សភាសហភាពអឺរ៉ុបអនុម័តច្បាប់បង្កើតបញ្ជីឈ្មោះអ្នកដំណើរផ្លូវអាកាស PNR
កាលពីថ្ងៃព្រហស្បតិ៍ទី ១៤ មេសា សភាសហភាពអឺរ៉ុប បានបោះឆ្នោតអនុម័តច្បាប់មួយ ស្តីពីការបង្កើតតារាងបញ្ជីទិន្ន័យនៃអ្នកធ្វើដំណើរតាមផ្លូវអាកាស ចេញចូលទូទាំងអឺរ៉ុប។ ប្រទេសសមាជិកសហភាពអឺរ៉ុប អាចមានសិទ្ធិចែករំលែកទិន្ន័យនេះ ជាមួយគ្នាទៅវិញទៅមក ដើម្បីធ្វើការតាមដានទៅលើបុគ្គលណា ដែលអាចត្រូវគេសង្ស័យ ថាជាបណ្តាញភេរវកម្ម។
ចុះផ្សាយនៅថ្ងៃ៖
ស្តាប់ - ០១:៥៦
អស់រយៈពេល៥ឆ្នាំមកហើយ ដែលច្បាប់នេះ ត្រូវបានដាក់ស្នើដោយគណកម្មការអឺរ៉ុប ប៉ុន្តែនៅជាប់គាំងគ្មាននរណាអនុម័តនៅសភាអឺរ៉ុប។ ពួកភេរវជន ដែលបានបង្ករភេរវកម្មនៅក្រុងប៉ារីស និងនៅក្រុងព្រុចសែល បានធ្វើដំណើរចេញចូលដោយសេរី ពីស៊ីរី តួកគី អ៊ីរ៉ាក់ ឆ្លងមកអឺរ៉ុប ដើម្បីរៀបចំធ្វើភេរវកម្ម។ ទើបតែពេលនេះ សភាសហភាពអឺរ៉ុប បានភ្លឺភ្នែក ហើយបានបោះឆ្នោតអនុម័តច្បាប់នេះ។
ច្បាប់នេះគឺធ្វើឡើងដើម្បីបង្កើតបញ្ជីឈ្មោះអ្នកដំណើរផ្លូវអាកាសទាំងអស់ ទូទាំងសហភាពអឺរ៉ុប ដែលភាសាអង់គ្លេសហៅថា Passenger Name Record (PNR) ។ ចាប់ពីពេលនេះទៅ ក្រុមហ៊ុនអាកាសចរណ៍ទាំងអស់ មានកាតព្វកិច្ចផ្តល់ជូននូវបញ្ជីឈ្មោះអ្នកដំណើរទាំងអស់របស់ខ្លួន ទៅដល់អាជ្ញាធរប្រទេសនីមួយៗ។ ហើយប្រទេសសមាជិកសហភាពអឺរ៉ុបទាំងអស់ មានសិទ្ធិចែករំលែកទិន្ន័យនេះ ជាមួយគ្នាទៅវិញទៅមក។ ការធ្វើបែបនេះ ដើម្បីតាមដានសកម្មភាព ការធ្វើដំណើរ របស់ជនណា ដែលចេញចូលទៅកាន់តំបន់គ្រោះថ្នាក់ ដូចជាស៊ីរី អ៊ីរ៉ាក់ រឺតួកគីជាដើម។
ឆ្លងកាត់បទពិសោធន៍ជូចត់ ភេរវកម្មផ្ទួនៗនៅក្រុងប៉ារីស ក្នុងឆ្នាំ២០១៥ និងថ្មីៗនេះ នៅក្រុងព្រុចសែល បារាំងនិងប៊ែកហ្សិក បានជំរុញឲ្យសភាអឺរ៉ុបធ្វើការអនុម័តច្បាប់នេះ ឲ្យបានឆាប់ជាទីបំផុត។ ជាការពិតណាស់ បើសិនច្បាប់នេះ ត្រូវបានគេអនុម័តតាំងពីយូរណាស់មកហើយ ម្លេះគេអាចតាមដានដឹងពីជនណា ដែលធ្លាប់ធ្វើដំណើរចេញចូលញឹកញាប់ ទៅស៊ីរី និងតួកគី ដែលអាចជាមុខសញ្ញាភេរវកម្ម។
គួររំលឹកផងដែរថា ការដែលមានការរាំងស្ទះអស់រយៈពេល៥ឆ្នាំ មិនអនុម័តច្បាប់នេះ គឺដោយសារសមាជិកសភាអឺរ៉ុប ព្យាយាមការពារខ្លាចក្រែងច្បាប់នេះ ត្រូវបានគេយកទៅប្រើប្រាស់ ដោយរំលោភទៅលើសិទ្ធិសេរីភាពបុគ្គល របស់អ្នកធ្វើដំណើរម្នាក់ៗ។ សមាជិកសភាអឺរ៉ុប មួយចំនួន បានទាមទារឲ្យមានការការពារដល់ការសំងាត់នៃទិន្ន័យ ដែលគេប្រមូលបាន មិនឲ្យបែកខ្ចខ្ចាយ រឺប្រើប្រាស់ដោយប្រាសចាសពីកម្មវត្ថុដើម។ យ៉ាងណាមិញ អត្ថបទច្បាប់ផ្សេងទៀត ដែលមានខ្លឹមសារគ្រប់គ្រងការប្រើប្រាស់ទិន្ន័យ PNR នេះក៏ត្រូវបានអនុម័តដោយសភាអឺរ៉ុបផងដែរ នៅថ្ងៃជាមួយគ្នា ដើម្បីជាការធានាដល់សមាជិកសភាអឺរ៉ុប ដែលព្រួយបារម្ភខ្លាចក្រែងមានការរំលោភលើសិទ្ធិបុគ្គល របស់អ្នកដំណើរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ