តួកគី-បារាំង៖លោកអ៊ែរដូហ្កានដំឡើងសម្លេងខ្លាំងៗដាក់លោកម៉ាក្រុងក្នុងរឿងប្រល័យពូជសាសន៍លើជនជាតិអាមេនី
ប្រទេសតួកគីបានដំឡើងសម្លេងខ្លាំងៗជាថ្មីដាក់ប្រទេសបារាំងពាក់ព័ន្ធនឹងសំណុំរឿងប្រល័យពូជសាសន៍លើជនជាតិអាមេនីកាលពី ១០៤ឆ្នាំមុន។ ថ្លែងនៅចំពោះមុខថ្នាក់ដឹកនាំគណបក្សនាថ្ងៃសៅរ៍ ទី២៧ មេសា ប្រធានាធិបតីតួកគីលោកអ៊ែរដូហ្កានមិនញញើតនឹងវាយប្រហារត្រង់លើសមភាគីបារាំងលោកម៉ាក្រុង។ លោកអ៊ែរដូហ្កានមិនសប្បាយចិត្តនឹងលោកម៉ាក្រុងដែលបានសម្រេចកំណត់យកថ្ងៃទី២៤ មេសា ជាទិវាជាតិដើម្បីចូលរួមរម្លឹកអំពើប្រល័យពូជសាសន៍លើជនជាតិអាមេនី។ គួររម្លឹកថានៅ ១០៤ឆ្នាំមុន ពោលក្នុងថ្ងៃទី២៤ មេសា ឆ្នាំ ១៩១៥ មានព្រឹត្តិការណ៍សម្លាប់រង្គាលលើជនជាតិអាមេនីពី ១ ២០០ ០០០ ទៅ ១ ៥០០ ០០០នាក់ពីសំណាក់រដ្ឋអំណាចតួកគី។ តែតួកគីបាន និងកំពុងបន្តបដិសេធពីការទទួលខុសត្រូវរបស់ខ្លួនមកដល់សព្វថ្ងៃ។
ចុះផ្សាយនៅថ្ងៃ៖
ស្តាប់ - ០២:៣៣
នេះមិនមែនជាលើកទី១ ហើយក៏ប្រហែលជាមិនមែនជាលើកចុងក្រោយដែរដែលប្រធានាធិបតីតួកគីលោកអ៊ែរដូហ្កានបានវាយប្រហារដោយសម្តីខ្លាំងៗដាក់ប្រធានាធិបតីបារាំងលោកម៉ាក្រុង។ « បញ្ជូនសារទៅកាន់ប្រជាជនអាមេនីចំនួន ៧០០ ០០០នាក់ដែលកំពុងរស់នៅក្នុងទឹកដីបារាំងនឹងមិនអាចជួយស្រោចស្រង់ឯងបានឡើយ លោកម៉ាក្រុង » នេះជាសម្តីដែលលោកអ៊ែរដូហ្កានបានថ្លែងនៅចំពោះមុខថ្នាក់ដឹកនាំគណបក្សរបស់លោកនៅតំបន់ប៉ែកខាងជើងទីក្រុងអង់ការ៉ានាថ្ងៃសៅរ៍ ទី២៧ មេសា។ មនុស្សខ្លាំងតួកគីរូបនេះដដែលថែមទាំងបានប្រៀនប្រដៅលោកម៉ាក្រុងឲ្យធ្វើជាមនុស្សមានគុណធម៌ក្នុងរឿងនយោបាយ និងថា បើលោកម៉ាក្រុងមិនមែនជាមនុស្សរបៀបនេះទេ នោះលោកម៉ាក្រុងនឹងមិនអាចទទួលជោគជ័យបានឡើយ។
លោកអ៊ែរដូហ្កានបានបញ្ជាក់ថា លោកក៏ធ្លាប់បាននិយាយរឿងដដែលនេះប្រាប់លោកម៉ាក្រុងដោយផ្ទាល់អស់ច្រើនដងមកហើយ។ ប្រតិកម្មក្តៅក្រហាយរបស់លោកអ៊ែរដូហ្កានពេលនេះបានផ្ទុះឡើង បន្ទាប់ពីលោកម៉ាក្រុងបានសម្រេចលើកទី១ ក្នុងឆ្នាំ ២០១៩ ដោយកំណត់យកថ្ងៃទី២៤ មេសាជាទិវាជាតិដើម្បីចូលរួមរម្លឹកអំពើប្រល័យពូជសាសន៍លើជនជាតិអាមេនី។ ក្រៅពីបារាំង នៅមានប្រទេសប្រមាណចំនួន ៣០ និងសហគមអ្នកប្រវត្តិសាស្រ្តក៏បានទទួលស្គាល់ និងកំណត់យកថ្ងៃដូចគ្នានេះដែរ។ គួររម្លឹកថាកាលថ្ងៃទី២៤ មេសា ឆ្នាំ ១៩១៥ មានព្រឹត្តិការណ៍សម្លាប់រង្គាលលើជនជាតិអាមេនីពី ១ ២០០ ០០០ ទៅ ១ ៥០០ ០០០នាក់ពីសំណាក់រដ្ឋអំណាចតួកគី។ តែតួកគីបន្តបដិសេធមិនទទួលស្គាល់ និងមិនព្រមឲ្យប្រើពាក្យ « ប្រល័យពូជសាសន៍ »។
ទីក្រុងអង់ការ៉ាបានលើកឡើងពីការសម្លាប់រង្គាលនៅក្នុងសង្រ្គាមស៊ីវិល និងគ្រោះទុរ្ភិក្សរវាងក្រុមទាំងសងខាងដោយមិនបានលំអិតអ្វីបន្ថែមទេ។ គួររម្លឹកថាក្នុងខែកុម្ភៈកន្លងទៅ លោកអ៊ែរដូហ្កានធ្លាប់បានចោទបារាំងពីបទប្រព្រឹត្តិអំពើប្រល័យពូជសាសន៍នៅអាល់ហ្សេរីក្នុងសម័យអាណានិគម និងបានចូលរួមចំណែកនៅក្នុងអំពើប្រល័យពូជសាសន៍នៅរវ៉ាន់ដា។ លោកម៉ាក្រុងនៅមិនទាន់បានឆ្លើយតបយ៉ាងណានឹងប្រតិកម្មរបស់លោកអ៊ែរដូហ្កានក្នុងថ្ងៃសៅរ៍ ទី២៧ នេះទេ។ តែនាយករដ្ឋមន្រ្តីបារាំងលោក Edouard Philippe បានថ្លែងក្នុងថ្ងៃពុធ ទី២៤ មេសានាឱកាសរម្លឹកខួប ១០៤ឆ្នាំនៃអំពើប្រល័យពូជសាសន៍លើជនជាតិអាមេនីថា ប៉ារីសមានបំណងចូលរួមទទួលស្គាល់អំពើប្រល័យពូជសាសន៍លើជនជាតិអាមេនីជាឧក្រិដ្ឋកម្មប្រឆាំងមនុស្សជាតិ និងមិនចាប់អារម្មណ៍នឹងពាក្យកុហកណាមួយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ