កាសែតCharlie-Hebdo "លេខរួចពីស្លាប់" លក់ដាច់អស់គ្មានសល់ពីតូប
គ្រាន់តែដាក់ចែកចាយដល់តូបភ្លាម កាសែតCharlie-Hebdo ក៏លក់ដាច់អស់ភ្លាមមួយរំពេញ។ ហេតុដូច្នេះហើយបានជាកាសែតសម្រេចបង្កើនចំនួនបោះផ្សាយ ឱ្យដល់៥លានច្បាប់។ ទំព័រមុខរបស់កាសែតត្រូវបានបង្ហាញឱ្យដឹងជាសាធារណៈតាំងពីថ្ងៃទីចន្ទទី១២ ដែលបញ្ជាក់យ៉ាងច្បាស់ថាក្រុមការងាររួចពីស្លាប់មិនចុះញ៉មទេ និងរក្សាគោលការណ៍ និពន្ធដដែល។ ប៉ុន្តែប្រតិកម្មគាំទ្រ និងប្រឆាំងក៏បានច្រើនធ្លាក់មកជាបន្តបន្ទាប់ដែរ។
ចុះផ្សាយនៅថ្ងៃ៖ កែប្រែថ្ងៃទី៖
តាក់តែងនិពន្ធនិងគូរក្នុងទុក្ខសោក ដោយអ្នកកាសែតរួចពីស្លាប់ក្នុងភេរវកម្មថ្ងៃទី ៧មករា២០១៥ លេខថ្មីរបស់កាសែតស្ហាលីបានចេញលក់នៅថ្ងៃពុធនេះ។
បោះផ្សាយចំនួន៣លានច្បាប់ និងសម្រេចសម្រួចចុងក្រោយ មានដល់ទៅ ១៦៨ទំព័រ ដូចទម្លាប់ កាសែតបានលក់ដាច់អស់រលីង តាំងពីបើកទ្វារភ្លាម។
ក្នុងអត្ថន័យរក្សាទម្លាប់ “កំប្លែងឱ្យសើច" គោលការណ៍និពន្ធ រិះគន់នយោបាយ សាសនា បន្តឆ្លុះបញ្ចាំងនៅក្នុងទំព័រកាសែតលេខ១១៧៨។ សម្រាប់លោក Luz ដែលជាអ្នកគូររូបនៅទំព័រមុខ ម៉ូហាម៉េត កាន់បដា “Je suis Charlie” ខ្ញុំជាស្ហាលីអមដោយចំណងជើង “អត់អោនទោសឱ្យទាំងអស់” បានពន្យល់អំពីជម្រើសនេះថា ៖
“មិនមែនជាទំព័រមុខដែលពិភពលោកចង់បាន តែយើងចង់ មិនមែនជាទំព័រមុខដែលពួកភេរវជនជីហាតចង់ឃើញតែយើងគូរ ព្រោះគ្មានន័យភេរវកម្មទេ មានតែបុរសម្នាក់យំ បុរសនោះគឺម៉ូហាម៉េត ! ខ្ញុំសូមទោស ដែលត្រូវគូសរូបថ្លុកម៉ូហាម៉េតជាថ្មីទៀត ប៉ុន្តែគ្មានន័យបង្កប់ ម៉ូហាម៉េតដែលយើងគូរនេះ គឺគ្រាន់តែជារូបមនុស្សម្នាក់យំ តែប៉ុណ្ណោះ”។
ចេញផ្សាយមួយសប្តាហ៍ក្រោយភេរវកម្មសម្លាប់អ្នកកាសែតអស់១២នាក់ កាសែតស្ហាលី បកប្រែជា១៦ភាសា និងបញ្ជូនទៅលក់ក្នុងប្រទេសចំនួន២៥ បានទទួលការស្វាគមន៍គាំទ្រយ៉ាងខ្លាំង។ ពិភពអ្នកកាសែត តាំងពីអឺរ៉ុបឆ្លងដល់អូស្ត្រាលី បាននាំគ្នាចម្លងរូបទំព័រមុខរបស់ស្ហាលីលេខរួចពីស្លាប់នេះ ដោយគ្មានបង្អង់។ ប៉ុន្តែរូបថ្លុកម៉ូហាម៉េត ស្រក់ទឹកភ្នែក កាន់បដាខ្ញុំជាស្ហាលី មិនបានធ្វើឱ្យអ្នកកាន់សាសនាអ៊ីស្លាមរីករាយជាមួយឡើយ។
តំណាងអ៊ីស្លាមស៊ុននីតនៅអេហ្ស៊ីប យល់ថាជាប្រមាថព្រះ និងជាការចាក់ស្រេសឱ្យមានភាពស្អប់ខ្ពើមគ្នា។ នៅប៉ាគីស្ថានវិញ បាតុកម្មតូចមួយបានរៀបចំឡើងដើម្បីសរសើរភេរវជនសម្លាប់អ្នកកាសែតស្ហាលី។ នៅតួកគីដែលមានលក់កាសែតស្ហាលីដែរ ធ្លាប់ត្រូវបានរដ្ឋមន្ត្រីអ៊ីស្លាមអភិរក្ស បរិហារថាកាសែតញុះញង់។ តែនៅក្នុងប្រទេសបារាំងវិញ សហគមន៍អ៊ីស្លាម បានអំពាវនាវឱ្យពលរដ្ឋអ្នកកាន់សាសនាអ៊ីស្លាមទាំងអស់អត់ធ្មត់ រក្សាភាពស្ងប់ស្ងាត់ និងគោរពសេរីភាពនៃការបញ្ចេញមតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ