បាត់យន្តហោះម៉ាឡេស៊ី MH៣៧០៖ម៉ាឡេស៊ី អូស្រ្តាលី និងចិនប្រកាសពង្រីកវិសាលភាពនៃការស្វែងរក
នៅថ្ងៃព្រហស្បតិ៍ ទី១៦ មេសានេះ រដ្ឋអំណាចនៃប្រទេសម៉ាឡេស៊ី អូស្រ្តាលី និងប្រទេសចិនបានប្រកាសឲ្យដឹងថា ពួកគេនឹងពង្រីកវិសាលភាពនៃការស្វែងរកយន្តហោះម៉ាឡេស៊ីមួយគ្រឿងដែលបានបាត់ខ្លួនកាលពីជាង ១ឆ្នំាមុន ប្រសិនបើប្រតិបត្តិការស្វែងរកសព្វថ្ងៃមិនទទួលបានលទ្ធផលអ្វីទេនោះ។ គួររម្លឹកជូនថា យន្តហោះមួយគ្រឿងរបស់ក្រុមហ៊ុន Malaysia Airlines ដែលមានជើងហោះហើរលេខ MH៣៧០ បានបាត់ខ្លួនសូន្យឈឹងតំាងពីថ្ងៃទី៨ មីនា ឆ្នំា ២០១៤ ជាមួយនឹងអ្នកដំណើរចំនួន ២៣៩នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
គឺនៅក្រោយកិច្ចប្រជុំក្នុងទីក្រុងកូឡាឡំាពួរថ្ងៃនេះដែលថ្នាក់ដឹកនំាទំាង ៣ប្រទេស គឺម៉ាឡេស៊ី អូស្រា្តលី និងចិនបានចេញផ្សាយសេចក្តីជូនដំណឹងរួមមួយដោយបញ្ជាក់ថា ប្រសិនបើប្រតិបត្តិការស្វែងរកនៅក្នុងមហាសមុទ្រឥណ្ឌាបច្ចុប្បន្នមិនបានផ្តល់លទ្ធផលអ្វីទេ នោះពួកគេនឹងពង្រីកវិសាលភាពនៃការស្វែងរកលើផ្ទៃក្រឡាសមុទ្រឲ្យដល់ទំហំ ១២០ ០០០ម៉ែត្រក្រឡា។ លោករដ្ឋមន្រ្តីក្រសួងដឹកជញ្ជូនម៉ាឡេស៊ីបានថ្លែងនៅក្រោយជំនួបជាមួយសមភាគីអូស្រ្តាលី និងចិនថា ការសម្រេចពង្រីកវិសាលភាពនៃការស្វែងរកបានធ្វើឡើង ដោយផ្អែកលើអនុសាសន៍របស់ក្រុមប្រឹក្សាអ្នកជំនាញនៃក្រុមយុទ្ធសាស្រ្តស្រាវជ្រាវ។ សព្វថ្ងៃនេះ ប្រតិបត្តិការស្វែងរកកំពុងធ្វើឡើងលើផ្ទៃក្រឡាទឹកសមុទ្រទំហំ ៦០ ០០០គីឡូម៉ែត្រក្រឡា ហើយនៅពេលខាងមុខនឹងត្រូវគុណបន្ថែមទ្វេដង គឺទំហំ ១២០ ០០០គីឡូម៉ែត្រក្រឡា។
សូមរម្លឹកជូនឡើងវិញថា យន្តហោះមួយគ្រឿងប្រភេទប៊ូអ៊ីង ៧៧៧ របស់ក្រុមហ៊ុន Malaysia Airlines ដែលមានជើងហោះហើរលេខ MH៣៧០ និងដែលបានហោះពីទីក្រុងកូឡាឡាំពួរទៅកាន់ទីក្រុងប៉េកំាងជាមួយនឹងអ្នកដំណើរសរុប ២៣៩នាក់ក្នុងថ្ងៃទី៨ មីនា ឆ្នំា ២០១៤ បានបាត់ដំណឹងឈឹង បន្ទាប់ពីហោះឡើងបាន ១ម៉ោង។ គិតមកដល់ថ្ងៃនេះ គឺមានរយៈពេលជាង ១ឆ្នំាមកហើយដែលការស្វែងរកត្រូវបានគេធ្វើឡើងនៅប៉ែកខាងត្បូងមហាសមុទ្រឥណ្ឌាដែលគេគិតថាជាតំបន់ដែលយន្តហោះនោះបានធ្លាក់។ តែថ្នាក់ដឹកនំាទំាង ៣ប្រទេសបានប្រាប់ឲ្យដឹងថា ការពង្រីកវិសាលភាពនៃការស្វែងរកទ្វេដងនឹងត្រូវបន្ថែមពេលស្វែងរកចំនួន ១ឆ្នំាបន្ថែមទៀត។
គួរបញ្ជាក់ជូនថា កាលពីថ្ងៃទី៨ មីនាកន្លងទៅដែលជាថ្ងៃខួប ១ឆ្នំានៃការបាត់យន្តហោះ ក្រុមអ្នកជំនាញឯករាជ្យបានចេញផ្សាយរបាយការណ៍មួយដែលមិនបានផ្តល់មូលហេតុច្បាស់លាស់ជុំវិញការបាត់ខ្លួនយន្តហោះទេ។ ហេតុផលដែលថ្នាក់ដឹកនំាផ្នែកស៊ើបអង្កេតបានផ្តល់ពេលនេះគឺថា ប្រហែលជាបរិមាណខ្យល់អុកស៊ីសែនបានធា្លក់ចុះខ្លំាងរហូតធ្វើឲ្យអ្នកដំណើរទំាងអស់សន្លប់បាត់ស្មារតី ហើយគឺពីឡុតស្វ័យប្រវត្តិជាអ្នកបន្តបើកយន្តហោះរហូតដល់ធ្លាក់ក្នុងសមុទ្រដោយសារតែអស់សំាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ