មេធាវី៖ តាមនីតិវិធី លោក កឹម សុខា គួរតែត្រូវបានដោះលែងកាលពីថ្ងៃទី ០៣ មីនា
គិតត្រឹមថ្ងៃទី ០៦ មីនានេះ គឺមានរយៈពេល១៨ខែនិង៣ថ្ងៃគត់ ដែលលោក កឹម សុខា អតីតប្រធានគណបក្សសង្គ្រោះជាតិ ត្រូវស្ថិតនៅក្រោមនីតិវិធីនៃការឃុំខ្លួនបណ្តោះអាសន្នរបស់តុលាការក្រុងភ្នំពេញ។ មេធាវីការពារក្តីលោក កឹម សុខា បានលើកឡើងពីចំងល់ និងបានចាត់ទុកករណីរបស់ លោក កឹម សុខា នេះថា ជារឿងនយោបាយ។ ប៉ុន្តែអ្នកនាំពាក្យក្រសួងយុត្តិធម៌បានអះអាងថា ករណីរបស់លោក កឹម សុខា មិនស្ថិតនៅក្រោមនីតិវិធីនៃការឃុំខ្លួនបណ្តោះអាសន្ន ៦ខែ៣ដងទៀតនោះទេ។ ផ្អែកតាមនីតិវិធីនេះ ចៅក្រមស៊ើបអង្កេតអាចបន្តនីតិវិធីនៃការស្រាវជ្រាវបទល្មើសរបស់លោក កឹម សុខា ដោយមិនគិតពីរយៈពេលកំណត់នោះទេ។
ចុះផ្សាយនៅថ្ងៃ៖
ជុំវិញនីតិវិធីនៃការឃុំខ្លួនលោក កឹម សុខា នេះ មេធាវីការពារក្តីលោក កឹម សុខា បានលើកជាចំងល់ថា ធ្វើឡើងដោយមិនផ្អែកលើនីតិវិធីច្បាប់នៃក្រមព្រហ្មទណ្ឌកម្ពុជានោះឡើយ។ បើតាមក្រមព្រហ្មទណ្ឌកម្ពុជា នីតិវិធីនៃការឃុំខ្លួនជនសង្ស័យ អាចធ្វើឡើងបាន៦ខែ៣ដងប៉ុណ្ណោះ។ ហើយបើតុលាការមិនបញ្ជូនខ្លួនជនសង្ស័យទៅជំនុំជម្រះទេ នោះជនសង្ស័យ គួត្រូវបានដោះលែងជាស្វ័យប្រវត្តិ។ នេះបើតាមការលើកឡើងរបស់លោកមេធាវី ផែង ហេង។ ប៉ុន្តែឆ្លើយតបនឹងការលើកឡើងនេះ លោក ជិន ម៉ាលីន អ្នកនាំពាក្យក្រសួងយុត្តិធម៌បានអះអាងថា ករណីរបស់លោក កឹម សុខា មិនស្ថិតនៅក្រោមនីតិវិធីនៃការឃុំខ្លួនបណ្តោះអាសន្ន ៦ខែ៣ដងទៀតនោះទេ។ មានន័យថា លោក កឹម សុខា ត្រូវបានដោះលែងឲ្យនៅក្រៅឃុំជាបណ្តោះអាសន្ន ប៉ុន្តែត្រូវស្ថិតនៅក្រោមការត្រួតពិនិត្យរបស់តុលាការ តាំងពីថ្ងៃទី ០៩ ខែ កញ្ញា ឆ្នាំ ២០១៨ មកម្លេះ។ ផ្អែកតាមនីតិវិធីនេះ ចៅក្រមស៊ើបអង្កេតអាចបន្តនីតិវិធីនៃការស្រាវជ្រាវបទល្មើសរបស់លោក កឹម សុខា ដោយមិនគិតពីរយៈពេលកំណត់នោះទេ។
គួររំលឹកឡើងវិញថា លោក កឹម សុខា អតីតប្រធានគណបក្សប្រឆាំង ត្រូវបានអាជ្ញាធរកម្ពុជាចូលចាប់ខ្លួនពីក្នុងគេហដ្ឋានរបស់លោក កាលពីពាក់កណ្តាលអាធ្រាត្រ ឈានចូលថ្ងៃទី ០៤ ខែកញ្ញា ឆ្នាំ២០១៧ ពីបទ «សន្ទិដ្ឋិភាពជាមួយបរទេស» ដើម្បីផ្តួលរំលំរដ្ឋាភិបាលកម្ពុជា ដែលជាទោសក្បត់ជាតិ។ លោកត្រូវបានបញ្ជូនទៅឃុំខ្លួនបណ្តោះអាសន្ននៅក្នុងពន្ធនាគារត្រពាំងផ្លុងក្នុងខេត្តត្បូងឃ្មុំ អស់រយៈពេល ១២ខែនិង៦ថ្ងៃ មុនពេលផ្ទេរមកឃុំខ្លួននៅក្នុងផ្ទះ កាលពីថ្ងៃទី ០៩ ខែ កញ្ញា ឆ្នាំ ២០១៨ មកទល់នឹងសព្វថ្ងៃនេះ។ បើទោះបីជាមានការបកស្រាយថា លោក កឹម សុខា ត្រូវបានដោះលែងឲ្យនៅក្រៅឃុំជាបណ្តោះអាសន្ន ក្រោមការត្រួតពិនិត្យរបស់តុលាការក្តី ប៉ុន្តែលោក កឹម សុខា មិនអាចចេញពីក្នុងផ្ទះ និងប្រាស្រ័យទាក់ទងជាមួយមនុស្សជាទូទៅឡើយ។
លោក ផែង ហេង មេធាវីការពារក្តីលោក កឹម សុខា បានចាត់ទុកករណីរបស់លោក កឹម សុខា នេះថា គឺជារឿងនយោបាយ។ រឿងនយោបាយ ដែលអ្នកនយោបាយគួរតែជួបចរចារគ្នា ដើម្បីឈានទៅបិទបញ្ចប់សំណុំរឿងមួយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ