ពិភពលោកកំពុងព្រមព្រៀងបំពាក់ប្រព័ន្ធកំណត់ទីតាំងយន្តហោះដោយផ្កាយរណប
យន្តហោះម៉ាឡេស៊ី MH ៣៧០ ហោះចេញពីក្រុងកូឡាឡាំពួរទៅកាន់ក្រុងប៉េកាំង ដែលបានបាត់ដានឈឹងកាលពីថ្ងៃទី ៨ ខែមីនា ឆ្នាំ២០១៤ ស្ថិតជាអាថ៌កំបាំងដ៏ចម្លែកមួយនៃប្រវត្តិអាកាសចរណ៍ស៊ីវិលពិភពលោក។ ដើម្បីកុំឱ្យហេតុការណ៍សោកនាដកម្មបាត់យន្តហោះនេះកើតឡើងជាថ្មីទៀត សហគមន៍អន្តរជាតិនឹងចុះហត្ថលេខាលើកិច្ចព្រមព្រៀងមួយបំពាក់ប្រព័ន្ធកំណត់ទីតាំងយន្តហោះដោយផ្កាយរណប លើគ្រប់យន្តហោះទាំងអស់។ នេះបើតាមការគូសបញ្ជាក់របស់ថ្នាក់ដឹកនាំជាន់ខ្ពស់អាមេរិក នៅថ្ងៃម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
នៅថ្ងៃអនាគត ទំនងជាគ្មានទៀតទេ ហេតុការណ៍បាត់យន្តហោះឈឹង ដូចករណីយន្តហោះម៉ាឡេស៊ី MH៣៧០ ព្រោះក្រុមប្រទេសជាង១៦០ នឹងចុះហត្ថលេខាលើកិច្ចព្រមព្រៀងបំពាក់ប្រព័ន្ធកំណត់ទីតាំងលើគ្រប់យន្តហោះទាំងអស់។ សន្ធិសញ្ញានេះនឹងចេញជារូបរាងនៅដើមសប្តាហ៍ក្រោយ។
តាំងពីថ្ងៃចន្ទនិងរហូតដល់ថ្ងៃទី ២៧ វិច្ឆិកានេះ តំណាងប្រតិភូ ជាអ្នកឯកទេសជំនាញអាកាសចរណ៍ ជាអ្នកការទូត មកពីជាង១៦០ប្រទេស បានជួបប្រជុំគ្នា នៅទីក្រុងហ្សឺណែវ ក្នុងសន្និសីទវិទ្យុ-ទូរគមនាគមន៍ (Radiocommunication)ពិភពលោក។ សន្និសីទនេះ ត្រូវបានរៀបចំធ្វើជារៀងរាល់បី ឬបួនឆ្នាំម្តង ក្រោមការដឹកនាំរបស់អង្គការសហភាពទូរគមនាគមន៍អន្តរជាតិ ដែលជាស្ថាប័នមួយរបស់អង្គការសហប្រជាជាតិទទួលបន្ទុក និងមានឯកទេសផ្នែកបច្ចេកវិទ្យាព័ត៌មានវិទ្យា និងទូរគមនាគមន៍។
នាឱកាសសន្និសីទអន្តរជាតិលើកនេះ ប្រធានបទនៃការពិភាក្សាផ្តោតជាសំខាន់ទៅលើការតាមដានការហោះហើររបស់យន្តហោះនីមួយៗ កំរិតពិភពលោកតែម្តង។ យន្តហោះMH៣៧០ បានបាត់ដានឈឹងពីអេក្រង់រ៉ាដា កាលពីថ្ងៃទី ៨ មីនា ឆ្នាំ២០១៤ វេលាម៉ោង១និង២០នាទីយប់ បន្ទាប់ពីបានហោះចេញពីក្រុងកូឡាឡាំពួរបានបន្តិច សំដៅក្រុងប៉េកាំងប្រទេសចិន។ អ្នកឯកទេសប៉ាន់ស្មានថា យន្តហោះដែលមានផ្ទុកអ្នកដំណើរនិងបុគ្គលិក ២៣៩នាក់ទំនងជាបានធ្លាក់ក្នុងមហាសមុទ្ទឥណ្ឌា ជិតឆ្នេរសមុទ្ទអូស្ត្រាលី។ បំណែកស្លាបយន្តហោះមួយដុំ ដែលទើបត្រូវរកឃើញ កាលពីខែកក្កដាកន្លងទៅថ្មីៗនេះ នៅក្បែងកោះរ៉េអ៊ុយនីញ៉ុង បញ្ជាក់បន្ថែមអំពីសម្មិតិកម្មនៃការធ្លាក់យន្តហោះ តែមិនបានផ្តល់ចម្លើយថា ធា្លក់នៅទីណាឡើយ។
បើតាមលោកឯកអគ្គរដ្ឋទូតអាមេរិកប្រចាំទីក្រុងហ្សឺណែវ ដែលប្រធានក្រុមប្រតិភូអាមេរិក ក្នុងសន្និសីទអន្តរជាតិនេះ ពិភពលោកកំពុងតែរកឃើញដំណោះស្រាយមួយទាក់ទងនឹងការតាមដានការហោះហើររបស់យន្តហោះ ដោយនឹងមានការចុះហត្ថលេខាលើកិច្ចព្រមព្រៀង បំពាក់ប្រព័ន្ធផ្កាយរណបកំណត់ទីតាំងយន្តហោះ។ សហគមន៍អន្តរជាតិបានយល់ស្របគ្នាអំពីភាពចាំបាច់នៃការអនុញ្ញាតដាក់ប្រព័ន្ធផ្កាយរណបឱ្យតាមដានការហោះហើររបស់យន្តហោះ។
ប្រព័ន្ធផ្កាយរណបកំណត់ទីតាំងហោះហើរ
អង្គការអាកាសចរណ៍ស៊ីវិលអន្តរជាតិ ចង់ដាក់បង្ខំឱ្យគ្រប់យន្តហោះនឹងត្រូវមានបំពាក់ប្រព័ន្ធនេះ ជាចាំបាច់ ចាប់ពីចុងឆ្នាំ២០១៦ទៅ។
តាមរយៈប្រព័ន្ធផ្កាយរណបកំណត់ទីតាំងនេះ គេនឹងអាចតាមដានការហោះហើររបស់យន្តហោះ នៅគ្រប់ទិសទី គ្រប់ម៉ោង និងគ្រប់កាលៈទេសៈ។ គេនឹងបានទទួលព័ត៌មានកំណត់ទីតាំងហោះហើរនៅរាល់គ្រប់នាទី និងដោយជាក់ស្តែងតែម្តង។
សព្វថ្ងៃនេះ យន្តហោះក៏មានបំពាក់ប្រព័ន្ធកំណត់ទីតាំងហោះហើរដែរ តែជាប្រព័ន្ធរ៉ាដា ចាប់ពីប៉ុស្តិ៍ត្រួតពិនិត្យនៅលើដី ដែលមានសមត្ថភាពចាប់ទីតាំងហោះហើរនៅមានកំរិត។ នៅពេលយន្តហោះទៅឆ្លងសមុទ្ទ ឬមហាសមុទ្ទទៅឆ្ងាយពីឆ្នេរ ឬហោះក្នុងរយៈកម្ពស់ទាបជ្រុលពេក ប្រព័ន្ធរ៉ាដាមិនអាចចាប់បាន ហើយជួនកាលយន្តហោះហោះក្នុងរយៈពេលពីរបី ឬជាច្រើនម៉ោង ក្នុងដែនអាកាសមួយដែលគ្មានប្រព័ន្ធរ៉ាដាសោះ។
ប៉ុន្តែជាមួយនឹងប្រព័ន្ធថ្មីនេះ គ្មានទៀតទេ ពាក្យបាត់យន្តហោះពីភ្នែក ! នៅក្នុងករណីធម្មតា យន្តហោះនឹងបញ្ជូនព័ត៌មាន ទៅឱ្យប្រព័ន្ធផ្កាយរណប ដែលរួចមកផ្ទេរព័ត៌មានទាំងអស់ ដោយភ្លាមៗទៅឱ្យការិយាល័យត្រួតពិនិត្យនិងថែទាំយន្តហោះរបស់ក្រុមហ៊ុន នៅលើដី។ ក្នុងករណីមានហេតុការណ៍មិនធម្មតាអ្វីកើតឡើង ដូចជា មានភ្លៀងព្យុះរន្ទះ ឬម៉ូទ័រណាមួយឆេះ យន្តហោះផ្តល់សញ្ញាញាប់ឡើងៗ ហើយផ្កាយរណប បញ្ជូនព័ត៌មាន មកដី រាល់គ្រប់មួយនាទីម្តងៗ។
វិធានការនេះ មិនមែន និងមិនអាចបញ្ចៀសគ្រោះថ្នាក់ធ្លាក់យន្តហោះទេ។ ប៉ុន្តែប្រសិនបើមានហេតុការណ៍កើតឡើង ជាយថាហេតុណាមួយ ភ្នាក់ងារអាកាសចរណ៍ស៊ីវិលអាចនឹងដឹងបានភ្លាមថាយន្តហោះនោះធ្លាក់នៅកន្លែងណា ធ្លាក់បុកលើដី លើទឹកត្រង់ណា។ ដូច្នេះការធ្វើអន្តរាគមន៍ក៏បានលឿន ក្តីសង្ឃឹមថានឹងអាចជួយសង្គ្រោះជីវិតមនុស្សក៏មានច្រើន ឬក៏ឆាប់រកឃើញបំណែកយន្តហោះ និងជាពិសេសទៅទៀត គឺមិនខាតពេលវេលាតាមស្វែងរក មិនបានសម្រេចដូចការបាត់យន្តហោះម៉ាឡេស៊ីMH៣៧០ទៀត។
ក្រៅអំពីការបំពាក់ប្រព័ន្ធផ្កាយរណបកំណត់ទីតាំងហោះហើរយន្តហោះនេះ អង្គការអាកាសចរណ៍ស៊ីវិលអន្តរជាតិ ចង់ឱ្យតម្រូវឱ្យគ្រប់យន្តហោះមានបំពាក់ប្រអប់ខ្មៅ អាចខ្ទាតចេញពីយន្តហោះបាន នៅពេលមានការប៉ះទង្គិច ឬផ្ទុះឆេះ។ ប្រអប់ខ្មៅនេះមិនត្រឹមតែធន់នឹងភ្លើងទេ តែត្រូវអណ្តែតទឹកទៀត។ តែវិធានការនេះនឹងត្រូវលើកយកទៅពិភាក្សាគ្នា និងអនុវត្តចាប់ពីឆ្នាំ២០២១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ