“សង្គ្រាមការទូត “ រវាងបេឡារុសនិងសហភាពអឺរ៉ុប
ជាចម្លើយតបនឹងទណ្ឌកម្មថ្មីពីខាងសហភាពអឺរ៉ុប រដ្ឋាភិបាលបេឡារុសម្សិលមិញបានកោះហៅទូតខ្លួនចេញពីក្រុង Bruxelles និងពីប្រទេស Pologne ហើយសម្រេចបញ្ជូនចេញពីបេឡារុសនូវអ្នកការទូតជាន់ខ្ពស់ពីរនាក់ដែររបស់អឺរ៉ុប។ ជាប្រតិកម្មបកវិញ សហភាពអឺរ៉ុបក៏កោះហៅចេញពីទីក្រុង Minsk ទៅវិញ ឯកអគ្គរដ្ឋទូតនៃគ្រប់តែ២៧ប្រទេសសហភាពអឺរ៉ុប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៧
មូលហេតុដែលបញ្ឆេះភាពតានតឹងងំជាប់អស់៥ឆ្នាំចុងក្រោយ ឲ្យផ្ទុះឥឡូវនេះទៅជា ”សង្គ្រាមការទូត” គឺមកពីថ្ងៃអង្គារម្សិលមិញថ្នាក់ដឹកនាំសហភាពអឺរ៉ុបដែលមានទីស្នាក់ការនៅក្រុង Bruxelles បានរាប់បញ្ចូលពួកអ្នកមុខអ្នកការបេឡារុស្ ចំនួន២១នាក់ទៀតទៅក្នុង ”បញ្ជីខ្មៅ” ដែលហាមមិនឲ្យធ្វើដំណើរចូលក្នុងសហភាពអឺរ៉ុប។
ក្នុងចំណោម២១នាក់នោះ ១៩នាក់ជាចៅក្រមដែលបានកាត់ទោសពួកប្រឆាំងនៅបេឡារុស្ឲ្យជាប់ពន្ធនាគារតែតាមលេសនយោបាយសុទ្ធសាធ ហើយ២នាក់ទៀតជាមន្ត្រីមហាផ្ទៃ ដែលជាប់ឈ្មោះប្រឡាក់ក្នុងការធ្វើបាបពួកប្រឆាំងគ្មានប្រណីឡើយ។
រាប់ទាំង២១នាក់នេះផង “បញ្ជីខ្មៅ”នៃមន្ត្រីបេឡារុស្ដែលមិនអាចទទួលទិដ្ឋាការចូលក្នុងដែនដីសហភាពអឺរ៉ុប គឺឡើងដល់ ២២៩នាក់ ក្នុងនោះមានលោកប្រធានាធិបតីបេឡារុស្ Alexandre Loukachenko និងកូនប្រុសពីរនាក់របស់គាត់។ ប្រាកដណាស់ បូកទាំងពួកមន្ត្រី ដែលជំនិតៗបំផុតនឹងរូបគាត់ហើយដែលសុទ្ធតែត្រូវទីក្រុង Bruxelles ទម្លាក់ទៅលើនូវនាទីទទួលខុសត្រូវចំពោះការបង្ក្រាបពួកអ្នកដែលហ៊ានប្រឆាំងទល់នឹងលទ្ធផលនៃការបោះឆ្នោតប្រធានាធិបតីឆ្នាំ២០០៤, ២០០៦ ,២០១០ និង ចំពោះការបំបិទសិទ្ធិសេរីភាពនៅបេឡារុស្។ ទណ្ឌកម្មក៏ប្រមើលថា ផ្អាប់ទុកលុយដែលពួកមន្ត្រីបេឡារុស្ទាំងនោះ ផ្ញើនៅតាមធនាគារអឺរ៉ុប។
ក្រសួងការបរទេសបេឡារុស្ ដោយចាត់ទុកថាជា”ការមិនអាចទទួលយកបាន” រាល់ទណ្ឌកម្មនិងគំនាបមកលើបេឡារុស្ បានថ្លែងថាចាប់ពីអំណើះតទៅ គឺហាមមិនឲ្យធ្វើដំណើរចូលបេឡារុស្ឡើយនូវមន្ត្រីណារបស់សហភាពអឺរ៉ុបដែលជាមេចូកចែវ ដាក់ទណ្ឌកម្មទល់នឹងបេឡារុស្។ ភាគីបេឡារុស្ ក៏ព្រមាន ចាត់វិធានការផ្សេងៗទៀត ដើម្បីការពារផលប្រយោជន៍ជាតិរបស់ខ្លួន។
ចំណែកឧត្តមតំណាងរបស់សហភាពអឺរ៉ុបខាងកិច្ចការបរទេស និងនយោបាយសន្តិសុខ លោកស្រី Catherine Ashton ថ្លែងថា ការកោះហៅឯកអគ្គរដ្ឋទូតទាំង២៧ប្រទេសរបស់សហភាពអឺរ៉ុបឲ្យចាកចេញ ពីក្រុង Minsk គឺជា”សញ្ញានៃសាមគ្គីភាព និងឯកភាពធ្លុងមួយ” ទល់នឹងការទាមទាររបស់ភាគីបេឡារុស្ឲ្យឯកអគ្គរដ្ឋទូតប៉ូឡូញ និងប្រមុខបេសកកម្មរបស់សហភាពអឺរ៉ុបចាកចេញពីទីក្រុង Minsk។
ជាការកត់សម្គាល់រូបលោក Alexandre Loukachenko ដែលកាន់តំណែងជាប្រធានាធិបតីនៅបេឡារុស្តាំងពីឆ្នាំ ១៩៩៤មក ហើយដែលល្បីខាងបង្ក្រាបយ៉ាងចាស់ដៃទៅលើរាល់នរណា ដែលហ៊ានចេញមុខប្រឆាំងនឹងគាត់តែងត្រូវមជ្ឈដ្ឋាននយោបាយបស្ចិមលោកឲ្យឈ្មោះថាជា“អ្នកកាន់អំណាចផ្តាច់ការតែម្នាក់ឯងគត់ ដែលនៅសល់នៅទ្វីបអឺរ៉ុប”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ