ភេរវកម្មក្រុងប៉ារីស៖រកឃើញស្នាមម្រាមដៃ Salah Abdeslam ក្នុងទីក្រុងព្រុចសែល
នៅក្នុងប្រទេសបែលហ្ស៊ិក ព្រះរាជអាជ្ញាបានប្រកាសឲ្យដឹងនៅថ្ងៃសុក្រ ទី៨ មករាពីការរកឃើញវត្តមានស្នាមម្រាមដៃជន Salah Abdeslam នៅក្នុងផ្ទះមួយក្នុងទីក្រុងព្រុចសែលកាលពីថ្ងៃទី១០ ធ្នូ ឆ្នាំ ២០១៥។ Salah Abdeslam គឺជាជនសង្ស័យបង្កភេរវកម្មក្នុងទីក្រុងប៉ារីសកាលពីថ្ងៃទី១៣ វិច្ឆិកាកន្លងទៅ។ ទន្ទឹមគ្នានេះ ប៉ូលិសបែលហ្សិកក៏បានរកឃើញជាតិស្លាកស្នាមផ្ទុះ និងខ្សែក្រវ៉ាត់ចំនួន ៣ខ្សែដែលអាចជាប្រើសម្រាប់ដាក់ជាតិផ្ទុះពាក់ជាប់នឹងខ្លួន។
ចុះផ្សាយនៅថ្ងៃ៖
ស្តាប់ - ០២:០២
ផ្ទះដែលប៉ូលិសបែលហ្ស៊ិកបានចូលឆែកឆេរកាលពីថ្ងៃទី១០ ធ្នូស្ថិតក្នុងតំបន់ Schaerbeek ដែលជាតំបន់ដ៏ប្រជាប្រិយមួយក្នុងទីក្រុងព្រុចសែល។ គេអាចនិយាយបានថា វត្តមានស្នាមម្រាមដៃរបស់ជន Salah Abdeslam ដែលប៉ូលិសបែលហ្ស៊ិកបានរកឃើញកាលពីថ្ងៃទី១០ ធ្នូកន្លងទៅ គឺជាស្លាកស្នាមថ្មីចុងក្រោយរបស់ជនសង្ស័យបង្កភេរវកម្មក្នុងទីក្រុងប៉ារីសកាលពីថ្ងៃទី១៣ វិច្ឆិកា។ គួររម្លឹកជូនថា នៅថ្ងៃទី១៤ វិច្ឆិកា ពោលមួយថ្ងៃក្រោយភេរវកម្ម គេប្រហែលជាបានឃើញរូប Salah Abdeslam ក្នុងពេលបេសកកម្មត្រួតពិនិត្យរថយន្តពីសំណាក់ប៉ូលិសបារាំងនៅប៉ែកខាងជើង។
នៅពេលនោះ រូប Salah Abdeslam កំពុងជិះឡានជាមួយមិត្តភក្តិពីរនាក់ គឺឈ្មោះ Hamza Attou និងឈ្មោះ Mohamed Amri ធ្វើដំណើរឆ្ពោះទៅប្រទេសបែលហ្ស៊ិក។ សព្វថ្ងៃនេះ ជនទាំងពីររូបគឺ Hamza Attou និង Mohamed Amri កំពុងជាប់ឃុំឃាំងនៅបែលហ្ស៊ិកក្នុងក្របខ័ណ្ឌនៃការស៊ើបអង្កេតរបស់ប៉ូលិសបែលហ្ស៊ិក។ ព្រះរាជអាជ្ញាបែកហ្ស៊ិកបានឲ្យដឹងថា ស្នាមម្រាមដៃរបស់ Salah Abdeslam ប្រហែលជាមានតាំងពីមុនថ្ងៃភេរវកម្មក្នុងទីក្រុងប៉ារីសថ្ងៃទី១៣ វិច្ឆិកាទៅទៀត តែក្នុងរយៈពេលនោះ ក៏អាចមានការបោសសំអាតនៅក្នុងផ្ទះនោះដែរ។
គឺនៅក្នុងន័យនេះហើយបានជាក្រុមអ្នកស៊ើបអង្កេតសង្ស័យថា រូប Salah Abdeslam អាចត្រឡប់ទៅលាក់ខ្លួននៅក្នុងផ្ទះនោះនៅក្រោយភេរវកម្មថ្ងៃទី១៣ វិច្ឆិកាក្នុងទីក្រុងប៉ារីស ព្រោះថា មានអ្នករួមគំនិតម្នាក់ឈ្មោះ Ali Oulkadi បានជូនរូប Salah Abdeslam ទៅទម្លាក់នៅតំបន់ Schaerbeek ក្នុងថ្ងៃទី១៤ វិច្ឆិកា។ ក្រៅពីការរកឃើញស្នាមម្រាមដៃរបស់ Salah Abdeslam ក្រុមអ្នកស៊ើបអង្កេតបែលហ្ស៊ិកក៏បានរកឃើញស្លាកស្នាមជាតិផ្ទុះ ព្រមទាំងខ្សែក្រវ៉ាត់ចំនួន ៣ ដែលអាចប្រើសម្រាប់ផ្ទុកជាតិផ្ទុះពាក់ជាប់នឹងខ្លួន។
សំណួរដែលកំពុងចោទពេលនេះគឺថា តើផ្ទះនោះមិនមែនជាទីកន្លែងផលិតគ្រឿងផ្ទុះដែលក្រុមភេរវជនបានប្រើវាយប្រហារក្រុងប៉ារីសកាលពីថ្ងៃទី១៣ វិច្ឆិកាទេ ឬយ៉ាងណា?៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ