ចិនបោះមួយជំហានទៀតទៅក្នុងអវកាស
ប្រទេសចិន នៅថ្ងៃអាទិត្យ ទី ២៤ មិថុនានេះ បានទទួលជោគជ័យក្នុងការតភ្ជាប់យានអវកាសពីររបស់ខ្លួន ដែលកំពុងហោះនៅក្នុងគន្លងតារាវិថី។ ដែលគេនិយាយថា ជោគជ័យ ព្រោះថា នៅថ្ងៃអាទិត្យ នេះ គឺអវកាសយានិក ម្នាក់ ក្នុងចំណោមបីនាក់ ដែលចិនបានបញ្ជូនទៅកាលពីថ្ងៃទី ១៦មិថុនាកន្លងទៅ នោះ ជាអ្នកបញ្ជាផ្ទាល់ ទៅលើដំណើរការតភ្ជាប់យានអវកាសទាំងពីរ ដែលពីមុន ធ្លាប់តែធ្វើដោយស្វ័យប្រវត្តិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
ប្រតិបត្តិការតភ្ជាប់យានអវកាសShenzhou ទី ៩ ទៅនឹងយានអវកាស(ធានកុង) Tiangong ដែលប្រែថា វិមានអាកាសបានប្រព្រឹត្តដោយល្អិតល្អន់បំផុត និងក្រោមក្រសែភ្នែកតាមដានរបស់ក្រុមអ្នកវិទ្យាសាស្រ្តចិន។ លើកនេះ គេមិនចាំបាច់បញ្ជាពីផែនដីដើម្បីតភ្ជាប់យានអវកាសទាំងពីរដោយស្វ័យប្រវត្តិនោះទេ។ គឺអវកាសយានិក Liu Wang ដែលបញ្ជាទៅលើម៉ាស៊ីន ដើម្បីតភ្ជាប់យានអវកាសទាំងពីរ។ វាជាបទពិសោធន៍លើកទីមួយរបស់ក្រុមអវកាសយានិកចិន ហើយប្រតិបត្តិការលើកនេះត្រូវគេវាយតម្លៃថា ពិបាក និងគ្រោះថ្នាក់បំផុត ព្រោះថា យានទាំងពីរហោះក្នុងល្បឿន ជិត បីម៉ឺន(២៨០០០) គីឡូម៉ែត្រក្នុងមួយម៉ោង ដូចគ្នា។ ដូច្នេះ បើមានការថ្លោះធ្លោយអ្វីមួយ នោះ យានអវកាសទាំងពីរនឹងអាចប៉ះទង្គិចគ្នា និងផ្ទុះឆេះមិនខាន។
តាមពិតទៅ យានអវកាសចិនទាំងពីរបានតភ្ជាប់គ្នា ដោយស្វ័យប្រវត្តិ ម្តងរួចហើយ កាលពីថ្ងៃទី ១៨មិថុនាកន្លងទៅ។ ប៉ុន្តែ អ្នកវិទ្យាសាស្រ្តចិន ចង់ឲ្យមានការសាកល្បងតភ្ជាប់យានទាំងពីរដោយដៃរបស់ក្រុមអ្នកអវកាសយានិកផ្ទាល់ ព្រោះ ដើម្បីបង្កា នៅថ្ងៃណា មួយ ដែលគេបរាជ័យ មិនអាចគ្រប់គ្រង បញ្ជាឲ្យយានអវកាសអាចតភ្ជាប់គ្នាដោយស្វ័យប្រវត្តិ។
ជោគជ័យដ៏ធំធេងលើកនេះ ជាលទ្ធផលនៃការប្រឹងប្រែង រាប់ឆ្នាំ របស់ចិន ដែលខំសង្វាតរត់ឲ្យទាន់បច្ចេកវិទ្យារបស់ប្រទេសលោកខាងលិច។ គួរដឹងថា អវកាសយានិកអាមេរិក និងរុស្ស៊ីធ្លាប់បានជោគជ័យ ក្នុងតភ្ជាប់យានអវកាសដោយខ្លួនឯង ដោយគ្មានការបញ្ជាដោយស្វ័យប្រវត្តិ តាំងពីទសវត្សរ៍ឆ្នាំ៦០ម្ល៉េះ។
យ៉ាងណាក៏ដោយ ជោគជ័យនៅថ្ងៃនេះ បានធ្វើឲ្យចិនមានមោទនភាពខ្លាំងណាស់។ កាលពីខែ៧ខែមុន ចិនទើបបានតភ្ជាប់ យានអវកាសShenzhouទី ៨ ជាមួយវិមានអាកាស Tiangong។ លើកនេះ យានអវកាសShenzhouទី ៩ដែលមានដឹកអវកាសយានិកផងអាចអាចទៅតភ្ជាប់ដោយជោគជ័យជាមួយវិមានអាកាសTiangongទៀត។
ជាមួយនឹងការគ្រប់គ្រងដោយប្រសិទ្ធិភាពលើការតភ្ជាប់យានអវកាស ចិនមានមហិច្ឆតាចង់បញ្ចប់គម្រោងសាងសង់ស្ថានីយ៍អវកាសមួយរបស់ខ្លួន នៅឆ្នាំ ២០២០ ហើយដែលនៅក្នុងស្ថានីយ៍អវកាសនោះ អវកាសយានិកអាចធ្វើការ និងរស់នៅរាប់ខែ គឺយកគំរូតាមអតីតស្ថានីយ៍អវកាសMir របស់រុស្ស៊ី និងស្ថានីយ៍អន្តរជាតិISS បច្ចុប្បន្ន។ ជាមួយគ្នានេះ ចិនក៏មានមហិច្ឆតាសំឡឹងទៅជាន់ឋានព្រះចន្ទ ដូចរុស្ស៊ី និងអាមេរិកដែរ។ ចិនដែលចង់ឲ្យអវកាសយានិករបស់ខ្លួនជាជនជាតិអាស៊ីទីមួយ ទៅជាន់ឋានព្រះចន្ទ ធ្លាប់បានជោគជ័យពីរដង ក្នុងការបញ្ជូន ឧបករណ៍ស្ទង់ទៅឋានព្រះចន្ទ កាលពីឆ្នាំ ២០០៧ និងឆ្នាំ ២០១០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ