ពិធីបុណ្យសមុទ្រឆ្នាំ២០១៦ ទាក់ទាញទេសចរជាង ៦០ ម៉ឺន នាក់
ពិធីបុណ្យសមុទ្ររយៈពេលបីថ្ងៃ ចាប់ពីថ្ងៃទី ២៣ ដល់ថ្ងៃទី ២៥ ខែធ្នូទាក់ទាញភ្ញៀវទេសចរមកទស្សនានិង កម្សាន្ត ជាង ៦០ ម៉ឺន នាក់ ដោយនៅក្នុងនោះ ភ្ញៀវទេសចរ ៣០ ភាគរយ គឺជាជនជាតិបរទេស។ អនុរដ្ឋលេខាធិការក្រសួងទេសចរណ៍ កត់សម្គាល់ថា ទិដ្ឋភាពទូទៅនៃបុណ្យសមុទ្រឆ្នាំនេះ មានភាពល្អប្រសើរច្រើន ទាំងការថែរក្សា សន្តិសុខ និង សណ្តាប់ធ្នាប់ និង បរិស្ថាន។
ចុះផ្សាយនៅថ្ងៃ៖
ក្រសួងទេសចរណ៍ កាលពីល្ងាចម្សិលមិញ បានប្រកាសពីភាពជោគជ័យនៃការរៀបចំ ពិធីបុណ្យសមុទ្រលើកទី៥ ឆ្នាំ ២០១៦ នៅខេត្តព្រះសីហនុ។ លោក វ៉ាត់ ចំរើន អនុរដ្ឋលេខាធិការក្រសួងទេសចរណ៍ និងជាអគ្គលេខាធិការគណៈកម្មាធិការជាតិអូឡាំពិកកម្ពុជាបានបញ្ជាក់ថា ភ្ញៀវទេសចរ ចូលរួមទស្សនា និង កម្សាន្តឆ្នាំនេះច្រើនលើសពីការរំពឹងទុក ដោយកាលពីឆ្នាំ ២០១៥ ពិធីបុណ្យសមុទ្រដែលរៀបចំនៅក្នុងខេត្តកំពត មានភ្ញៀវទេសចរចំនួនត្រឹមតែ នាក់ ម៉ឺនប៉ុណ្ណោះ។
យ៉ាងណាក៏ដោយ ជុំវិញប្រាក់ចំណូលដែលទទួលបានតាមរយៈការប្រារព្ធពិធីបុណ្យសមុទ្រ លោក វ៉ាត់ ចំរើន ឱ្យដឹងថា គណៈកម្មាធិការរៀបចំពិធីបុណ្យ កំពុងតែសិក្សា និង បូកសរុប។ ចំណែកឯទិដ្ឋភាពទូទៅនៃការរៀបចំពិធីបុណ្យសមុទ្រ នៅឆ្នាំ ២០១៦ នេះ ត្រូវបាន អនុរដ្ឋលេខាធិការក្រសួងទេសចរណ៍ វាយតម្លៃខ្ពស់ថា មានភាពល្អប្រសើរជាងឆ្នាំមុនៗ។
លោក បន្តថា ក្នុងរយៈពេលបីថ្ងៃ ចាប់ពីថ្ងៃទី ២៣ ដល់ថ្ងៃទី ២៥ ខែធ្នូ កងកម្លាំងសន្តិសុខ ចំនួន ៦ ពាន់ នាក់ ត្រូវបានដាក់ពង្រាយ ដើម្បីយាមកាម និង ការពារសុវត្ថិភាពជូនពលរដ្ឋ។ ចំណែកឯ ការថែរក្សាបរិស្ថាន វិញ អាជ្ញាធរ បានសហការជាមួយយុវជនស្ម័គ្រចិត្ត ដើម្បីជួយសម្អាតនៅទីតាំងរៀបចំពិធី។
ទោះជាគ្រប់យ៉ាងដំណើរការទៅល្អក៏ពិតមែន លោកវ៉ាត់ ចំរើន បានទទួលស្គាល់ថា ការដំឡើងថ្លៃកន្លែងស្នាក់នៅនេះពិតជាកើតមានឡើងប្រាកដមែនដោយសារតែតម្រូវការច្រើនតែការផ្គត់ផ្គង់នៅមានកម្រិតទើបជាឱកាសមួយធ្វើម្ចាស់អាជីវកម្មឆ្លៀតដំឡើងថ្លៃ។
ដោយឡែក ស្នងការនគរបាលខេត្តព្រះសីហនុ លោកឧត្តមសេនីយ៍ទោ ជួន ណារិន្ទ នៅថ្ងៃទី ទី២៦ ខែធ្នូ បានបញ្ជាក់ថា រយៈពេល៣ថ្ងៃ នៃពិធីបុណ្យសមុទ្រ មានបទល្មើសចំនួន៥ បានកើតឡើង ប៉ុន្តែកម្លាំងសមត្ថកិច្ច ដែលយាមនៅតាមគោលដៅ បានបង្ក្រាបទាំងអស់ ដោយធ្វើការឃាត់ខ្លួនជនសង្ស័យចំនួន១១នាក់។ បទល្មើសទាំង៥ករណីនេះ មានលួច៣ករណី និងហិង្សាដោយចេតនា២ករណី បណ្តាលឱ្យរងរបួសម្នាក់ ក្នុងនោះបទល្មើសលួចកម្លាំងសមត្ថកិច្ចបង្ក្រាបបានជនសង្ស័យ៣នាក់ និងហិង្សាដោយចេតនាបង្ក្រាបបានជនសង្ស័យ៨នាក់ ព្រមទាំងវត្ថុតាងមួយចំនួនផងដែរ ហើយជនសង្ស័យទាំងនេះត្រូវបានបញ្ជូនទៅកាន់តុលាការ ដើម្បីចាត់ការតាមនីតិវិធី។
សូមបញ្ជាក់ថា ពិធីបុណ្យសមុទ្រលើកទី៥ នេះ បានប្រារព្ធធ្វើឡើង ក្រោមប្រធានបទ «ទីក្រុងបៃតង-ឆ្នេរស្អាត-សមុទ្រខៀវស្រងាត់» ដោយមានការអញ្ជើញជាអធិបតីភាពប្រកាសបើក ជាផ្លូវការនៅយប់ថ្ងៃទី២៤ ខែធ្នូ ដោយលោកនាយករដ្ឋមន្រ្តី ហ៊ុន សែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ