ព្រំដែន «គ្មានអ្វីឱ្យបារម្ភទេ» ថ្វីបើថៃប្រើលួសបន្លា និងត្រាក់ទ័រ
មន្ត្រីកម្ពុជា ទាំងផ្នែកស៊ីវិល ទាំងផ្នែកយោធា «មិនបារម្ភ» ថានឹងអាចមានភាពតានតឹង រវាងកម្ពុជា និងថៃឡើយ ព្រោះកម្ពុជាឈរលើគោលការណ៍សន្តិវិធី ក្នុងការដោះស្រាយបញ្ហាជាមួយថៃ។ ការអះអាងបែបនេះត្រូវបានធ្វើឡើង បន្ទាប់ពីទាហាថៃបានពង្រាយលួសបន្លា នៅមុខប្រាសាទព្រះវិហារ និងបានបញ្ជូនត្រាក់ទ័រឱ្យមកភ្ជួរលើដីខ្មែរ នៅខេត្តបន្ទាយមានជ័យ។ អាជ្ញាធរកម្ពុជាក៏បានឱ្យដឹងផងដែរថា បច្ចុប្បន្ន សភាពការណ៍នៅតាមព្រំដែនខ្មែរថៃគឺមិនតានតឹងឡើយ។
ចុះផ្សាយនៅថ្ងៃ៖
ស្តាប់ - ០៣:២៧
ថ្ងៃអាទិត្យម្សិលមិញ ត្រាក់ទ័រថៃ៦គ្រឿង បានចូលមកព្យួរដីទំហំប្រហែល២០០ហិកតា នៅក្នុងភូមិព្រៃច័ន ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ នេះបើតាមការអះអាងរបស់លោកគោ ស៊ុំសារឿត អភិបាលខេត្តបន្ទាយមានជ័យ។ លោកបានបញ្ជាក់បន្ថែមថា នៅក្នុងភូមិសាស្ត្រខេត្តបន្ទាយមានជ័យ អ្នកឆ្លងដែននៅតែអាចទៅមកតាមច្រកព្រំដែនអន្ដរជាតិកម្ពុជា ថៃ ជាធម្មតា គ្រាន់តែភាគីថៃ រឹតបន្តឹងការត្រួតពិនិត្យអត្តសញ្ញាណអ្នកដំណើរខ្លាំងជាងមុន។ ចំណែកនៅឯច្រករបៀង ដែលខាងភាគីថៃបានបិទជាឯកតោភាគីនោះ អ្នកដំណើរមិនអាចឆ្លងចុះឡើងបាននៅឡើយទេ។
នៅតំបន់ព្រះវិហារ ជាទីដែលទាហានថៃបានពង្រាយលួសបន្លា ត្រង់ចំណុចស្រះត្រាវ មុខប្រាសាទព្រះវិហារ កាលពីយប់ថ្ងៃទី២៨ខែឧសភានោះ សភាពការណ៍ក៏មិនតានតឹងគួរឲ្យបារម្ភដែរ។
ការអះអាងរបស់មន្ដ្រីនៅតំបន់ព្រំដែនខាងលើ គឺស្របគ្នានឹងសេចក្ដីថ្លែងការណ៍នៅថ្ងៃចន្ទនេះ របស់អ្នកនាំពាក្យក្រសួងការបរទេសកម្ពុជា ដែលថា សកម្មភាពរបស់ថៃ គឺស្ងប់ស្ងាត់ជាធម្មតា គិតត្រឹមថ្ងៃចន្ទនេះ។
ប៉ុន្តែជាមួយនឹងការច្បាមអំណាចដឹកនាំប្រទេសដោយមេបញ្ជាការកងទ័ពជើងគោកថៃ ឈ្មោះប្រាយុទ្ធ ចាន់អូចា លោកកុយ គួង ចាត់ទុកការពង្រាយលួសបន្លាដោយទាហានថៃនោះ ថាបានបំពានអនុស្សរណៈនៃការយោគយល់គ្នារវាងកម្ពុជានិងថៃ ឆ្នាំ២០០០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ