អតិផរណានៅចិនធ្លាក់ចុះក្នុងរយៈពេល៣ខែបន្តបន្ទាប់គ្នា
នយោបាយរបស់រដ្ឋាភិបាលចិន ក្នុងការទប់ទល់នឹងអតិផរណា ក្នុងរយៈពេលប្រមាណមួយឆ្នាំកន្លងទៅនេះ ចាប់ផ្តើមទទួលផល។ នៅក្នុងខែតុលានេះ អត្រាអតិផរណាចិនបានបន្តថយចុះតទៅទៀត បន្ទាប់ពីបានថយចុះ កាលពីខែសីហា និងខែកញ្ញាកន្លងទៅ។ កំណើននៃសកម្មភាពឧស្សាហកម្មក៏បានថយចុះមកវិញដែរ។
ចុះផ្សាយនៅថ្ងៃ៖
ស្តាប់ - ០១:៥២
អស់រយៈពេលមួយឆ្នាំមកហើយ ដែលចិនត្រូវប្រឈមមុខនឹងបញ្ហាអតិផរណា។ តម្លៃទំនិញស្ទើរតែគ្រប់មុខ ជាពិសេស តម្លៃចំណីអាហារ ចេះតែបន្តកើនឡើងឥតឈប់ឈរ ដែលជាហេតុធ្វើឲ្យរដ្ឋាភិបាលព្រួយបារម្ភខ្លាចផ្ទុះវិបត្តិសង្គម។ ដើម្បីទប់ទល់នឹងបញ្ហាអតិផរណានេះ រដ្ឋាភិបាលចិនបានដាក់ចេញនូវវិធានការជាច្រើន ក្នុងគោលដៅកាត់បន្ថយសកម្មភាពសេដ្ឋកិច្ច។ ចាប់តាំងពីខែតុលា ឆ្នាំ២០១០មក ធនាគារកណ្តាលចិនបានសម្រេចដំឡើងអត្រាការប្រាក់ចំនួន ៥លើក និងបានដំឡើងទុនបម្រុងរបស់ធនាគារឯកជន រហូតដល់ទៅ ៩លើក ដើម្បីកម្រិតចរន្តឥណទាន។
មួយឆ្នាំក្រោយមក វិធានការនេះក៏បានចេញជាផ្លែផ្កា។ អត្រាកំណើននៃផលិតផលក្នុងស្រុកសរុបរបស់ចិនបានថយចុះចំនួន ៣ត្រីមាសជាបន្តបន្ទាប់គ្នា នៅក្នុងឆ្នាំ២០១១នេះ ពោលគឺ ពី ៩,៧% នៅត្រីមាសទីមួយ មកនៅត្រឹម ៩,១% នៅត្រីមាសទី៣។ នៅទីបំផុត អត្រាអតិផរណាក៏ចាប់ផ្តើមថយចុះមកវិញដែរ នៅខែសីហា ហើយបន្តថយចុះជាបន្តបន្ទាប់ រហូតមកនៅត្រឹម ៥,៥% នៅក្នុងខែតុលានេះ។
អ្នកវិភាគជាច្រើនបានព្យាករថា អត្រាអតិផរណានេះអាចនឹងបន្តថយចុះជាបន្តទៅទៀត។ ក៏ប៉ុន្តែ ទោះជាយ៉ាងណា គេមិនរំពឹងថា រដ្ឋាភិបាលចិននឹងផ្លាស់ប្តូរនយោបាយសេដ្ឋកិច្ចរបស់ខ្លួននៅក្នុងពេលឆាប់ៗនេះទេ។
លោក វេន ជៀប៉ាវ នាយករដ្ឋមន្រ្តីចិន បានបញ្ជាក់ថា ការទប់ស្កាត់អតិផរណានៅតែជាអាទិភាពធំបំផុតរបស់រដ្ឋាភិបាល ព្រោះ តម្លៃទំនិញ ជាពិសេស តម្លៃម្ហូបអាហារអាចនឹងកើនឡើងវិញ នៅពេលដែលរដូវរងាចូលមកដល់។ នៅក្នុងរដូវរងា គឺជាពេលដែលតម្រូវការម្ហូបអាហារមានកម្រិតខ្ពស់ ក៏ប៉ុន្តែ ការផលិតត្រូវថយចុះ។
ម្យ៉ាងទៀត ការរឹតបន្តឹងចរន្តឥណទាន គឺជាវិធានការដ៏សំខាន់មួយ ក្នុងការទប់ស្កាត់ការឡើងថ្លៃនៃអចលនទ្រព្យ ដែលរដ្ឋាភិបាលចិនកំពុងបារម្ភថា វានឹងអាចរាលដាលទៅជាវិបត្តដ៏ធ្ងន់ធ្ងរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ