ចិនទើបបានសម្ពោធស្តូបមួយឧទ្ទិសចំពោះឃាតករសម្លាប់នាយករដ្ឋមន្រ្តីជប៉ុនក្នុងឆ្នំា ១៩០៩
នៅថ្ងៃអាទិត្យ ទី១៩ មករាម្សិលមិញ ប្រទេសចិនបានបើកសម្ពោធស្តូបមួយដើម្បីឧទ្ទិសចំពោះវិញ្ញាណក្ខន្ធយុវជនកូរ៉េខាងត្បូងម្នាក់ដែលក្លាហានហ៊ានបាញ់សម្លាប់នាយករដ្ឋមន្រ្តីជប៉ុនកាលពីឆ្នំា ១៩០៩ ពោលឆ្នំាដែលជប៉ុនបានចូលឈ្លានពានវាតទីនៅអាស៊ីឦសាន។ ទង្វើរបស់ចិនពេលនេះបានបង្កឲ្យមានភាពតានតឹងថ្មីជាមួយជប៉ុន ចំពេលដែលទំនាក់ទំនងរវាងប្រទេសជិតខាងទំាងពីរកំពុងល្អក់កករស្រាប់ជុំវិញរឿងជម្លោះដណ្តើមទីប្រជុំកោះ។
ចុះផ្សាយនៅថ្ងៃ៖
ស្តាប់ - ០២:១៥
គឺនៅថ្ងៃទី២៦ តុលា ឆ្នំា ១៩០៩ ដែលយុវជនកូរ៉េខាងត្បូងម្នាក់ឈ្មោះ Ahn Jung-Geun បានដកកំាភ្លើងបាញ់សម្លាប់លោកនាយករដ្ឋមន្រ្តីជប៉ុន Hirobumi Ito ជាច្រើនគ្រាប់នៅឯស្ថានីយ៍រថភ្លើងមួយស្ថិតប៉ែកឦសានប្រទេសចិន។ គឺនៅកន្លែងដដែលនោះឯងដែលជាង ១០០ឆ្នំាកន្លងមក ពោលនៅថ្ងៃអាទិត្យ ទី១៩ មករា ឆ្នំា ២០១៤ ម្សិលមិញ ដែលរដ្ឋាភិបាលចិនបានបើកសម្ពោធស្តូបមួយសម្រាប់ឧទ្ទិសចំពោះភាពក្លាហានរបស់យុវជនអ្នកជាតិនិយមកូរ៉េខាងត្បូង Ahn Jung-Geun។ លោក Ahn Jung-Geun ដែលត្រូវបានជប៉ុនសម្លាប់ដោយព្យួរ ក កាលពីឆ្នំា ១៩១០។ សម្រាប់ប្រទេសចិន ក៏ដូចជាកូរ៉េខាងត្បូង Ahn Jung-Geun គឺជាវីរជនម្នាក់ក្នុងការប្រឆំាងនឹងការឈ្លានពានរបស់ជប៉ុន។
ប្រតិកម្មភ្លាមនៅថ្ងៃនេះ អ្នកនំាពាក្យរបស់រដ្ឋាភិបាលជប៉ុនបានបញ្ជាក់ថា Ahn Jung-Geun គឺជាភេរវជនម្នាក់ដែលបានសម្លាប់នាយករដ្ឋមន្រ្តីជប៉ុន និងថា ការសាងសង់ស្តូបមួយដើម្បីឧទ្ទិសចំពោះយុវជន Ahn Jung-Geun មិនមែនជាការរួមចំណែកក្នុងការស្ថាបនាទំនាក់ទំនងសន្តិភាព និងកិច្ចសហប្រតិបត្តិការនៅក្នុងតំបន់នោះទេ។ ជាមួយគ្នានេះ អ្នកនំាពាក្យរបស់រដ្ឋាភិបាលជប៉ុនរូបនោះដដែលបានរិះគន់ ទិតៀនរដ្ឋាភិបាលចិនដែលបានសម្រេចតែម្នាក់ឯងនៅក្នុងសំណុំរឿងអតីតកាលដែលបានកើតមានតំាងពីសតវត្សមុនម្ល៉េះ។ ជាចម្លើយតបវិញ កាសែតផ្លូវការចិនបានយល់ឃើញថា ស្តូបជាកិត្តិយសដល់យុវជន Ahn Jung-Geun មិនមែនក្នុងគោលដៅបញ្ឈឺចិត្តនរណាម្នាក់ទេ តែដើម្បីលាតត្រដាងរឿងប្រវត្តិសាស្រ្តនៅអាស៊ីឦសាន។
អ្វីជាការកត់សម្គាល់ ការបើកសម្ពោធស្តូបឧទ្ទិសចំពោះយុវជន Ahn Jung-Geun ពីសំណាក់ប្រទេសចិនបានធ្វើឡើង ចំពេលដែលលោកនាយករដ្ឋមន្រ្តីជប៉ុនស៊ីនហ្សូ អាបេបានស្នើឲ្យមានជំនួបត្រីភាគីជប៉ុន ចិន និងកូរ៉េខាងត្បូងក្នុងគោលដៅជម្រះបញ្ជីរឿងប្រវត្តិសាស្រ្តឲ្យបានដាច់ស្រេច។ រឿងប្រវត្តិសាស្រ្តដែលបាន និងកំពុងធ្វើឲ្យទំនាក់ទំនងរវាងជប៉ុន និងចិន និងរវាងជប៉ុន និងកូរ៉េខាងត្បូងកំពុងបន្តល្អក់កករមកដល់សព្វថ្ងៃ។ សូមជម្រាបជូនថា ក្រៅពីចិន និងកូរ៉េខាងត្បូង ជប៉ុនខ្លួនឯងក៏តែងតែបានឆ្កឹះកកាយរឿងប្រវត្តិសាស្រ្តដើម្បីបញ្ឆេះកំហឹងចិន និងកូរ៉េខាងត្បូងដែរ ពិសេសទស្សនកិច្ចរបស់ថ្នាក់ដឹកនំាជប៉ុននៅវិហារយ៉ាស៊ូគូនីដើម្បីគោរពវិញ្ញាក្ខន្ធចំពោះជនរងគ្រោះជប៉ុន ២លាន ៥សែននាក់នៅក្រោយឆ្នំា ១៩៤៥ និងដែលក្នុងនោះ ក៏មានឧក្រិដ្ឋជនសង្រ្គាម ១៤នាក់ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ