គណៈកម្មាធិការព្រំដែនទូទៅ កម្ពុជា-ថៃ GBC ដឹកនាំដោយរដ្ឋមន្ត្រីការពារជាតិ ប្រជុំ នៅថ្ងៃ២៤ធ្នូ
គណៈកម្មាធិការព្រំដែនទូទៅ កម្ពុជា-ថៃ GBC ដែលដឹកនាំដោយរដ្ឋមន្ត្រីការពារជាតិប្រទេសទាំងពីរ នឹងជួបប្រជុំជាថ្មី នៅថ្ងៃទី២៤ ខែធ្នូ។ ប៉ុន្តែមុននឹងឈានដល់កិច្ចប្រជុំនោះ ក្រុមលេខាធិការរួម នៃគណៈកម្មាធិការព្រំដែនទូទៅ កម្ពុជា-ថៃ បានជួបប្រជុំរយៈពេល ៣ ថ្ងៃ បិទបញ្ចប់នៅថ្ងៃទី៣ ខែធ្នូនេះ នៅរាជធានីភ្នំពេញ ដើម្បីរៀបចំ សំរាប់កិច្ចប្រជុំលើកទី១០ នៃគណៈកម្មាធិការព្រំដែនទូទៅ កម្ពុជា-ថៃ។
ចុះផ្សាយនៅថ្ងៃ៖
ស្តាប់ - ០២:០៩
គណៈកម្មាធិការព្រំដែនទូទៅ កម្ពុជា-ថៃ GBC ដែលដឹកនាំដោយរដ្ឋមន្ត្រីការពារជាតិប្រទេសទាំងពីរ នឹងជួប្រជុំជាថ្មី នៅថ្ងៃទី២៤ ខែធ្នូ។ ប៉ុន្តែមុននឹងឈានដល់កិច្ចប្រជុំនោះ ក្រុមលេខាធិការរួម នៃគណៈកម្មាធិការព្រំដែនទូទៅ កម្ពុជា-ថៃ បានជួបប្រជុំរយៈពេល ៣ ថ្ងៃ បិទបញ្ចប់នៅថ្ងៃទី៣ ខែធ្នូនេះ នៅរាជធានីភ្នំពេញ ដើម្បីរៀបចំ សំរាប់កិច្ចប្រជុំលើកទី១០ នៃគណៈកម្មាធិការព្រំដែនទូទៅ កម្ពុជា-ថៃ។ក្រុមលេខាធិការរួមនៃគណៈកម្មាធិការព្រំដែនទូទៅកម្ពុជា-ថៃ GBC គឺមានសហប្រធាន លោកនាយឧត្តមសេនីយ៍ នាង ផាត រដ្ឋលេខាធិការ ក្រសួងការពារជាតិ របស់កម្ពុជា និងលោកឧត្តមសេនីយ៍ទោ ប៊ុនឈួ កើតឆុក នាយកនៃនាយកដ្ឋានកិច្ចការព្រំដែនថៃ។
សេចក្តីប្រកាសព័ត៌មានរួម នៃកិច្ចប្រជុំក្រុមលេខាធិការរួម បង្ហាញថា កិច្ចប្រជុំលើកទី១០ របស់ក្រុមលេខាធិការរួម នៃគណៈកម្មាធិការព្រំដែនទូទៅ GBC រយៈពេល ៣ ថ្ងៃ ចាប់ពីថ្ងៃទី១ ដល់ថ្ងៃទី៣ធ្នូ នៅរាជធានីភ្នំពេញ ត្រូវបានលើកមកពិភាក្សា និងឯកភាពលើ ២ ជំពូក ដែលមាន ១៧ ចំណុច រួមមាន៖ បញ្ហាតំបន់ព្រំដែន និងច្រកទ្វារ កិច្ចសហប្រតិបត្តិលើបញ្ហាពលករ កិច្ចសហប្រតិបត្តិការបង្ការ និងបង្ក្រាបចរាចរគ្រឿងញៀន កិច្ចសហប្រតិបត្តិការបង្ការ និងបង្ក្រាបបទល្មើសផ្សេងៗ នៅតំបន់ព្រំដែន កិច្ចសហប្រតិបត្តិការលើការប្រយុទ្ធប្រឆាំងអំពើភេវរកម្ម កិច្ចសហប្រតិបត្តិការលើវិស័យពាណិជ្ជកម្មព្រំដែន កិច្ចសហប្រតិបត្តិការលើវិស័យកសិកម្ម កិច្ចសហប្រតិបត្តិការវិស័យសុខាភិបាលសាធារណៈ កិច្ចសហប្រតិបត្តិការលើវិស័យទេសចរ និងកិច្ចសហប្រតិបត្តិការថែរក្សាបរិស្ថាន ជាដើម។ល។
សេចក្តីប្រកាសដដែល លើកឡើងថា កិច្ចប្រជុំក្រុមលេខាធិការរួម GBC នឹងផ្តល់ការអនុម័តលើឯកសារទាំងមូល ដែលនឹងឯកភាពលើកិច្ចប្រជុំលើកទី១០ នៃគណៈកម្មាធិការព្រំដែន រវាងប្រទេសទាំងពីរ ដែលមានគោលបំណងសំខាន់ គឺលើកកំពស់កិច្ចសហប្រតិបត្តិការថែរក្សាសន្តិភាព និងសន្តិសុខនៅតំបន់ព្រំដែន ក៏ដូចជារឹតចំណងមិត្តភាព សាមគ្គីភាព និងទំនាក់ទំនងបន្ថែមទៀត រវាងកងកម្លាំង និងអង្គភាពសន្តិសុខ ដែលពាក់ព័ន្ធរវាងប្រទេសកម្ពុជា និងប្រទេសថៃ។
ជាការកត់សម្គាល់ កិច្ចប្រជុំគណៈកម្មាធិការព្រំដែនទូទៅ GBC ដែលដឹកនាំដោយរដ្ឋមន្ត្រីការពារជាតិ កម្ពុជា និងថៃ ដែលជួបប្រជុំជាថ្មី នៅថ្ងៃទី២៤ធ្នូខាងមុខ នឹងធ្វើឡើងខណៈដែលរដ្ឋាភិបាលថៃ ពេលនេះ ដឹកនាំដោយក្រុមយោធា ក្រោយពីរដ្ឋប្រហារទម្លាក់លោកស្រី យ៉ីងឡាក់ ពីនាយករដ្ឋមន្ត្រី កាលពីថ្ងៃទី២២ ខែឧសភា ឆ្នាំ២០១៤។ រីឯស្ថានការណ៍ព្រំដែនកម្ពុជា-ថៃ បានស្ងប់ស្ងាត់ ទោះបីជាមិនទាន់ដោះស្រាយក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ