អាជ្ញាធរចាត់វិធានការច្បាប់ចំពោះបាតុកម្មនៅប៉ោយប៉ែត
ក្រោយបាតុកម្មដែលឈានដល់ការផ្ទុះអាវុធរវាងកម្មករអូសរទេះនិងអាជ្ញាធរនៅក្រុងប៉ោយប៉ែត នៅថ្ងៃអង្គារទី២៦ ឧសភានេះអាជ្ញាធរខេត្ត បានបញ្ជាក់វិធានការផ្លូវច្បាប់ប្រឆាំងនឹងបាតុកម្មនេះកំពុងដំណើរការ ប៉ុន្តែនៅមិនទាន់កំណត់មុខសញ្ញាបាននៅឡើយទេ។ យ៉ាងណាក៏ដោយ អាជ្ញាធរបានអះអាងថាយ៉ាងហោចណាស់មានមនុស្សពីរនាក់គឺជាអ្នកដឹកនាំបាតុកម្មដែលម្នាក់ជាមន្ត្រីគណបក្សសង្គ្រោះជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
វិធានការផ្លូវច្បាប់ចំពោះបាតុកម្មនៅក្រុងប៉ោយប៉ែតរវាងកម្មករអូសរទះនិងអាជ្ញាធរច្រកទ្វា គឺកំពុងឈានទៅដល់ការកំណត់មុខសញ្ញា និងអ្នកទទួលខុសត្រូវ។ អភិបាលខេត្តបន្ទាយមានជ័យលោក គោ ស៊ុំសារឿត បានបញ្ជាក់ថាពេលនេះមន្ត្រីព្រហ្មទណ្ឌកំពុងប្រមូលភស្តុតាង និងរូបថតចំពោះហេតុការណ៍បាតុកម្មដែលឈានដល់ការផ្ទុះអាវុធដើម្បីដាក់ទៅកាន់តុលាការ។ បើតាមអភិបាលខេត្តរូបនេះ អាជ្ញាធរមិនទាន់បង្ហាញអត្តសញ្ញាណនៅឡើយទេ។ យ៉ាងណាក៏ដោយគណៈបញ្ជាការឯកភាពក្រុងប៉ោយប៉ែត បានចោទចៅសង្កាត់រងទី២ក្រុងប៉ោយប៉ែតកូតាគណបក្សសង្គ្រោះជាតិ និងប្រធានសមាគមន៍អភិវឌ្ឍន៍សេដ្ឋកិច្ចក្រៅប្រព័ន្ធនៅប៉ោយប៉ែត រួមទាំងគូកន គឺជាអ្នកដឹកនាំបាតុកម្ម។
លោក សោ ច័ន្ទដេត តំណាងរាស្ត្រគណបក្សសង្គ្រោះជាតិមណ្ឌលបន្ទាយមានជ័យ បដិសេធការចោទប្រកាន់របស់អាជ្ញាធរក្រុង។ ហើយថាការចោទប្រកាន់នេះ គឺចង់ទម្លាក់ការទទួលខុសត្រូវមកលើគណបក្សប្រឆាំង។ លោកចៅ វាសនាដែលជាចៅសង្កាត់រងទី២នោះបានបញ្ជាក់ថា ពិតជាបង្ហាញវត្តមានមែននៅកន្លែងកើតហេតុមែន ប៉ុន្តែក្នុងនាមជាអាជ្ញាធរដើម្បីឃ្លាំមើលហេតុការប៉ុណ្ណោះ។ គណបក្សសង្គ្រោះជាតិនៅថ្ងៃទី២៦ ឧសភានេះ បានស្នើឱ្យមានការស៊ើបអង្កេតដោយឯករាជ្យចំពោះអំពើហិង្សានេះផងដែរ ដើម្បីជៀសវាងការចោទប្រកាន់ដោយគ្មានមូលដ្ឋាន។
សូមរំលឹកថា កម្មករអូសរទះនៅព្រំដែនកម្ពុជា-ថៃប្រមាណជា១០០នាក់ បានប្រមូលផ្តុំគ្នានៅការិយាល័យគយច្រកទ្វាប៉ោយប៉ែតដើម្បីតវ៉ា និងទាមទារឱ្យអាជ្ញាធរលើកលែងការយកពន្ធលើឥវ៉ាន់ពីប្រទេសថៃ។ ហើយបាតុកម្មនេះបានឈានដល់អំពើហិង្សាផ្ទុះអាវុធសំណាក់អាជ្ញាធរ និងការបំផ្លិចបំផ្លាញទ្រព្យសម្បត្តិរបស់រដ្ឋ។ តុល្យការចុងក្រោយមានមនុស្សយ៉ាងហោចណាស់៤នាក់បានរងរបួសក្នុងហេតុការណ៍នេះ។ លោកច័ន្ទដេត តំណាងរាស្ត្រគណបក្សសង្គ្រោះជាតិ បានបញ្ជាក់ថា បាតុកម្មនេះ គឺកម្មករទាមទារឱ្យអាជ្ញាធរច្រកទ្វាអនុវត្តកិច្ចសន្យាដែលបានចុះហត្ថលេខាលើការមិនយកពន្ធលើសឥវ៉ាន់សម្រាប់ការនាំចូលលើកទី១ដែលបានព្រមព្រៀងជាមួយកម្មករកាលពីខែមករា២០១៥។
តាមច្បាប់បទចោទយ៉ាងហោចចំនួនពីរក្នុងសំណុំរឿងបាតុកម្មនេះគឺការបង្ករបួសស្នាម និងការបំផ្លាញទ្រព្យសម្បត្តិសាធារណៈ។ បើទោះបីជាអាជ្ញាធរមិនបង្ហាញអត្តសញ្ញាណក៏ដោយ ប៉ុន្តែចៅសង្កាត់រងទី២របស់គណបក្សសង្គ្រោះជាតិ រងការចោទប្រកាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ