយតម្រូវឲ្យកូដករចូលធ្វើការវិញ ដោយកំណត់លុយពិន័យជាង ២២ម៉ឺនដុល្លារ ក្នុងមួយថ្ងៃ ប្រសិនបើកូដកម្មនៅតែបន្តធ្វើ។
ក៏ប៉ុន្តែ បើទោះបីជាមានសេចក្តីសម្រេចរបស់តុលាការក៏ដោយ សហជីពនៃក្រុមហ៊ុនរថភ្លើងក្រោមដី ដែលជាក្រុមហ៊ុនរដ្ឋ បានសម្រេចថានឹងបន្តធ្វើកូដកម្មបន្តទៀត រហូតទទួលបានការដំឡើងប្រាក់ខែទៅតាមការទាមទារ។
គួរបញ្ជាក់ថា ពីដំបូង សហជីពបានទារដំឡើងប្រាក់ខែ ១៦,៥% តែក្រោយមក បន្ធូរការទាមទារមកវិញបន្តិច គឺទារដំឡើងតែត្រឹម ១២,២%។ ក៏ប៉ុន្តែ រដ្ឋាភិបាលយល់ព្រមដំឡើងឲ្យតែ ៨,៧%។
កូដកម្មរថភ្លើងក្រោមដី នៅ Sao Paulo កំពុងតែក្លាយជាបញ្ហាដ៏សែនឈឺក្បាលមួយ សម្រាប់រដ្ឋាភិបាលប្រេស៊ីល នៅក្នុងពេលដែលការប្រកួតបាល់ទាត់ពិភពលោកនឹងត្រូវចូលមកដល់ នៅថ្ងៃព្រហស្បតិ៍ខាងមុខនេះ ហើយពិធីបើកការប្រកួត ព្រមទាំងការប្រកួតបើកឆាកដំបូងនឹងត្រូវធ្វើ នៅក្នុងពហុកីឡាដ្ឋាន Sao Paulo។ ពិធីបើកការប្រកួត ដែលនឹងត្រូវចូលរួម ពីសំណាក់ លោកបាន គីមូន អគ្គលេខាធិការអ.ស.ប ព្រមទាំងប្រមុខរដ្ឋ ឬប្រមុខរដ្ឋាភិបាលចំនួន ១១រូបផ្សេងទៀត។
រថភ្លើងក្រោមដី គឺជាមធ្យោបាយធ្វើដំណើរដ៏សំខាន់មួយ សម្រាប់ធ្វើដំណើរទៅកាន់ពហុកីឡាដ្ឋាន Sao Paulo។ កូដកម្មរបស់បុគ្គលិករថភ្លើងក្រោមដី ៥ថ្ងៃកន្លងទៅនេះ មិនត្រឹមតែបានធ្វើឲ្យការធ្វើដំណើរទៅកាន់ពហុកីឡាដ្ឋានតាមរថភ្លើងក្រោមដី ត្រូវជាប់គាំងនោះទេ ក៏ប៉ុន្តែ ការធ្វើដំណើរតាមផ្លូវក៏ត្រូវកកស្ទះ ក្នុងចម្ងាយរាប់រយគីឡូម៉ែត្រផងដែរ។
ដូច្នេះ ប្រសិនបើកូដកម្មនេះនៅតែបន្តធ្វើរហូតដល់ថ្ងៃព្រហស្បតិ៍ វាអាចនឹងធ្វើឲ្យប៉ះពាល់ទៅដល់ការប្រកួតបើកឆាក រវាងក្រុមជម្រើសជាតិប្រេស៊ីល និងក្រូអាស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ