សមុទ្រចិន៖ ជប៉ុនដាក់សម្ពាធចិន ទាក់ទងនឹងសេចក្តីសម្រេចតុលាការក្រុងឡាអេ
នៅថ្ងៃសៅរ៍នេះ ក្នុងឱកាសជំនួបកំពូលអឺរ៉ុប-អាស៊ី Asem នៅទីក្រុងអ៊ូឡង់ បាតរ នាយករដ្ឋមន្ត្រីជប៉ុនបានដាក់សម្ពាធចិនអោយគោរពតាមសេចក្តីសម្រេច របស់តុលាការអាជ្ញាកណ្តាលក្រុងឡាអេ ដែលបានកាត់ក្តីអោយហ្វីលពីនឈ្នះចិន រឿងជម្លោះសមុទ្រចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣២
នាយករដ្ឋមន្ត្រីជប៉ុន ស្ហ៊ីនហ្សូ អាបេ បានឆ្លៀតយកបញ្ហាជម្លោះសមុទ្រចិន មកធ្វើជាប្រធានបទចំបងក្នុងជំនួបកំពូលអឺរ៉ុបអាស៊ី ដែលប្រព្រឹត្តទៅ នៅក្រុងអ៊ូឡុង់ បាតរ ប្រទេសម៉ុងហ្គោលី។ លោកអាបេលើកឡើងនៅចំពោះមុខមេដឹកនាំច្រើនប្រទេស ពីគោលការណ៍សកលនៃច្បាប់ និងបានសង្កត់ធ្ងន់ៗ លើការសម្រេចរបស់តុលាការអាជ្ញាកណ្តាលក្រុងឡាអេ ថ្មីៗនេះ។
ថ្មីៗនេះ តុលាការអាជ្ញាកណ្តាលក្រុងឡាអេបានចេញសេចក្តីសម្រេច អោយហ្វីលីពីនឈ្នះចិន ក្នុងជម្លោះសមុទ្រចិនខាងត្បូង។ តុលាការលើកឡើងថា ការទាមទាររបស់ចិននៅសមុទ្រចិនខាងត្បូង មិនបានផ្អែកលើមូលដ្ឋានច្បាប់ទេ ហើយទង្វើចិនបែបយ៉ាងសកម្មភាពនាវាផ្សេងៗ គឺរំលោភអធិបតេយ្យភាពរបស់ហ្វីលីពីន។
សហភាពអឺរ៉ុបត្រូវបានគេហៅអោយចូលរួមជជែករឿងសមុទ្រចិន ក្នុងជំនួបកំពូលអឺរ៉ុប-អាស៊ីនេះដែរ។ អឺរ៉ុបបានគាំទ្រអោយមានការអនុវត្តន៍ច្បាប់អន្តរជាតិ។ ចិនជំទាស់នឹងជប៉ុនដែលលើកយកជម្លោះនេះមកពិភាក្សា ក្នុងជំនួបកំពូលនេះ។ សម្រាប់ចិន ការដោះស្រាយជម្លោះដែនសមុទ្រ គឺធ្វើបានតែក្នុងលក្ខណៈទ្វេភាគីប៉ុណ្ណោះ។
ថ្ងៃសុក្រម្សិលមិញ នាយករដ្ឋមន្ត្រីជប៉ុនបាននិយាយបញ្ហាសមុទ្រចិននេះ ផ្ទាល់មាត់តែម្តងជាមួយនាយករដ្ឋមន្ត្រីចិន។ លោកអាបេបានសុំអោយចិនគោរពតាមសេចក្តីសម្រេចតុលការក្រុងឡាអេ។ លោកលី ខឺឈាំង បានបកតបទៅលោកអាបេវិញថា ជប៉ុនមិនជាប់ពាក់ព័ន្ធសមុទ្រចិនខាងត្បូងទេ ដូច្នេះជប៉ុនត្រូវរាបសាបន្តិចទៅ ហើយត្រូវឈប់បង្កាត់ភ្លើង និងឈប់លូកដៃក្នុងរឿងនេះទៀត។
លោកលី ខឺឈាំង ឃើញថា ជប៉ុនលូកដៃរឿងជម្លោះនេះដោយសារ ក្នុងជំនួបកំពូលនេះ លោកអាបេ បានជួបទ្វេភាគី ជាមួយនាយករដ្ឋមន្ត្រីវៀតណាម និងប្រមុខការទូតហ្វីលីពីន ហើយបានជជែកពីបញ្ហាព្រំដែនទឹក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ