ក្រុមប្រឹក្សានៃកិច្ចសហប្រតិបត្តិការឈូងសមុទ្រពែរ្សកំពុងស្វែងរកទ័ណ្ឌកម្មប្រឆំាងយេម៉ែនពីក្រុមប្រឹក្សាសន្តិសុខ
ថ្ងៃព្រហស្បតិ៍ ទី២ មេសានេះ បានឈានចូលថ្ងៃទី៧ ដែលប្រទេសអារ៉ាប៊ីសាអូឌីតបានដឹកនំាប្រតិបត្តិការវាយប្រហារផ្លូវអាកាសលើក្រុមឧទ្ទាមហ៊ូទី្សក្នុងប្រទេសយេម៉ែន។ រីឯកម្លំាងរបស់ហ៊ូទី្សក៏ហាក់ដូចជាកំពុងរំកិលទៅមុខឆ្ពោះទៅវាយយកទីក្រុងអាដេនដែលជាទីក្រុងសំខាន់ទី២របស់យេម៉ែន។ ទន្ទឹមគ្នានេះ AQPA ដែលជាសាខាអាល់កៃដាក្នុងតំបន់ក៏បានវាយប្រហារលើពន្ធនាគារមួយស្ថិតប៉ែកអាគ្នេយ៍ប្រទេសដោយបានរំដោះអ្នកទោសចេញពីគុកជាង ៣០០នាក់។ នៅឯទីស្នាក់ការរបស់ក្រុមប្រឹក្សាសន្តិសុខអង្គការសហប្រជាជាតិក្នុងទីក្រុងញូយ៉កវិញ ក្រុមប្រឹក្សានៃកិច្ចសហប្រតិបត្តិការឈូងសមុទ្រពែរ្សបានព្យាយាមរកទ័ណ្ឌកម្មដាក់លើប្រទេសយេម៉ែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:១៨
ផ្ទំាងស៊ីបជាអាទិភាពរបស់កម្លំាងអារ៉ាប់ដឹកនំាដោយប្រទេសអារ៉ាប៊ីសាអូឌីត គឺកម្ទេស ឬក៏យ៉ាងហោចណាស់ ធ្វើឲ្យកម្លំាងឧទ្ទាមហ៊ូទី្សនិកាយឈីអ៊ីតចុះខ្សោយ។ តែប្រតិបត្តិវាយប្រហារពេញមួយសប្តាហ៍កន្លងមក បែរជាបានបណ្តាលឲ្យស្លាប់ជនស៊ីវិលយ៉ាងច្រើន និងកំពុងធ្វើឲ្យពួកឧទ្ទាមហ៊ូទី្សឡើងចាងកាន់តែខ្លំាងទៅវិញ។ គួររម្លឹកជូនថា ពួកហ៊ូទី្សកំពុងកាន់អំណាចដែលពួកគេវាយដណ្តើមបានពីលោកប្រធានាធិបតីស្របច្បាប់ហាឌីដែលបច្ចុប្បន្នកំពុងភៀសខ្លួនជ្រកកោននៅក្នុងប្រទេសអារ៉ាប៊ីសាអូឌីត។ ខណៈនេះ ពួកហ៊ូទី្ស រួមជាមួយសម្ព័ន្ធមិត្តរបស់គេ និងក្រុមប្រដាប់អាវុធដែលបន្តស្មោះត្រង់នឹងអតីតប្រធានាធិបតីធា្លក់ពីអំណាចអាប់ដាឡា សាឡេកំពុងប្រយុទ្ធទល់នឹងកម្លំាងរបស់លោកហាឌីដើម្បីដណ្តើមកាន់កាប់ទីក្រុងអាដេនដែលជាទីក្រុងធំទី២ របស់យេម៉ែន។
ស្ថានការណ៍វឹកវរនៅយេម៉ែនផ្តល់ឱកាសល្អដល់អាល់កៃដា និងអង្គការរដ្ឋអ៊ីស្លាម
យេម៉ែនបាន និងកំពុងប្រឈមមុខនឹងវិបត្តិពីរខុសគ្នា ទី១ គឺវិបត្តិនយោបាយផ្ទៃក្នុងរវាងរដ្ឋាភិបាលរបស់លោកប្រធានាធិបតីហាឌីដែលទទួលស្គាល់ដោយសហគមន៍អន្តរជាតិ និងក្រុមឧទ្ទាមហ៊ូទី្សនិកាយឈីអ៊ីតដែលគេអាចចាត់ទុកជាកម្លំាងនយោបាយផ្ទៃក្នុងមួយ និងវិបត្តិទី២ គឺវិបត្តិដែលបង្កចេញពីចលនាអាល់កៃដា AQPA និងអង្គការរដ្ឋអ៊ីស្លាម។ នៅថ្ងៃនេះ ក្រុម AQPA បានបើកការវាយប្រហារលើពន្ធនាគារមួយក្នុងខេត្ត Moukalla ស្ថិតប៉ែកអាគ្នេយ៍ប្រទេសដោយបានរំដោះអ្នកទោសជាង ៣០០នាក់ ក្នុងនោះ មានម្នាក់ជាមេកើយរបស់គេឈ្មោះ Khalet Batarfi ដែលបានជាប់ក្នុងគុកនោះអស់ជាង ៤ឆ្នំា។
ក្រៅពីវាយប្រហារលើពន្ធនាគារ ក្រុម AQPA ក៏បានវាយប្រហារក្នុងថ្ងៃតែមួយលើស្ថាប័នមួយចំនួនក្នុងខេត្ត Moukalla ដដែល ដូចជាធនាគារ ស្នងការដ្ឋាននគរបាល ឬមួយក៏មន្ទីររបស់ក្រសួងស៊ើបការសម្ងាត់ជាដើម។ ដូច្នេះឃើញថា ស្ថានការណ៍វឹកវរផ្ទៃក្នុងសព្វថ្ងៃនេះបាន និងកំពុងផ្តល់ឱកាសយ៉ាងល្អដល់ក្រុម AQPA និងអង្គការរដ្ឋអ៊ីស្លាម។ ពិតណាស់ថា ក្រុម AQPA និងអង្គការរដ្ឋអ៊ីស្លាម គឺជាចលនាភេរវនិយមដ៏គ្រោះថ្នាក់បំផុតសម្រាប់ប្រទេសយេម៉ែន និងសហគមន៍អន្តរជាតិ។ តែដើម្បីអាចបង្រ្កាបពួកនេះបាន គេត្រូវតែរកដំណោះស្រាយនយោបាយផ្ទៃក្នុងឲ្យយេម៉ែនជាមុនសិន ពោលកិច្ចព្រមព្រៀងនយោបាយមួយរវាងក្រុមឧទ្ទាមហ៊ូទី្ស និងរដ្ឋាភិបាលរបស់លោកប្រធានាធិបតីហាឌី។
ក្រុមប្រឹក្សានៃកិច្ចសហប្រតិបត្តិការឈូងសមុទ្រពែរ្សកំពុងប្រឈមមុខនឹងប្រទេសរុស្ស៊ី
នៅទីស្នាក់ការរបស់អង្គការសហប្រជាជាតិក្នុងទីក្រុងញូយ៉ក សហរដ្ឋអាមេរិក ក្រុមប្រឹក្សានៃកិច្ចសហប្រតិបត្តិការឈូងសមុទ្រពែរ្សដែលមានសមាជិក ៦ប្រទេស គឺអារ៉ាប៊ីសាអូឌីត គូវ៉ែត បារ៉ែន អេមីរ៉ាអារ៉ាប់រួម កាតា និងប្រទេសអូម៉ង់កំពុងស្វែងរកសេចក្តីសម្រេចចិត្តមួយសម្រាប់ប្រទេសយេម៉ែន។ សេចក្តីសម្រេចចិត្តជាអាទិភាព គឺផ្តល់សន្ទុះឡើងវិញនូវកិច្ចសន្ទនានយោបាយរវាងភាគីជម្លោះផ្ទៃក្នុង។ បន្ទាប់មក ក្រុមប្រឹក្សានៃកិច្ចសហប្រតិបត្តិការឈូងសមុទ្រពែរ្សក៏ចង់ឲ្យមានទ័ណ្ឌកម្មសេដ្ឋកិច្ច និងការហាមលក់អាវុធទៅឲ្យយេម៉ែនដើម្បីដាក់គំនាបលើពួកហ៊ូទី្សដែរ។
តែឧបសគ្គដែលក្រុមប្រឹក្សានៃកិច្ចសហប្រតិបត្តិការឈូងសមុទ្រពែរ្សកំពុងជួបប្រទះពេលនេះ គឺការជំទាស់ពីភាគីរុស្ស៊ីដែលជាសមាជិកអចិន្រ្តៃយ៍ម្នាក់នៃក្រុមប្រឹក្សាសន្តិសុខអង្គការសហប្រជាជាតិ។ទីក្រុងម៉ូស្គូបានប្រឆំាងដាច់ខាតលើទ័ណ្ឌកម្មហាមលក់អាវុធទៅឲ្យយេម៉ែនជាលក្ខណៈទូទៅ និងចង់បានទ័ណ្ឌកម្មមួយដោយសំដៅចំៗលើបុគ្គលដោយហាមមិនអាចធ្វើដំណើរចេញក្រៅប្រទេស ឬបង្កកផ្អាប់ទុកទ្រព្យសម្បត្តិ។ គួរបញ្ជាក់ថា រុស្ស៊ីជាសម្ព័ន្ធមិត្តរបស់ប្រទេសអ៊ីរ៉ង់ និងដែលអ៊ីរ៉ង់បានចេញមុខគំាទ្រចលនាឧទ្ទាមហ៊ូទី្សជាចំហនៅយេម៉ែន។ កន្លងមក ទីក្រុងតេហេរ៉ង់ថែមទំាងបានថ្កោលទោសលើប្រតិបត្តិការយោធារបស់អារ៉ាប៊ីសាអូឌីតនៅយេម៉ែន និងព្រមានទុកជាមុនពីផលវិបាកនៅពេលខាងមុខ។
សូមជម្រាបជូនថា អន្តរាគមន៍យោធាដឹកនំាដោយអារ៉ាប៊ីសាអូឌីតនៅយេម៉ែនត្រូវបានប្រទេសខ្លះចាត់ទុកជារឿងខុសច្បាប់ និងជាការឈ្លានពានលើបូរណភាពដែនដីយេម៉ែន។ តែក្រុមប្រឹក្សានៃកិច្ចសហប្រតិបត្តិការឈូងសមុទ្រពែរ្សបានអះអាងជាថ្មីថា ប្រតិបត្តិការរបស់គេជាប្រតិបត្តិការស្របច្បាប់ ព្រោះមានការហៅឲ្យជួយពីលោកប្រធានាធិបតីយេម៉ែនហាឌី និងថា បេសកម្មរបស់ក្រុមប្រឹក្សានៃកិច្ចសហប្រតិបត្តិការឈូងសមុទ្រពែរ្សនៅអង្គការសហប្រជាជាតិពេលនេះមិនមែនដើម្បីសុំការគំាទ្រជាផ្លូវការពីក្រុមប្រឹក្សាសន្តិសុខឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ