បារាំងបោសសម្អាតអ្នកផ្តាច់ខ្លួនជ្រុលនិយមអ៊ីស្លាមនៅអាកាសយានដ្ឋាន
ភេរវកម្មនៅប៉ារីស ថ្ងៃទី ១៣វិច្ឆិកា បានបន្សល់ទុកនូវផលវិបាកយ៉ាងច្រើន។ ប្រទេសស្ថិតក្រោមភាពអាសន្នរយៈពេលបីខែ ប៉ូលិសអាចធ្វើការឆែកឆេរ ចាប់ខ្លួន បង្ឃាំងនៅតាមគេហដ្ឋាន បុគ្គលសង្ស័យ ដោយមិនរង់ចាំសេចក្តីសម្រេចរបស់តុលាការ។ នៅថ្ងៃអាទិត្យនេះ អគ្គនាយកក្រុមហ៊ុនគ្រប់គ្រងអាកាសយានដ្ឋានប៉ារីស បានបញ្ជាក់ថា មានបុគ្គលិកក្នុងតំបន់សន្តិសុខរបស់អាកាសយានដ្ឋាន ចំនួន៧០នាក់ ត្រូវបានប៉ូលិសដកហូតបណ្ណការងារ ព្រោះពួកគេមានជាប់ពាក់ព័ន្ធ នឹងការផ្តាច់ខ្លួនជាអ្នកអ៊ីស្លាមជ្រុលនិយម។
ចុះផ្សាយនៅថ្ងៃ៖
ស្តាប់ - ០១:៤៨
និន្នាការផ្តាច់ខ្លួនជាអ្នកអ៊ីស្លាមជ្រុលនិយម និងអ្នកជាប់ក្នុងបញ្ជីS ជាជនសង្ស័យគួរតាមដាន មានកប់នៅក្នុងស្ទើរគ្រប់ស្ថាប័ន។ អាកាសយានដ្ឋានប៉ារីស តំបន់ដ៏រសើបដែលទាមទារការរក្សាសន្តិសុខពិសេស មិនបានគេចផុតពីក្រសែភ្នែកប៉ូលិសទេ។ ក្នុងរយៈពេលតែមួយ គិតចាប់តាំងពីក្រោយហេតុការណ៍ភេរវកម្មប៉ារីសមក មានបុគ្គលិកក្នុងតំបន់សន្តិសុខពិសេសនៃអាកាសយានដ្ឋាន៧០នាក់ ត្រូវបានប៉ូលិសដកហូតបណ្ណការងារ និង ឆែកឆេរទូរឯកជននៅកន្លែងធ្វើការរបស់បុគ្គលិកជាង៤០០០នាក់។ ការដកហូតបណ្ណក្រហម គឺមានន័យស្មើនឹងការអនុញ្ញាតឱ្យក្រុមហ៊ុនអាចបណ្តេញចេញបុគ្គលិកនៅតំបន់សន្តិសុខពិសេសរបស់អាកាសយានដ្ឋាន ពីការងារ ដោយស្របច្បាប់សម្រាប់ និងប្តូរទៅបញ្ឈរជើងនៅកន្លែងផ្សេង បើជាបុគ្គលិកក្រៅតំបន់សន្តិសុខ។
បច្ចុប្បន្ន តំបន់សន្តិសុខពិសេសរបស់អាកាសយានដ្ឋាន ត្រូវការបុគ្គលិកធ្វើការចំនួន ៨៥០០០នាក់ សម្រាប់ទទួលខុសត្រូវខាងផ្នែកជញ្ជូនអីវ៉ាន់ វ៉ាលី ចាក់សាំងយន្តហោះ សម្អាតផ្លូវយន្តហោះ ឬជាក្រុមអ្នកឆែកឆេរវ៉ាលីយួរដៃ (ពេលឆែកត្រូវមានវត្តមានប៉ូលិសបីនាក់)។
ភ្នាក់ងារក្នុងតំបន់សន្តិសុខនេះ មានពាក់ផ្លាកការងារ ពណ៌ក្រហម ! និងបានទទួលការបំពាក់បំប៉នពិសេស ដូចជាត្រូវមានកាតព្វកិច្ចចេះសម្គាល់ឥរិយាបថមិនប្រក្រតីរបស់អ្នករួមការងារ ដោយត្រូវឃ្លាំមើលគ្នាទៅវិញទៅមក។ មានន័យថា អ្នកពាក់បណ្ណក្រហម ស្ថិតក្រោមការតាមដានរហូត។
ជាធម្មតា បណ្ណក្រហមមានសុពលភាពបីឆ្នាំ ប៉ុន្តែនៅថ្ងៃនេះ ប៉ូលិសប៉ារីស បានធ្វើតេស្តថ្មីឡើងវិញទាំងអស់ ដោយមិនគិតអំពីអាយុកាលនៃអ្នកពាក់បណ្ណក្រហមនេះទេ។ ព្រោះសូមបញ្ជាក់ថា ភេរវកម្មថ្ងៃទី ១៣វិច្ឆិកា ចរាចរណ៍ផ្លូវអាកាសបានធ្លាក់ចុះអស់៦% ឯការរក្សាសន្តិសុខវិញ អាកាសយានដ្ឋានបានដំឡើងចំនួនទាហានដើរល្បាតដល់ទៅ៥០%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ