កាសែតបារំាងទំាងអស់ចេញផ្សាយថ្ងៃទី៨ មករាបានចូលរួមកាន់ទុក្ខជាមួយ Charlie Hebdo
នៅថ្ងៃព្រហស្បតិ៍ ទី៨ មករានេះ គ្រប់កាសែតបារំាងទំាងអស់បាននំាគ្នាផ្តោតសំខាន់លើព្រឹត្តិការណ៍បាញ់ប្រហារលើអ្នកកាសែតរបស់ទស្សនាវដ្តី Charlie Hebdo ចំកណ្តាលទីក្រុងប៉ារីស។ កាសែតបានចូលរួមគោរពវិញ្ញាណក្ខន្ធដោយក្តីគ្រាមក្រំ និងកំហឹងក្តៅក្រហាយ។
ចុះផ្សាយនៅថ្ងៃ៖
ស្តាប់ - ០២:២៨
« ខ្ញុំជា Charlie » « យើងទំាងអស់គ្នាជា Charlie » នេះជាចំណងជើងដែលគ្រប់កាសែតទំាងអស់ មាន Libération Figaro L’Humanité Parisien l’Equipe La Voix du Nord La Montagne Télégramme ឬមួយក៏ Nice-Matin ជាដើមបានយកមកចុះផ្សាយនៅទំព័រមុខរបស់ខ្លួនជាមួយនឹងផ្ទៃពណ៌ខ្មៅពេញមួយទំព័រមុខ។ ផ្ទៃពណ៌ខ្មៅដែលកាសែតចង់សម្តែងការចូលរួមកាន់ទុក្ខជាមួយទស្សនាវដ្តី Charlie Hebdo ពិសេសសហសេវិកតាទំាង ១២នាក់ដែលបានបាត់បង់ជីវិតក្រោមគ្រាប់កំាភ្លើងរបស់ពួកភេរវជន។
« គឺសេរីភាពដែលត្រូវបានគេធ្វើឃាត » នេះជាចំណងជើងរបស់កាសែត Le Figaro និង L’Humanité។ សេរីភាពដែលកាសែតបានលើកឡើងថា មានសេរីភាពក្នុងការបញ្ចេញមតិ សិទ្ធិក្នុងការនិយាយស្តី សិទ្ធិក្នុងការសើចលេងសប្បាយ និងសិទ្ធិផ្សេងៗទៀត។ « Charlie Hebdo គឺជាការសើចប្រកបដោយឈ្លាសវៃ សើចគ្មានមេត្តា ការចំអកបញ្ឈឺចិត្ត និងការឡកឡាយពោរពេញដោយក្តីសង្ឃឹម » នេះជាចំណាប់អារម្មណ៍របស់កាសែត La Libération។ សម្រាប់កាសែត Le Parisien កាសែតមួយនេះបាននិយាយចំថា ការវាយប្រហារ Charlie Hebdo គឺជាការវាយប្រហារលើនិមិត្តរូបនៃសិទ្ធិសេរីភាពមនុស្សលោក សិទ្ធិនិយាយស្តី សិទ្ធិសរសេរ និងសិទ្ធិធ្វើអត្ថាធិប្បាយដោយសេរី។ Le Parisien បានបន្តថា ការដែលប្រជាពលរដ្ឋបារំាងបាននំាគ្នាចុះផ្លូវដើម្បីចូលរួមរំលែកទុក្ខជាមួយ Charlie Hebdo ពេលនេះ ជាសក្ខីកម្មមួយបញ្ជាក់ថា អាវុធដ៏មានប្រសិទ្ធភាពរបស់យើងនៅពេលនេះ គឺការបន្តបញ្ចេញមតិទំាងអស់គ្នា ដោយមិនត្រូវទុកឲ្យពួកឃាតករសម្លាប់សេរីភាព និងតម្លៃរបស់មនុស្សលោកបានឡើយ។
កាសែត Le Figaro ក៏បានយល់ឃើញដូច Le Parisien ដែរដោយបានសរសេរថា ប្រឈមនឹងសង្រ្គាម កាតព្វកិច្ចដំបូងដែលត្រូវធ្វើ គឺការរួមគ្នាជាធ្លុងមួយ ដោយមិនប្រកាន់ពូជសាសន៍ ការរើសអើងនយោបាយ ឬសាសនា។ Le Figaro បានបញ្ចប់ដោយសន្និដ្ឋានថា នៅពេលដែលមានសង្រ្គាមផ្ទុះហើយ គេត្រូវតែយកឈ្នះលើសង្រ្គាមនោះឲ្យបាន។ ងាកទៅមើលកាសែត Sud Ouest វិញ កាសែតតំបន់មួយនេះបានយល់ឃើញថា ពេលវេលាបានមកដល់ហើយដែលម្នាក់ៗត្រូវជ្រើសរើស រវាងសេរីភាព ឬការស្អប់គ្នា រវាងសន្តិភាព និងសង្រ្គាម ឬក៏រវាងលទ្ធិប្រជាធិបតេយ្យ និងរបបផ្តាច់ការ។ Sud Ouest បានឆ្លើយភ្លាមថា ទេ យើងមិនអាចរស់នៅក្រោមការគំរាមកំហែងគួរឲ្យភ័យខ្លាចបានឡើយ។ ពេលវេលាបានមកដល់ហើយដែលសាធារណរដ្ឋត្រូវតែបង្ហាញសាច់ដុំរបស់ខ្លួន នេះជាការសន្និដ្ឋានចុងក្រោយរបស់កាសែត Sud Ouest៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ