អ.ស.ប.៖ការសន្យារបស់ប្រទេសក្នុងលោកដើម្បីកាត់បន្ថយឧស្ម័នផ្ទះកញ្ចក់នៅមិនទាន់គ្រប់គ្រាន់
៣សប្តាហ៍ មុនសន្និសីទអន្តរជាតិស្តីពីបញ្ហាអាកាសធាតុរៀបចំក្នុងទីក្រុងប៉ារីស ប្រទេសបារំាងឈានមកដល់ អង្គការសហប្រជាជាតិ (អ.ស.ប.) បានទាញសញ្ញាអាសន្នដោយយល់ឃើញថា ការសន្យារបស់ប្រទេសក្នុងលោកដើម្បីកាត់បន្ថយឧស្ម័នផ្ទះកញ្ចក់នៅមិនទាន់គ្រប់គ្រាន់នៅឡើយទេ។ អង្គការសហប្រជាជាតិបានយល់ឃើញថា ប្រទេសនីមួយៗត្រូវតែចាត់វិធានការបន្ថែមទៀតដើម្បីអាចរក្សាកំដៅក្នុងភពផែនដីមិនឲ្យកើនលើសពី ២អង្សារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
ការទាញសញ្ញាអាសន្នរបៀបនេះត្រូវបានធ្វើឡើងនៅក្នុងរបាយការណ៍មួយរបស់កម្មវិធីអង្គការសហប្រជាជាតិដើម្បីបរិស្ថាន។ លោក Achim Steiner នាយកកម្មវិធីអង្គការសហប្រជាជាតិដើម្បីបរិស្ថានបានគូសបញ្ជាក់ថា ការសន្យាសព្វថ្ងៃ រួមផ្សំនឹងវិធានការជាច្រើនដែលបានអនុម័តនាប៉ុន្មានឆ្នំាចុងក្រោយនេះ គឺជាសក្ខីកម្មមួយដែលបង្ហាញឲ្យឃើញពីការយកចិត្តទុកដាក់ប្រកបដោយសុឆន្ទៈ និងមហិច្ឆតារបស់ប្រទេសនីមួយៗក្នុងការប្រឈមទប់នឹងការឡើងកំដៅនៅក្នុងបរិយាកាស។ តែបញ្ហានៅត្រង់ថា ការសន្យា និងការប្រឹងប្រែងទំាងនេះនៅមិនទាន់គ្រប់គ្រាន់ទេដើម្បីអាចទប់កំដៅនៅក្នុងភពផែនដីមិនឲ្យលើសពី ២អង្សារដូចដែលគ្រប់គ្នាចង់បាននោះ នេះជាបញ្ជាក់បន្ថែមរបស់លោក Achim Steiner។
តាមរបាយការណ៍របស់កម្មវិធីអង្គការសហប្រជាជាតិដើម្បីបរិស្ថានដែលរៀបចំឡើងដោយក្រុមអ្នកស្រាវជ្រាវអន្តរជាតិឲ្យដឹងថា នៅក្នុងកិច្ចសន្យារបស់ប្រទេសទំាង ១៤៦ ផ្សព្វផ្សាយកាលពីថ្ងៃទី១ តុលាកន្លងទៅបានបង្ហាញឲ្យឃើញថា កំដៅនៅក្នុងបរិយាកាសនឹងស្ថិតចម្លោះពី ៣ ទៅ ៣,៥អង្សារនៅក្នុងរង្វង់ឆ្នំា ២១០០។ ដូច្នេះដើម្បីអាចឲ្យកម្រិតសីតុណ្ហភាពឲ្យនៅត្រឹម ២អង្សារបាន ប្រទេសនីមួយៗត្រូវតែចាត់វិធានការបន្ថែមទៀត។ បើមិនដូច្នោះទេ ក្រុមអ្នកវិទ្យាសាស្រ្តបានព្រមានថា សីតុណ្ហភាពក្នុងភពផែនដីលើសពី ២អង្សារនឹងបង្កឲ្យមានផលវិបាកជាច្រើនសម្រាប់ពិភពលោកដែលគ្មានប្រទេសណាមួយគេចរួចទេ។
គួរជម្រាបជូនថា របាយការណ៍របស់កម្មវិធីអង្គការសហប្រជាជាតិដើម្បីបរិស្ថានបានធ្លាក់មក ៣សប្តាហ៍មុនការរៀបចំសន្និសីទអន្តរជាតិស្តីពីបញ្ហាអាកាសធាតុក្នុងទីក្រុងប៉ារីស ប្រទេសបារំាង។ គឺជាសន្និសីទដែលប្រទេសទំាង ១៩៥ ត្រូវស្វែងរកកិច្ចព្រមព្រៀងមួយស្តីពីបញ្ហាអាកាសធាតុដែលនឹងត្រូវបន្តពីពិធីសារក្យូតូចាប់ពីឆ្នំា ២០២០ ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ