កម្ពុជាមិនទាន់ឃើញករណីវីរុសថ្មី ឈ្មោះហ្ស៊ីកា (Zika) នៅឡើយទេ
នាយកដ្ឋានប្រយុទ្ធនឹងជំងឺឆ្លង នៃក្រសួងសុខាភិបាល បានបញ្ជាក់ថា កម្ពុជាមិនទាន់ឃើញមានករណីឆ្លងមេរោគថ្មី ដែលមានឈ្មោះថា Zika នៅឡើយទេ។ សូមបញ្ជាក់ថា ថ្មីៗនេះ ប្រទេសថៃ បានបញ្ជាក់ពីការរកឃើញករណីឆ្លងវីរុសថ្មី ឈ្មោះ Zika ទៅលើបុរសម្នាក់ស្ថិតនៅភាគខាងជើងនៃប្រទេស ខណៈនៅសហរដ្ឋអាមេរិកក៏មាន៣ករណីដែរ។ ប៉ុន្តែសម្រាប់កម្ពុជា មន្រ្តីក្រសួងសុខាភិបាលបានបញ្ជាក់ថា រកមិនទាន់ឃើញនៅឡើយទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
វីរុសថ្មីដែលចម្លងតាមរយៈមូសខ្លា ត្រូវបានប្រទះឃើញមួយករណីនៅក្នុងប្រទេសថៃ ដែលនាំឲ្យមានការព្រួយបារម្ភថា មិនយូរមិនឆាប់ មេរោគនេះនឹងឆ្លងមកដល់ប្រទេសកម្ពុជា។ ក៏ប៉ុន្តែមន្រ្តីក្រសួងសុខាភិបាល លោកវេជ្ជបណ្ឌិត លី សុវណ្ណ បានបញ្ជាក់ថា កម្ពុជានៅមិនទាន់រកឃើញករណីឆ្លងនៃវីរុសថ្មីដែលមានឈ្មោះថា Zika នេះនៅឡើយទេ។
វីរុស Zika ត្រូវបានរកឃើញលើកដំបូង នៅលើសត្វស្វានៅក្នុងឆ្នាំ១៩៤៧ នៅក្នុងប្រទេសអ៊ូហ្គង់ដាស្ថិតក្នុងទ្វីបអាហ្រ្វិក។ ហើយនៅឆ្នាំ១៩៥២ ជម្ងឺនេះ បានឆ្លងជាលើកដំបូងមកមនុស្ស តាមរយៈមូសខ្លាខាំ និងបានរីករាលដាលនៅតំបន់អាហ្រ្វិក និងកោះមួយចំនួននៅតំបន់ប៉ាស៊ីហ្វិក។ កន្លងមក ជម្ងឺនេះបានស្ងប់ស្ងាត់មួយរយៈ ប៉ុន្តែថ្មីៗនេះ មេរោគ Zika ត្រូវបានរកឃើញនៅក្នុងប្រទេសប្រេស៊ីល គឺនៅពេលដែលមានព្រឹត្តិការណ៍ប្រកួតកីឡាបាល់ទាត់ពិភពលោក ជាពេលដែលមនុស្សជាច្រើនបានធ្វើដំណើរឆ្លងកាត់ទៅកាន់ទ្វីបអាមេរិកឡាទីន។
ប៉ុន្តែអ្វីដែលជាការវិត្តចុងក្រោយនេះ វីរុស Zika ទើបតែបានឆ្លងទៅលើបុរសជនជាតិថៃម្នាក់ និង៣ករណីទៀតនៅសហរដ្ឋអាមេរិក។ មន្ត្រីសុខាភិបាលអាមេរិក បានចេញសេចក្តីណែនាំភ្លាមៗដល់ប្រជាពលរដ្ឋរបស់ខ្លួន ជាពិសេសស្ត្រីមានផ្ទៃពោះ កុំឲ្យធ្វើដំណើរទៅកាន់ទីកន្លែងចំនួន២២ ស្ថិតនៅក្នុងទ្វីបអាមេរិកឡាទីន និង នៅការីប៊ីន ដែលកំពុងរាលដាលវីរុស Zika នេះ។
វីរុស Zika ត្រូវបានគេដឹងថា ចម្លងមកមនុស្សតាមរយៈមូសខ្លាខាំ។ អ្នកដែលឆ្លងមេរោគថ្មីនេះ នឹងមានអាការៈ ក្ដៅខ្លួន ឈឺក្បាល ឡើងរមាស់ ឈឺសន្លាក់ និងភ្នែកឡើងក្រហម ពោលគឺមានអាការៈនិងរោគសញ្ញា ដូចគ្នានឹងជម្ងឺគ្រុនឈាមដែរ។
បើតាមលោក វេជ្ជបណ្ឌិត លី សុវណ្ណ បើទោះបីជាមេរោគនេះ មិនទាន់ធ្វើឲ្យអ្នកជម្ងឺស្លាប់មែន តែវាបានធ្វើឲ្យប៉ះពាល់ខ្លាំងទៅដល់ស្រ្តីដែលមានផ្ទៃពោះ ព្រោះថា ទារករបស់ពួកគេដែលកើតមក នឹងមានក្បាលតូចខុសពីប្រក្រតី។ បើតាមការបញ្ជាក់ពីលោកវេជ្ជបណ្ឌិត លី សុវណ្ណ កម្ពុជាធ្លាប់រកឃើញករណីវីរុសនេះមួយករណីកាលពីឆ្នាំ២០១០ ដែលបានកើតឡើងទៅលើបុរសម្នាក់ស្ថិតនៅក្នុងខេត្តកំពង់ស្ពឺ ប៉ុន្តែវាបានស្ងប់ស្ងាត់ទៅវិញ។
យ៉ាងណាក៏ដោយលោកវេជ្ជបណ្ឌិត បានអំពាវនាវឲ្យប្រជាពលរដ្ឋកម្ពុជាទាំងអស់ ប្រុងប្រយ័ត្នចំពោះការឆ្លងនៃវីរុសថ្មីនេះ ដោយការការពារកុំឲ្យមូសខ្លាខាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ