ក្រសួងកសិកម្មព្រមានពីការផ្ទុះរាលដាលដង្កូវហ្វូង ដែលកំពុងបំផ្លាញស្រូវនិងដំណាំកសិករ
ក្រោយផ្ទុះសត្វល្អិតប្រភេទដង្កូវហ្វូងឬដង្កូវទ័ព ដែលស៊ីបំផ្លាញស្រូវនិងដំណាំរបស់កសិករនៅក្នុងខេត្តចំនួន៨រួមមក មន្ត្រីជំនាញក្រសួងកសិកម្មរុក្ខាប្រមាញ់និងនេសាទបានព្រមានពីលទ្ធភាព ដែលសត្វដង្កូវទាំងនោះអាចនឹងផ្ទុះឡើងជាបន្តបន្ទាប់នៅក្នុងខេត្តផ្សេងទៀត ប្រសិនបើអាកាសធាតុមិនអំណោយផល។ ជាងពីរសប្ដាហ៍ចាប់តាំងពីករណីនេះកើតឡើងស្រូវនិងដំណាំកសិករ ប្រមាណជាងបីពាន់ហិកតា រងផលប៉ះពាល់។ ហើយថ្មីៗនេះសត្វដង្កូវបានបន្តផ្ទុះឡើងនៅខេត្តនៅសៀមរាប និងកំពង់ធំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
ស្ថានភាពសត្វដង្កូវហ្វូងឬដង្កូវទ័ពដែលកំពុងតែស៊ីបំផ្លាញដំណាំនិងស្រូវរបស់កសិកររហូតមកដល់ពេលនេះនៅមិនទាន់ថមថយនៅឡើយទេដោយគ្រាន់តែខេត្តមួយចំនួនស្ថិតនៅក្នុងខេត្តចំនួន៨ដែលកំពុងជួបប្រទះនោះគឺដង្កួវបានវិវដ្ដទៅជាដុកឌឿ។ មន្ត្រីជំនាញឲ្យដឹងថា ដង្កូវដែលវិវដ្ដទៅជាដុកឌឿនេះលែងចោទជាបញ្ហាទៀតហើយព្រោះវាបានទៅរស់នៅក្នុងដី។
លោក ស៊ូខន រិទ្ធីគន់ មន្ត្រីជំនាញនៃក្រសួងកសិកម្មបានប្រាប់វិទ្យុបារាំងអន្តរជាតិថា ប្រសិនបើអាកាសធាតុមិនអំណោយផលជាពិសេសភ្លៀងធ្លាក់មកតិចតួចសត្វដង្កូវហ្វូងឬដង្កូវទ័ពនឹងផ្ទុះឡើងជាលើកទីពីរហើយវានឹងបន្តស៊ីបំផ្លាញដំណាំនិងស្រូវរបស់កសិករ។ លោកពន្យល់ថា សត្វដង្កូវទាំងនេះងាយនឹងកើតឡើងបន្ទាប់ពីកម្ពុជាជួបអាកាសធាតុក្ដៅខ្លាំងនិងរាំងស្ងួតខុសពីឆ្នាំធម្មតា ហើយមានភ្លៀងធ្លាក់ចុះមិនគ្រប់គ្រាន់នៅតាមខេត្តមួយចំនួន ចាប់តាំងពីដើមខែមិថុនានេះ ទើបបង្កភាពងាយស្រួលដល់ការកកើតនៃដង្កូវចង្រៃទាំងនេះ។
លោក ស៊ូខន រិទ្ធីគន់ បានគូសបញ្ជាក់ថា នៅខេត្តត្បូងឃ្មុំសត្វដង្កូវកំពុងតែវាយលុកខ្លាំងលើដំឡូងមី ហើយមន្ត្រីជំនាញរបស់ក្រសួងកសិកម្មក៏កំពុងមានវត្តមាននៅទីនោះដែរដើម្បីរកវិធីសាស្ត្រសង្គ្រោះដំឡូងមី។
ក្រសួងកសិកម្មក៏បានអំពាវនាវឲ្យពលរដ្ឋតាមដានវត្តមានដង្កូវហ្វូងឬដង្កូវទ័ពទាំងនោះដើម្បីសង្គ្រោះដំណាំទាន់ពេលវេលា ។ កសិករអាចកម្ចាត់ដង្កូវហ្វូង ឬដង្កូវទ័ពទាំងនោះបានដោយខ្លួនឯង ដោយប្រើវិធីងាយៗរួមទាំងការដាក់អន្ទាក់សម្លាប់ហ្វូងមេអំបៅការជីកចង្អូរទឹកព័ទ្ធជុំវិញដំណាំរបស់ខ្លួននិងការកម្ចាត់ដង្កូវទាំងនោះ ដោយការសំអាតស្មៅនៅជុំវិញដំណាំជាដើម។
សូមបញ្ជាក់ថា ខេត្តដែលកំពុងជួបប្រទះដង្កូវហ្វូងរួមមាន ខេត្តព្រះវិហារ ត្បួងឃ្មុំ កំពង់ចាម បន្ទាយមានជ័យ ឧត្តរមានជ័យ ព្រៃវែង និងស្ទឹងត្រែង ជាដើម។ ថ្មីៗនេះវាបានរាលដាលដល់ខេត្តសៀមរាបនិងកំពង់ធំ។ ក្នុងនោះដំណាំគ្រប់ប្រភេទរួមមាន ស្រូវ សំណាប ស្ពៃ សណ្ដែក ពោត ឱឡឹក ដំឡូងមី ល្ពៅ រងការស៊ីបំផ្លិចបំផ្លាញពីដង្កូវហ្វូង។ យ៉ាងណាក៏ដោយវត្តមានដង្កូវហ្វូងនេះមិនប៉ះពាល់សុខភាពមនុស្សទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ