សហភាពអឺរ៉ុបនិងជប៉ុនជំរុញឲ្យកម្ពុជាធ្វើកំណែទម្រង់ស៊ីជម្រៅ គ.ជ.ប
នៅក្នុងអត្ថបទរួមគ្នាមួយដើម្បីឧទ្ទិសដល់ទិវាសិទ្ធិមនុស្សអន្តរជាតិ១០ធ្នូលើកទី៦៦ លោក ហ្សង់ហ្វ្រង់ស័រ កូតាំង (Jean-François CAUTAIN) ឯកអគ្គរដ្ឋទូតសហភាពអឺរ៉ុប និងលោក យូជី គុម៉ាម៉ារុ (Yuji KUMAMARU)ឯកអគ្គរាជទូតជប៉ុនបានជំរុញឲ្យគណបក្សជាប់ឆ្នោតទាំងពីរធ្វើកំណែទម្រង់ស៊ីជម្រៅដើម្បីបង្កើតឲ្យបានស្ថាប័នរៀបចំបោះឆ្នោតមួយប្រកបដោយទំនុកចិត្ត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
សហភាពអឺរ៉ុបនិងប្រទេសជប៉ុនដែលអះអាងថាជាមិត្តជិតស្និទ្ធរបស់កម្ពុជាបានឆ្លៀតឱកាសនៃការប្រារព្ធទិវាសិទ្ធមនុស្សអន្តរជាតិ១០ធ្នូជំរុញឲ្យគណបក្សទាំងពីរបន្តការពិភាក្សាគ្នាដើម្បីសម្រេចឲ្យបាននូវកំណែទម្រង់ស៊ីជម្រៅមួយទៅលើស្ថាប័នរៀបចំការបោះឆ្នោត។
ក្នុងអត្ថបទថ្លែងការណ៍រួមគ្នាដែលចេញផ្សាយនៅថ្ងៃទី១១ធ្នូនេះ ឯកអគ្គរដ្ឋទូតសហភាពអឺរ៉ុបប្រចាំកម្ពុជាលោក Jean-François CAUTAIN និងឯកអគ្គរាជទូតជប៉ុន លោក Yuji KUMAMARU បានកោតសរសើរចំពោះការវិវឌ្ឍរីកចម្រើនក្នុងរដ្ឋសភាកម្ពុជាក្រោយពីមានកិច្ចព្រមព្រៀងរវាងគណបក្សទាំងពីរកាលពីថ្ងៃទី២២កក្កដា។
ការកោះអញ្ជើញរដ្ឋមន្ត្រីមកសាកសួរ និងការស្នើសុំព័ត៌មានបន្ថែមអំពីសេចក្តីព្រាងច្បាប់ថវិកាជាតិឆ្នាំ ២០១៥ ជាដើម ត្រូវបានសហភាពអឺរ៉ុបនិងប្រទេសជប៉ុនចាត់ទុកជាដំណើរវិវឌ្ឍន៍ជាវិជ្ជមាន។ យ៉ាងណាក៏ដោយ ដៃគូអភិវឌ្ឍដ៏ធំរបស់កម្ពុជាទាំងពីរនេះបានជំរុញឲ្យគណបក្សជាប់ឆ្នោតទាំងពីរត្រូវបន្តកិច្ចពិភាក្សាគ្នារហូតឈានដល់កិច្ចព្រមព្រៀងជាស្ថាពរមួយស្តីពីកំណែទម្រង់ស៊ីជម្រៅនៃស្ថាប័នរៀបចំការបោះឆ្នោតដែលប្រកបដោយទំនុកចិត្ត។
ក្នុងន័យនេះ សហភាពអឺរ៉ុបបានរម្លឹកឡើងវិញអំពីអនុសាសន៍ជាច្រើនរបស់ខ្លួនក្នុងន័យធ្វើឲ្យប្រសើរឡើងនូវក្របខ័ណ្ឌការបោះឆ្នោត។ ហើយអនុសាសន៍ទាំងនេះត្រូវបានលើកឡើងសារជាថ្មីទៀត ដោយជំនាញការបោះឆ្នោតជប៉ុនដែលបានមកបំពេញទស្សនកិច្ចនៅកម្ពុជាកាលពីពេលថ្មីៗនេះ។ តំណាងប្រទេសជប៉ុននិងសហភាពអឺរ៉ុបក៏បានបន្តផ្តល់អនុសាសន៍ឲ្យកែសម្រួលប្រព័ន្ធចុះឈ្មោះអ្នកបោះឆ្នោតទាំងមូលដោយប្រើប្រាស់បច្ចេកវិទ្យាសមស្របដើម្បីធានានូវចីរភាព សុក្រិតភាព និងភាពពេញលេញនៃបញ្ជីឈ្មោះអ្នកបោះឆ្នោត ព្រមទាំងឲ្យពង្រឹងសមត្ថភាពរបស់មន្ត្រីបោះឆ្នោត និងអប់រំដល់ម្ចាស់ឆ្នោតផងដែរ។
ប្រទេសជប៉ុន និងសភាពអឺរ៉ុប បញ្ជាក់ជំហរជាថ្មីថា ពួកគេផ្តល់នូវសារសំខាន់ចំពោះកំណែទម្រង់បោះឆ្នោតដោយជោគជ័យនិងស៊ីជម្រៅដែលនឹងធានាដល់ភាពជោគជ័យនៃដំណើរការបោះឆ្នោតនៅកម្ពុជា។ ប្រទេសផ្តល់ជំនួយដ៏ធំទាំងពីរអះអាងថា ត្រៀមខ្លួនរួចជាស្រេចដើម្បីជួយដល់គណៈកម្មាធិការជាតិរៀបចំការបោះឆ្នោតនិងភាគីពាក់ព័ន្ធទាំងអស់ក្នុងការរៀបចំការបោះឆ្នោតនាអាណត្តិជាបន្តបន្ទាប់ខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ