មួយខែគត់ ដែលប៉ារីសរងភេរវកម្ម សម្លាប់មនុស្ស១៣០នាក់
១៣វិច្ឆិកា ១៣ធ្នូ ២០១៥។ នៅថ្ងៃអាទិត្យទី ១៣ធ្នូ គឺមានរយៈពេលមួយខែគត់ ដែលទីក្រុងប៉ារីសរងការវាយប្រហារភេរវកម្ម ដែលបានសម្លាប់មនុស្ស ១៣០នាក់។ ភេរវកម្មដ៏សាហាវ ដែលបានសម្លាប់មនុស្សមកពី១៩ប្រទេស ជាស្នាដៃរបស់ក្រុមជីហាត អង្គការរដ្ឋអ៊ីស្លាម ដែលមានវត្តមាន នៅប្រទេសស៊ីរី និងអ៊ីរ៉ាក់។ នៅក្រោយភេរវកម្ម ការស៊ើបអង្កេត និងយុទ្ធនាការប្រយុទ្ធប្រឆាំងក្រុមភេរវកម្មរបស់ប៉ូលិសបារាំង បានឈានទៅដល់ការបើកការស៊ើបអង្កេត ស្វែងរក ក្រុមជីហាត នៅថ្នាក់អន្តរជាតិ។
ចុះផ្សាយនៅថ្ងៃ៖
ស្តាប់ - ០២:០៧
ព្រឹត្តិការណ៍នៅយប់ថ្ងៃសុក្រទី ១៣វិច្ឆិកា នឹងនៅចារជាប់ ក្នុងខួរក្បាលរបស់ប្រជាជន ក្នុងប្រទេសបារាំង។ នៅយប់នោះ ក្នុងរយៈពេល តែ៣៣នាកទី ក្រុមភេរវជនអត្តឃាត បានបាញ់រះ និងចុច បំផ្ទុះខ្សែក្រវ៉ាត់ គ្រាប់បែក សម្លាប់មនុស្ស ១៣០នាក់ នៅ៧កន្លែងផ្សេងគ្នា នៅសង្កាត់ប្រជុំជន ក្នុងក្រុងប៉ារីស។
ជាសរុប ភេរវជន៩នាក់បានស្លាប់ ប៉ុន្តែ ប៉ូលិសអាចកំណត់អត្តសញ្ញាណបានតែ ៦នាក់ ប៉ុណ្ណោះ ដោយសារតែឧក្រិដ្ឋជនភាគច្រើនធ្វើភេរវកម្មអត្តឃាត ដែលបំផ្លាញខ្ទេច រូបរាងកាយ និងធ្វើឲ្យគេពិបាកកំណត់អត្តសញ្ញាណ។ ក្នុងចំណោមភេរវជនដែលប៉ូលិសកំណត់អត្តសញ្ញាណ មាន៥នាក់ជាជនជាតិបារាំង និងម្នាក់ ជាជនជាតិប៊ែលហ្ស៊ិក ដើមកំណើតម៉ារ៉ុក ដែលភាគច្រើនបានចេញទៅប្រយុទ្ធជាមួយក្រុមជីហាតអង្គការរដ្ឋអ៊ីស្លាម។ ប៉ូលិសបារាំងកំពុងស៊ើបអង្កេតបន្តលើអត្តសញ្ញាណរបស់ភេរវជន និងតាមរកភេរវជនម្នាក់ទៀត ដែលកំពុងរត់គេចខ្លួនបាត់ស្រមោលនៅឡើយ។
ភេរវកម្មនៅកណ្តាលក្រុងប៉ារីស បានប៉ះពាល់មិនថា ផ្នែកផ្លូវចិត្តប្រជាជន ប៉ុន្តែ វាប៉ះពាល់ផងដែរ នយោបាយសន្តិសុខ និងសេដ្ឋកិច្ចរបស់ប្រទេសបារាំង។ នៅមួយថ្ងៃក្រោយភេរវកម្ម ប្រធានាធិបតីបារាំង លោកហ្រ្វង់ស័រ ហូឡង់ បានប្រកាសដាក់ប្រទេសឲ្យស្ថិតនៅ ក្នុងភាពអាសន្ន ដែលក្រោយមក ត្រូវបានពន្យារពេលសម្រាប់រយៈពេល៣ខែ។ ប៉ូលិស ទាហាន រាប់ម៉ឺននាក់ ត្រូវបានពង្រាយ ការពារសន្តិសុខ នៅតាមកន្លែងសាធារណៈ។ វិធានការពង្រឹងសន្តិសុខ នៅក្រោយភេរវកម្ម នឹងធ្វើឲ្យរដ្ឋបារាំង ចំណាយលុយ៨៥០លានអឺរ៉ូ នៅឆ្នាំ ២០១៦។ នៅទិដ្ឋភាពសេដ្ឋកិច្ច ភេរវកម្មកណ្តាលក្រុងប៉ារីសធ្វើឲ្យសកម្មភាពទេសចរណ៍ថយចុះ ២៤ភាគរយ ក្នុងរយៈពេល១ខែនេះ ដោយសារតែក្រុមទេសចរបរទេសបានប្តូរទិសដៅ ពីប៉ារីស ដោយសារខ្លាចការវាយប្រហារភេរវកម្ម។
មួយវិញទៀត ភេរវកម្មកណ្តាលក្រុងប៉ារីស ដែលក្រុមជីហាតអង្គការរដ្ឋអ៊ីស្លាមចេញមុខប្រកាសទទួលខុសត្រូវ បានជំរុញឲ្យប្រធានាធិបតីបារាំង បើកប្រតិបត្តិការតាមផ្លូវអាកាស វាយប្រហារទៅលើទីតាំងរបស់ក្រុមជីហាត នៅប្រទេសស៊ីរី។ ភេរវកម្មនៅយប់ថ្ងៃទី ១៣វិច្ឆិកា បានធ្វើឲ្យបារាំងធ្វើយុទ្ធនាការការទូត បញ្ចុះបញ្ចូលឲ្យប្រទេសនៅ អឺរ៉ុប អាមេរិក អារ៉ាប់ និងរុស្ស៊ី រួមគ្នា ប្រយុទ្ធប្រឆាំងនឹងក្រុមជីហាត អង្គការរដ្ឋអ៊ីស្លាមដែលជាក្រុមភេរវនិយម គ្រោះថ្នាក់បំផុត សម្រាប់ពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ